"ஊழல் தான் ‘இந்தியா’ கூட்டணியால் உண்மையில் பின்பற்றப்படும் ஒரே அரசியலமைப்பு".. அண்ணாமலை தாக்கு!
சென்னை: குற்ற வழக்குகளில் சிக்கும் முதலமைச்சர்கள், அமைச்சர்களை பதவி நீக்கம் செய்யும் மசோதாவுக்கு எதிர்ப்பு தெரிவித்த தமிழக முதல்வர் ஸ்டாலினுக்கு பாஜக முன்னாள் மாநிலத் தலைவர் அண்ணாமலை பதில் கொடுத்துள்ளார்.
30 நாட்கள் சிறையில் இருந்தால், பிரதமர், முதலமைச்சர்கள், அமைச்சர்களை பதவி நீக்கம் செய்யும் புதிய சட்ட மசோதாவை லோக்சபாவில் மத்திய உள்துறை அமைச்சர் அமித்ஷா தாக்கல் செய்தார். இந்த மசோதா மக்களவையில் நிறைவேற்றப்பட்டது. இந்த மசோதாவுக்கு தமிழக முதல்வர் ஸ்டாலின் கடும் எதிர்ப்பு தெரிவித்தார்.
முதலமைச்சர் மு.க. ஸ்டாலின், "போட்டியாளர்களை கைது செய்து அவர்களை பதவியில் இருந்து நீக்கும் அதிகாரத்தை தன்னிடம் வைத்துக்கொள்வதே சர்வாதிகார வளர்ச்சியின் முதல் படி. இந்த மசோதா அதைத்தான் செய்ய முயல்கிறது" எனத் தெரிவித்து, இது ஒரு கருப்பு நாள் என்றும், இது ஒரு கருப்பு மசோதா என்றும் இது சர்வாதிகாரத்தின் தொடக்கம் என்றும் விமர்சித்தார்.
முதல்வர் ஸ்டாலினுக்கு பதில் அளிக்கும் வகையில் பாஜக முன்னாள் மாநில தலைவர் அண்ணாமலை சமூக வலைதளத்தில் வெளியிட்ட பதிவில், "வேலை வாங்கித் தருவதாக பணமோசடி செய்து கீழ் கைது செய்யப்பட்ட ஒரு அமைச்சரை, இலாகா இல்லாத அமைச்சராக தக்க வைத்துக் கொண்ட உங்களின் வெட்கமில்லாத அரசை விட, கருப்பான அல்லது அவமானகரமானது வேறு எதுவும் இல்லை.
சிறையில் இருந்து விடுவிக்கப்பட்ட பிறகு, உங்களின் வெட்கமில்லாத அரசு, செந்தில் பாலாஜியை மீண்டும் அவர் முன்னர் வகித்த அதே அமைச்சர் பொறுப்பை வழங்கியது. உச்ச நீதிமன்றத்தின் கடும் விமர்சனத்தைத் தொடர்ந்துதான் அந்த அமைச்சர் பதவி பறிக்கப்பட்டது.
தொடர்ந்து வரும் விசாரணையில், உங்கள் அரசின் தாமதப்படுத்தும் முயற்சிகள் குறித்து, உச்ச நீதிமன்றம் சமீபத்தில் கூறியதை நாங்கள் மீண்டும் சொல்ல வேண்டுமா? இந்தியா கூட்டணியின் இன்னொரு ஊழல் வீரர் அரவிந்த் கெஜ்ரிவால், ஊழல் குற்றச்சாட்டுகளில் சிறை வைக்கப்பட்டிருந்தும், பல மாதங்களாக முதல்வர் பதவியைப் பிடித்துக் கொண்டிருந்தார்.
மக்கள் பிரதிநிதித்துவ சட்டத்தின் பிரிவு 8(4) ஐ உச்ச நீதிமன்றம் தள்ளுபடி செய்த போது, அப்போதைய ஐக்கிய முற்போக்கு கூட்டணி அரசு, தண்டனை பெற உள்ள தங்கள் எம்எல்ஏக்களை பாதுகாக்க, அவசரத்தில் ஒரு ஆணையை கொண்டு வந்தது. இன்று கூட்டணியின் பெயர் மாறிவிட்டது, ஆனால் அதன் குறிக்கோள் அப்படியே உள்ளது.
130வது அரசியலமைப்புத் திருத்தத்தை நீங்கள் எதிர்ப்பது எங்களுக்கு எந்த ஆச்சரியமும் ஏற்படுத்தவில்லை. ஊழல் தான் உங்கள் கூட்டணியால் உண்மையில் பின்பற்றப்படும் ஒரே அரசியலமைப்பு" எனத் தெரிவித்துள்ளார்.
Click it and Unblock the Notifications
Sign in with Google