அண்ணாமலை காட்டியது சீட்டு தான்.. ரஃபேல் வாட்ச் பில் இல்லை.. சிட்டையை காட்டி சீட்டிங் - ஆர்.எஸ்.பாரதி

Updated: Friday, April 14, 2023, 16:12 [IST]

Subscribe to Oneindia Tamil

சென்னை : தமிழ்நாடு பாஜக தலைவர் அண்ணாமலை தனது கையில் கட்டியிருக்கும் ரஃபேல் வாட்ச்சுக்கான பில் என்று கூறி செய்தியாளர் சந்திப்பில் காட்டிய நிலையில், திமுக அமைப்புச் செயலாளர் ஆர்.எஸ்.பாரதி, "அண்ணாமலை காட்டியது சீட்டு.. ரசீதைக் காட்டாமல் சிட்டையைக் காட்டி சீட்டிங் செய்கிறார் அண்ணாமலை" என விமர்சித்துள்ளார்.

திமுக முக்கிய பிரமுகர்களின் சொத்து பட்டியலை, ஆதாரங்களுடன் இன்று வெளியிடுவதாக அண்ணாமலை அறிவித்து இருந்தார். அதன்படி, தமிழ் புத்தாண்டு தினமான இன்று சென்னை தியாகராய நகரில் உள்ள பாஜக தலைமை அலுவலகமான கமலாலயத்தில் செய்தியாளர்கள் முன்னிலையில் அண்ணாமலை திமுகவினரின் ஊழல் பட்டியல் என ஒரு பட்டியலை வெளியிட்டார்.

Annamalai only shown chit, not a rafale watch receipt : DMK RS bharathi reply

மேலும், தனது கையில் கட்டியிருக்கும் ரஃபேல் வாட்ச்சுக்கான பில் என்று கூறி அதனையும் இன்று வெளியிட்டார். அப்போது பேசிய அவர், ஐபிஎஸ் அதிகாரியாக பணியில் இருந்தபோது லஞ்ச பணத்தில் ரஃபேல் வாட்ச் வாங்கியதாக திமுகவினர் தகவல் பரப்பினர். ரஃபேல் வாட்ச் வரிசையில் 147வது வாட்சை நான் வாங்கினேன். அந்த வாட்ச்சை எனக்கு கொடுத்ததே எனது நண்பர் தான். சேரலாதன் ராமகிருஷ்ணன் என்ற நண்பர் ஒருவர் எனக்கு வழங்கிய அந்த ரஃபேல் வாட்சின் விலை 3 லட்சம் ரூபாய் மட்டுமே எனத் தெரிவித்தார்.

இந்நிலையில், அண்ணாமலையின் குற்றச்சாட்டுகளுக்கு பதிலடி கொடுக்கும் வகையில் இன்று செய்தியாளர்களைச் சந்தித்து வருகிறார் திமுக அமைப்புச் செயலாளர் ஆர்.எஸ்.பாரதி. அண்ணாமலை ரஃபேல் வாட்ச் பில் என்று கூறி வெளியிட்டதை விமர்சித்துள்ள ஆர்.எஸ்.பாரதி, "சிட்டை வேறு.. ரசீது வேறு.. அண்ணாமலை ரஃபேல் வாட்ச் பில்லை எங்கே காட்டினார்? வெறும் சீட்டைத் தான் காட்டியுள்ளார் சீட்டிங் அண்ணாமலை" எனத் தெரிவித்துள்ளார்.

மேலும், அண்ணாமலைக்கு உண்மையைப் பேசி எப்போதும் பழக்கமில்லை. அண்ணாமலை எதையோ சொல்லி பூ சுற்றுகிறார்.