அதே டெய்லர்.. அதே வாடகை.. மரு மட்டும் ஒட்டிக்கொண்டு வந்த ஏமாற்று வேலை! விஜய் மீது அண்ணாமலை அட்டாக்

சென்னை: அரசு கேபிள் டிவியில் மூன்று செய்தி சேனல்கள் ஒளிபரப்பில் ஏற்பட்ட பிரச்சனையைத் தொடர்ந்து தவெக அரசை அண்ணாமலை கடுமையாக விமர்சித்துள்ளார். "அதே டெய்லர், அதே வாடகை, மரு மட்டும் புதியது" என கூறி விஜய் தலைமையிலான ஆட்சிக்கு எதிராக சரமாரி குற்றச்சாட்டுகளை முன்வைத்துள்ளார் அண்ணாமலை.

தமிழ்நாடு அரசு கேபிள் டிவி நிறுவனம் வழங்கும் ஒளிபரப்புச் சேவையிலிருந்து பாலிமர் நியூஸ், நியூஸ் தமிழ் 24x7, தமிழ் ஜனம் ஆகிய செய்தித் தொலைக்காட்சிகளின் ஒளிபரப்பு நிறுத்தப்பட்டிருப்பதாக குற்றச்சாட்டு எழுந்தது. கடந்த ஒரு வாரத்திற்கு முன்பாக புதிய தலைமுறை சேனலின் வரிசை எண் பின்னுக்குத் தள்ளப்பட்டு இருட்டடிப்பு செய்யப்பட்டதாக விமர்சனம் எழுந்த நிலையில், தற்போது மூன்று சேனல்கள் அரசு கேபிளில் இருந்து நீக்கப்பட்டதாக விமர்சனங்கள் எழுந்தன.

அண்ணாமலை அட்டாக்

தவெக அரசை விமர்சனம் செய்து வந்ததால், மூன்று சேனல்களையும் அரசு கேபிளில் இருந்து நீக்கியிருப்பதாக எதிர்க்கட்சிகள் கடும் விமர்சனங்களை முன்வைத்து இருந்தன. உதயநிதி ஸ்டாலின், எடப்பாடி பழனிசாமி, அன்புமணி, அண்ணாமலை உள்ளிட்டோர் கடும் விமர்சனம் வைத்து இருந்தனர்.

ஆனால், இதனை மறுத்த தமிழக அரசு, "சேனல்கள் நீக்கப்பட்டுள்ளன என்ற செய்தி தவறானது. சம்பந்தப்பட்ட 3 சேனல்களை தொழில்நுட்ப பிரச்சனைகள் காரணத்தால் தற்காலிகமாக சில செட்-டாப் பாக்ஸ்களில் மட்டும் ஒளிபரப்பு செய்ய இயலவில்லை. இது தொடர்பாக சம்பந்தப்பட்ட தொலைக்காட்சி சேனல்களுக்கு தகவல் தெரிவிக்கப்பட்டுள்ளது. இதனைச் சரி செய்வதற்கு ஒப்பந்தம் செய்யப்பட்ட நிறுவனம் மூலமாக முழுவீச்சில் பணிகள் மேற்கொள்ளப்பட்டு வருகின்றன" என்று தெரிவித்து இருந்தது.

அதே டெய்லர் அதே வாடகை என விமர்சனம்

இதற்கிடையே, அண்ணாமலை மீண்டும் வெளியிட்ட ட்விட் பதிவில், தவெக அரசை கடுமையாக சாடியுள்ளார். அண்ணாமலை கூறியிருப்பதாவது:- "குறிப்பிட்ட மூன்று ஊடகங்களின் ஒளிபரப்பும் தடைப்பட்டுள்ளது என்பதை ஒப்புக்கொண்டமைக்கு முதலில் நன்றி. அது எப்படி, தவெக ஆட்சியின் அவலநிலையை வெளிப்படுத்தும் ஊடகங்களுக்கு மட்டும், செட்-டாப் பாக்ஸில் தொழில்நுட்பப் பிரச்சனைகள் வரும்?

பொய்களையும், புரட்டுகளையும், மக்கள் மத்தியில் உண்மை என நம்பவைக்க, கடந்த திமுக ஆட்சியில் உருவாக்கப்பட்ட இந்த TN Fact Check வலைத்தளக் கணக்கு, தவெக ஆட்சியிலும் அதே வேலையைத் தொடர்கிறது. இது மாற்றம் இல்லை. கன்னத்தில் மரு மட்டும் ஒட்டிக் கொண்டு வந்த, அதே டெய்லர் அதே வாடகை ஏமாற்று வேலை" என்று பதிவிட்டுள்ளார்.

விஜய்யை விமர்சிக்க தொடங்கும் அண்ணாமலை?

பாஜகவில் இருந்து விலகுவதாக கடந்த வாரம் அறிவித்த அண்ணாமலை, புதிய அரசியல் இயக்கம் ஒன்றை ஆரம்பித்துள்ளார். தமிழகத்தில் அடுத்து வரும் பொதுத்தேர்தலில் தனது கட்சி போட்டியிடும் என்று அண்ணாமலை கூறியுள்ளார். அண்ணாமலையின் "வி தி லீடர்ஸ்" இயக்கத்திலும் சேர்ந்துள்ளவர்கள் எண்ணிக்கை 17 லட்சத்தை தொட்டுள்ளது.

வரும் நாட்களில் விஜய் குறித்த விமர்சனங்களை தனது பாணியில் காட்டமாக முன்வைப்பார் என்கிறார்கள் அண்ணாமலை ஆதரவாளர்கள். தமிழகத்தில் மாற்று அரசியல் என்ற கோஷத்துடன் ஆட்சியைப் பிடித்த தவெக ஏமாற்றத்தையே அளித்து இருப்பதாக அரசியல் கட்சியினர் தொடர்ந்து முன்வைத்து வரும் நிலையில், அண்ணாமலையும் தன்பங்குக்கு விஜய் மீதான விமர்சனத்தை கூர்மையாக்க தொடங்கியுள்ளார்.

English summary

Annamalai has intensified his criticism of Vijay-led TVK government over the disruption of three news channels on Arasu Cable TV. Questioning the government's explanation of technical issues, he accused the administration of continuing old political practices under a new face.