தமிழக பாஜகவுக்கு புதிய தலைவர்.. அண்ணாமலை விரைவில் ம.பி செல்வார்.. எஸ்.வி.சேகர் ஆரூடம்!

Updated: Wednesday, September 27, 2023, 15:36 [IST]

Subscribe to Oneindia Tamil

சென்னை: விரைவில் தமிழ்நாடு பாஜக மாநிலத் தலைவர் பொறுப்பில் இருந்து அண்ணாமலை மாற்றப்படுவார், மத்திய பிரதேசத்திற்கு செல்வார் எனக் கூறியுள்ளார் எஸ்.வி.சேகர்.

தமிழ்நாடு பாஜக தலைவராக அண்ணாமலை நியமிக்கப்பட்டது முதலாகவே அவர் யாரையும் அரவணைத்து செல்வதில்லை என முன்னாள் எம்.எல்.ஏ எஸ்.வி.சேகர் வெளிப்படையாகவே குற்றம்சாட்டி வந்தார். அண்மைக்காலமாக அண்ணாமலை குறித்து எஸ்.வி.சேகர் கடும் விமர்சனங்களை முன் வைத்து வருகிறார். அண்ணாமலை தமிழ்நாடு பாஜக தலைவராக இருக்கும் வரை தமிழகத்தில் பாஜக ஒரு இடத்தில் கூட வெல்லாது எனப் பேசி வருகிறார் எஸ்.வி.சேகர்.

Annamalai will be changed soon, He will sent to Madhya prasesh, Says SV sekar

இந்நிலையில், சென்னை எழும்பூரில் இன்று செய்தியாளர்களைச் சந்தித்த எஸ்.வி.சேகர், பாஜக தலைமையிலான தேசிய ஜனநாயக கூட்டணியில் இருந்து அதிமுக விலகி உள்ளது, இதனால் கூட்டணிக்கு பாதிப்பு ஏற்படுமா என்பது குறித்த கேள்விக்கு, "இதனால் மத்தியில் உள்ள மோடி அவர்களுக்கு எந்தவிதமான பாதிப்பும் கிடையாது. மூன்றாவது முறையாக பிரதமர் மோடி அவர்கள் ஹாட்ரிக் பிரதமராக வருவது உறுதி. ஏனென்றால் இந்த கூட்டணி இருந்தாலும், இல்லாவிட்டாலும் தமிழ்நாடு பெரிய அளவில் பாஜகவுக்கு உதவி செய்யப்போவது இல்லை." எனப் பதில் அளித்துள்ளார்.

மேலும் பேசிய எஸ்.வி.சேகர், "இந்த கூட்டணி முறிவுக்கு அண்ணாமலைதான் காரணம் என அதிமுக தரப்பில் இருந்து பாஜக தலைமைக்கு சொல்லி உள்ளனர். அண்ணாமலை கூட்டணி தலைவர்களை தவறாக விமர்சிக்கிறார் என்ற ஒரு காரணத்தைத் தான் கூறி உள்ளனர். அண்ணாமலைக்கு அரசியல் முதிர்ச்சியோ, அனுபவமோ இல்லாததால் அவ்வாறு பேசி உள்ளார். அப்படிப்பட்ட ஒருவரை தமிழ்நாடு தலைவராக அமர்த்தியதுதான் தவறு.

அதை பாஜக மேலிடம் உணரும். மத்திய பிரதேச மாநில சட்டமன்றத் தேர்தல் வரும் போது அந்த மாநில பார்வையாளராக அண்ணாமலையை மாற்றிவிடுவார்கள். விரைவில் தமிழ்நாடு பாஜக மாநிலத் தலைவர் பொறுப்பில் இருந்து அண்ணாமலை மாற்றப்படுவார். அண்ணாமலை தமிழ்நாடு பாஜக தலைவராக இருக்கும் வரை தமிழகத்தில் பாஜக பூஜ்ஜியமாகத்தான் இருக்கும்" எனத் தெரிவித்தார்.

அண்ணாமலையை அழைத்து பாஜக மேலிடம் கண்டிப்பாக திட்டி இருப்பார்கள். நம்மிடம் சொல்வாரா அவர்? இந்த அழகில் அவர் கமல்ஹாசனுக்கு அட்வைஸ் செய்கிறார். ஐபிஎஸ் அதிகாரியாக இருந்துவிட்டு ஓடிவந்து அரசியலில் சேர்ந்ததற்கு, இவர் ஐபிஎஸ் படிக்காமல் இருந்திருந்தால் திறமை வாய்ந்த இன்னொரு இளைஞருக்கு அந்த வாய்ப்பு கிடைத்திருக்கும். அதுவும் போச்சு, இதுவும் போச்சு." எனத் தெரிவித்துள்ளார்.