திமுகவில் இணைந்த 2 வாரங்கள்.. அன்வர் ராஜாவுக்கு முக்கிய பொறுப்பைக் கொடுத்த ஸ்டாலின்!
சென்னை: அதிமுகவில் இருந்து கடந்த மாதம் திமுகவில் இணைந்த அன்வர் ராஜாவுக்கு இலக்கிய அணித் தலைவர் பொறுப்பு அளிக்கப்பட்டுள்ளது. திமுகவில் இணைந்த 2 வாரங்களில் அன்வர் ராஜாவுக்கு பதவி அளித்திருப்பது பல்வேறு விவாதங்களைத் தொடங்கி இருக்கிறது. இதன் மூலமாக மாற்றுக் கட்சியில் இருந்து திமுகவில் இணையும் நிர்வாகிகளுக்கும், இஸ்லாமியர்களுக்கும் திமுகவில் முக்கியத்துவம் அளிக்கப்படும் என்று பார்க்கப்படுகிறது.
தமிழ்நாட்டில் சட்டசபைத் தேர்தல் இன்னும் 8 மாதங்களில் நடக்கவுள்ளது. இதற்காக திமுக தரப்பில் தேர்தல் பணிகள் தீவிரமாக்கப்பட்டுள்ளது. இதனிடையே 2 வாரங்களுக்கு முன்பாக அதிமுக முன்னாள் அமைச்சர் அன்வர் ராஜா திடீரென அண்ணா அறிவாலயம் வந்து, முதல்வர் ஸ்டாலின் முன்னிலையில் திமுகவில் இணைந்தார். இது பலருக்கும் அதிர்ச்சியை ஏற்படுத்தியது.
ஏனென்றால் எம்ஜிஆர் காலத்தில் இருந்து அதிமுகவில் செயல்பட்டு வரும் அன்வர் ராஜா, அதிமுகவின் முன்னோடிகளில் ஒருவர். அதேபோல் அதிமுகவின் இஸ்லாமிய முகமாக இருந்து வந்த அன்வர் ராஜா, அண்ணா அறிவாலயம் வரும் வரை எடப்பாடி பழனிசாமிக்கு எதுவும் தெரியவில்லை. இதன்பின் அவசர அவசரமாக அன்வர் ராஜா நீக்கப்படுவதாக அதிமுக சார்பில் அறிவிக்கப்பட்டது.
பாஜக உடன் கூட்டணி அமைக்கப்பட்டதற்கு எதிர்ப்பு தெரிவித்து அன்வர் ராஜா விலகியதாக அறிவித்தார். இதன் மூலமாக திமுகவுக்கு சிறுபான்மையின மக்கள் ஆதரவு முழுமையாக இருப்பதாக அக்கட்சியினர் கூற தொடங்கினர். அதேபோல் பாஜகவின் அரசியலுக்கு அதிமுக பலியாகி வருவதாகவும் திமுகவினர் விமர்சிக்க தொடங்கினர்.
அன்வர் ராஜாவை தொடர்ந்து புதுக்கோட்டை அதிமுக முன்னாள் எம்எல்ஏ கார்த்திக் தொண்டைமானும் திமுகவில் தன்னை இணைத்துக் கொண்டார். இதன் மூலமாக விஜயபாஸ்கருக்கு திமுக செக் வைத்தது. இந்த நிலையில் 2 வாரங்களுக்கு முன்பாக திமுகவில் இணைந்த அன்வர்ராஜாவுக்கு, அக்கட்சியின் இலக்கிய அணித் தலைவர் பொறுப்பு அளிக்கப்பட்டுள்ளது.
இதன் மூலமாக மாற்றுக் கட்சி நிர்வாகிகளுக்கு திமுக தரப்பில் தூதுவிடப்பட்டதாகப் பார்க்கப்படுகிறது. சட்டசபைத் தேர்தலுக்கு முன்பாக திமுகவில் இணைந்தால், பதவி அளிக்கப்படும் என்று மறைமுக செய்தியைக் கூறி இருக்கிறது. அதேபோல் இஸ்லாமியர்களுக்கும் திமுகவில் முக்கியத்துவம் அளிக்கப்பட்டு வருவதாகவும் பார்க்கப்படுகிறது.
Click it and Unblock the Notifications
Sign in with Google