ஆற்காடு வீராசாமி மருத்துவமனையில் அனுமதி! திமுகவின் சூப்பர் சீனியர் ஹெல்த்துக்கு என்னாச்சு?

சென்னை: திமுகவின் மூத்த முன்னோடிகளில் ஒருவரும், அக்கட்சியின் முன்னாள் பொருளாளருமான ஆற்காடு வீராசாமி உடல்நலக் குறைவால் சென்னையில் உள்ள தனியார் மருத்துவமனை ஒன்றில் அனுமதிக்கப்பட்டுள்ளார்.

கடந்த பல மாதங்களாகவே வயதுமூப்பின் காரணமாக ஆற்காடு வீராசாமி வீட்டில் இருந்தபடி ஓய்வெடுத்து வருகிறார். அவ்வப்போது அவர் மருத்துவமனைக்கும் அழைத்துச் செல்லப்பட்டு சிகிச்சைகள் வழங்கப்படுகின்றன. இதனிடையே மருத்துவமனை செட்-அப்பில் கட்டில் மற்றும் மருத்துவ உபகரணங்கள் அமைக்கப்பட்டு சுழற்சி முறையில் கேர் டேக்கர்களும் வீட்டிலேயே பணியமர்த்தப்பட்டுள்ளனர்.

ஆற்காடு வீராசாமியின் மகனும் வடசென்னை மக்களவை தொகுதி உறுப்பினருமான கலாநிதி வீராசாமி மருத்துவர் என்பதால் அவரே அவரது தந்தையை கவனித்துகொள்கிறார். இந்நிலையில் ஆற்காடு வீராசாமியை சந்தித்து நலம் விசாரிப்பதற்காக அவ்வப்போது திமுக நிர்வாகிகள் சிலர் அவரது இல்லத்துக்கு சென்று வருவார்கள். முதலமைச்சர் ஸ்டாலினே பல முறை நேரில் சென்று ஆற்காடு வீராசாமி உடல்நலம் பற்றி கேட்டறிந்திருக்கிறார்.

இந்நிலையில் இன்று திடீரென ஆற்காடு வீராசாமி மருத்துவமனையில் அனுமதிக்கப்பட்டிருப்பது திமுக வட்டாரத்தில் பரபரப்பை கிளப்பியுள்ளது. ஆற்காட்டார் ஹெல்த்துக்கு என்னாச்சு என பலரும் விவாதித்துக் கொள்ள ஆரம்பித்துள்ளனர். இதனிடையே ஆற்காடு வீராசாமி மருத்துவமனையில் அனுமதிக்கப்பட்டிருப்பது பற்றி அவரது மகனும், வடசென்னை மக்களவை தொகுதி உறுப்பினருமான கலாநிதி வீராசாமியை ஒன் இந்தியா தமிழ் தொடர்பு கொண்டு பேசிய போது, கீழே விழுந்ததில் எலும்பு முறிவு ஏற்பட்டதாகவும் மற்றபடி பயப்பட எதுவுமில்லை எனவும் தெரிவித்தார்.

ஆற்காடு வீராசாமி ஆக்டிவாக இருந்த வரை கருணாநிதியின் வலதுகரமாக செயல்பட்டவர் என்பதும் திமுகவில் மிக முக்கிய பிரமுகராக வலம் வந்தவர் என்பதும் குறிப்பிடத்தக்கது.

English summary

Former DMK treasurer Arcot Veerasamy has been admitted to a private hospital in Chennai due to ill health