நடிகர் விஜய்யின் பின்னணியில் இவர்கள் தான்.. திமுகவின் திட்டமே வேறு.. அர்ஜூன் சம்பத் பரபரப்பு பேட்டி

சென்னை: "நடிகர் விஜய் திமுகவின் ஆதரவாளராக செயல்பட்டு வருகிறார், அதனால் திமுக எதிராக பேச வைத்து அதிமுக மற்றும் பாஜக வாக்குகளை அபகரிக்க முயற்சிக்கும் எண்ணம் உள்ளது. திமுக மற்றும் தவெக ஒன்று சேர்ந்து கள்ள கூட்டணியில் உள்ளன" என்று இந்து மக்கள் கட்சி அர்ஜூன் சம்பத் தன்னுடைய கருத்தை தெரிவித்துள்ளார்.. மேலும் தவெக தலைவர் விஜய்யின் அரசியலையும் அர்ஜூன் சம்பத் கடுமையாக விமர்சித்துள்ளார்.

விஜய்யின் அரசியலை பல கட்சிகள் விமர்சித்து வருகிறார்கள்.. குறிப்பாக கொள்கை எதிரி என்று சொல்லும் பாஜகவை விஜய் ஏன் விமர்சிப்பதில்லை? விஜய் தான் பாஜகவின் C டீம் என்று திமுக தொடர்ந்து கூறிவருகிறது.

அதேபோல விசிக திருமாவளவன், "விஜய் தனித்து இயங்கவில்லையோ என்கிற ஒரு சந்தேகம் எழுகிறது, நல்லது, கெட்டதை அவர் தான் தீர்மானிக்க வேண்டும். பாஜகவோடு அவர் காட்டுகிற அணுகுமுறை கூட, அவருக்கு பயன் தருவதாக அமையாது" என்று சொல்லி வருகிறார்.

அதேபோல மனிதநேய ஜனநாயக கட்சி தலைவர் தமீமுன் அன்சாரி, திமுக தீய சக்தி, தவெக தூய சக்தி என விஜய் பேசுவது அடுக்கு மொழி அல்ல; அது துடுக்கு மொழி. திமுகவை தாக்கி பேசும் அளவுக்கு, பாஜக மீது அவர் எந்த விமர்சனமும் வைக்கவில்லை? அவர் ஏன் பாஜகவை பார்த்து அச்சப்படுகிறார் என தெரியவில்லை என்று கூறி வருகிறார்..

இப்படி பாஜகவுடன் தொடர்புபடுத்தி தலைவர்கள் விமர்சித்து வரும்போது, பாஜகவை விஜய் எதிர்ப்பதாக சிலர் தலைவர்கள் பாஜக ஆதரவாளர்களே குற்றஞ்சாட்டி வருகிறார்கள். அதில் ஒருவர்தான் இந்து மக்கள் கட்சி தலைவர் அர்ஜூன் சம்பத்.

சில நாட்களுக்கு முன்பு செய்தியாளர்களிடம் அர்ஜூன் சம்பத்பேசும்போது, "நடிகர் விஜய் திமுகவின் ஊதுகுழலாக உள்ளார். திமுகவும் கிறிஸ்துவ அமைப்புகளும் சேர்ந்து விஜய்க்கு எப்படி பேச வேண்டும் என பேச்சை எழுதி தருகிறார்கள்.

மக்கள் நீதி மையத்திற்கு என்ன நிலை ஏற்பட்டதோ அதேதான் தமிழக வெற்றி கழகத்திற்கும் ஏற்பட உள்ளது. ஆர்எஸ்எஸ் குறித்து பேசுவதற்கு விஜய்க்கு வயதோ, அரசியல் அனுபவமோ கிடையாது. தேர்தலில் தமிழக வெற்றிக்கழகம் 3 சதவீத ஓட்டு தான் பெறும்" என்று கூறியிருந்தார்.

இந்நிலையில், மீண்டும் விஜய்யை விமர்சித்துள்ளார் அர்ஜூன் சம்பத்.. காஞ்சிபுரத்தில் செய்தியாளர்களிடம் பேசும்போது, "தவெக விஜய் ஈரோட்டில் நடத்திய கூட்டம் தோல்வி அடைந்தது, திமுகவுக்கும் தவெகவிற்கும் தான் போட்டி என்கிறார்.. திமுக ஒரு தீய சக்தி என எழுதிக் கொடுப்பதே திமுக தான்,

ஒவ்வொரு தேர்தலையும் திமுக நடிகரை கட்சி ஆரம்பிக்க வைக்கிறது.. கடந்த தேர்தலில் நடிகர் கமலை கட்சி ஆரம்பிக்க வைத்தனர், மக்கள் நீதி மையம் ஆரம்பித்து திமுகவை எதிராக பேச வைத்து தேர்தலில் வாக்கை மாற்றினார்கள்.. இப்போது நடிகர் விஜய் திமுகவின் A டீம்மாக செயல்படுகிறார்" எனக் கூறியுள்ளார்.

English summary

Arjun Sampath criticized the DMK government for allegedly using the High Court as a propaganda stage. He claimed their statements are biased and deeply wound the religious sentiments of Hindus.