தமிழகத்தில் உயர்கிறதா ஆட்டோ கட்டணம்? அமைச்சர் சிவசங்கர் சொன்னது என்ன?

Updated: Saturday, May 31, 2025, 8:17 [IST]

Subscribe to Oneindia Tamil

சென்னை: ஆட்டோ மீட்டர் கட்டணம் விரைவில் மாற்றம் செய்யப்படும் என போக்குவரத்து துறை அமைச்சர் சிவசங்கர் தெரிவித்துள்ளார். அது போல் மினி பேருந்துகள் இயக்கம் குறித்தும் அவர் தெரிவித்துள்ளார்.

தமிழகத்தில் பொது போக்குவரத்துகள் இருக்கும் போதிலும் ஆட்டோக்களும் இயங்கி வருகின்றன. இவை ஷேர் ஆட்டோக்களாகவும் இயங்கி வருகின்றன. பொது போக்குவரத்தில் பயணிக்க இயலாதவர்கள் ஆட்டோவில் பயணிக்கிறார்கள்.

தாங்கள் செல்ல வேண்டிய இடத்திற்கு பேருந்துகளோ மெட்ரோ ரயில்களோ இல்லாவிட்டால் அவர்கள் ஆட்டோவில் பயணிக்கிறார்கள். பிரசவத்துக்கு இலவசம் என்பதை போல் அவசரத்திற்கு ஆட்டோ என சொல்லலாம்.

ஆனால் ஆட்டோ ஓட்டுநர்கள் அதிகபடியான கட்டணத்தை வசூலிப்பதாக குற்றச்சாட்டு எழுகிறது. இது எப்போதும் இருந்து வருகிறது. ஓலா, ஊபர் உள்ளிட்ட செயலிகளில் புக் செய்தால் ஒரு இடத்திற்கு 80 ரூபாய் காட்டினால், அந்த ஆட்டோ ஓட்டுநர் போன் செய்து 100 ரூபாய் தாங்க வரேன் என்பார்.

வாடிக்கையாளரும் அவசரத்திற்காக சரி வாங்க என்கிறார். இப்படித்தான் ஆட்டோ ஓட்டுநர்கள் மீது புகார்கள் எழுகின்றன. நேரடியாக ஆட்டோக்களை அணுகினால்தான் இப்படி அதிக கட்டணம் கேட்கிறார்கள் என்றால், செயலிகள் மூலம் ஆட்டோவை புக் செய்தாலும் அதே நிலைதான்.

இந்த நிலையில் கடைசியாக 2013 ஆம் ஆண்டு ஆட்டோ மீட்டர் கட்டணம் மாற்றி அமைக்கப்பட்டது. இதனால் மீண்டும் ஆட்டோ கட்டணத்தை உயர்த்த வேண்டும் என ஆட்டோ ஓட்டுநர்கள் சங்கம் கோரிக்கை வைத்தது. 2013 ஆம் ஆண்டு தனிநபர் ஒருவர் தொடர்ந்த வழக்கை விசாரித்த நீதிமன்றம் 2022 ஆம் ஆண்டு பிப்ரவரி மாதம் ஆட்டோ மீட்டர் கட்டணத்தை மாற்றி அமைக்க உத்தரவிட்டது.

அதன்படி பல கட்ட பேச்சுவார்த்தை நடத்திய நிலையில் இன்னும் கட்டணம் உயர்த்தப்படவில்லை. கடந்த பிப்.1 ஆம் தேதி முதல் உயர்த்தப்படும் என சங்கங்கள் அறிவித்திருந்தன. இந்த நிலையில் போக்குவரத்து துறை அமைச்சர் சிவசங்கரை, தமிழக ஆட்டோ, கால் டாக்ஸி ஓட்டுநர்கள் சங்கங்களின் கூட்டமைப்பு தலைவர் ஜாஹிர் உசேன், பொதுச் செயலாளர் வெற்றிவேல் உள்ளிட்டோர் சந்தித்து கோரிக்கை வைத்தனர்.

அப்போது அமைச்சர், ஆட்டோ மீட்டர் கட்டண உயர்வு குறித்து அதிகாரிகளுடன் தலைமைச் செயலாளர் ஆலோசனை நடத்தி வருகிறார். விரைவில் கட்டணம் மாற்றப்படும் என்றார்.