வங்கிக்கடன் மோசடி: சென்னையை சேர்ந்த நிறுவனத்தின் ரூ.268 கோடி சொத்துகள் பறிமுதல் - அமலாக்கத்துறை

சென்னை: ரூ.479 கோடி வங்கிக் கடன் மோசடி தொடர்பான வழக்கில் சென்னையைச் சேர்ந்த அக்னிட் எஜுகேஷன் நிறுவனத்துக்கு சொந்தமான ரூ.268.66 கோடி மதிப்புள்ள சொத்துகளை அமலாக்கத்துறை பறிமுதல் செய்துள்ளது.

சென்னையைச் சேர்ந்த அக்னிட் எஜுகேஷன் நிறுவனம்(முன்னர் டெலிடேட்டா இன்ஃபர்மேடிக்ஸ் லிமிடெட்) பாரத ஸ்டேட் வங்கியிடமிருந்து பல்வேறு கடன் வசதிகளைப் பெற்று மோசடி செய்ததாக பெங்களூர் சி.பிஐ போலீசார் வழக்குப்பதிவு செய்தனர்.

பெங்களூரு சிபிஐ பதிவு செய்த இரண்டு எஃப்ஐஆர்களின் அடிப்படையில் அக்னிட் எஜுகேஷன் லிமிடெட் இயக்குநர்கள் கே பாலசுப்ரமணியம் மற்றும் கே பத்மநாபன் ஆகியோருக்கு எதிராகவும் டெலிடேட்டா மரைன் சொல்யூஷன்ஸ் லிமிடெட் மீது சென்னை சிபிஐ பதிவு செய்யப்பட்ட இரண்டு எஃப்ஐஆர்களின் அடிப்படையிலும் அமலாக்கத்துறை விசாரணையைத் தொடங்கியது.

அப்போது அக்னிட் எஜுகேஷன் லிமிடெட் நிறுவனம் , அதன் துணை நிறுவனம் பாரத ஸ்டேட் வங்கியிடமிருந்து பல்வேறு கடன் வசதிகளைப் பெற்று அந்த வங்கியில் ரூ.479 கோடி அளவுக்கு மோசடியில் ஈடுபட்டது தெரியவந்தது. இந்த நிலையில்தான் அக்னிட் எஜுகேஷன் நிறுவனத்துக்கு சொந்தமான ரூ.268.66 கோடி மதிப்புள்ள சொத்துகளை அமலாக்கத்துறை பறிமுதல் செய்துள்ளது.

அக்னிட் எஜுகேஷன் லிமிடெட் மற்றும் அதன் துணை நிறுவனம் ஐந்து எல்பிஜி கேரியர் கப்பல்கள், எண்ணெய் டேங்கர் போன்ற அசையும் சொத்துக்கள் ஆகியவற்றையும், வெளிநாட்டு வங்கி நிலுவைகள் தவிர, போலி முதலீடுகள், வங்கிக் கடன்களைப் பெறுவதற்கான இருப்புநிலைக் குறிப்பை உயர்த்துவதற்காக தொடர்புடைய பரிவர்த்தனைகள் என வங்காளதேசம், தாய்லாந்து மற்றும் ஆஸ்திரியா ஆகிய நாடுகளில் அசையும் மற்றும் அசையா சொத்துக்களை கடன் கணக்கை மாற்றி வாங்கியதாக அமலாக்கத்துறை வெளியிட்ட செய்திக்குறிப்பில் கூறப்பட்டுள்ளது. இந்த விவகாரம் தொடர்பாக மேலும் விசாரணை நடைபெற்று வருகிறது என்றும் கூறப்பட்டுள்ளது.

English summary

The Enforcement Department has seized assets worth Rs 268.66 crore belonging to Chennai-based Agnit Education in a Rs 479 crore bank loan fraud case