கனிமொழியை சமாளிக்க முடியாது.. உதயநிதி பக்கம் ஃபோகஸை திருப்பிய விஜய்.. இப்படி ஒரு காரணமா?
சென்னை: எதிர்க்கட்சித் தலைவர் உதயநிதி ஸ்டாலின் கைதும், அதனைத் தொடர்ந்து நடைபெற்ற சம்பவங்களும் பெரும் அதிர்வலைகளை ஏற்படுத்தி வருகின்றன. தஞ்சாவூர் ஆர்ப்பாட்டத்தில் பேசிய பேச்சுக்காகத் தொடரப்பட்ட வழக்கில், சென்னை நீலாங்கரை இல்லத்தில் வைத்து உதயநிதி ஸ்டாலின் கைது செய்யப்பட்டு, தஞ்சாவூர் செங்கிப்பட்டி காவல் நிலையத்தில் வைத்து விசாரிக்கப்பட்டு பிணையில் விடுவிக்கப்பட்டார்.
இருப்பினும், இந்தத் துரிதமான கைது நடவடிக்கைக்குப் பின்னால் வெறும் பேச்சுவார்த்தைப் பிரச்னை மட்டுமே காரணமல்ல என்றும், இதன் பின்னணியில் மிகப் பெரிய அரசியல் கணக்கீடுகளும் வியூகங்களும் ஒளிந்திருப்பதாக அரசியல் விமர்சகர்கள் மற்றும் உள்வட்டாரத் தகவல்கள் தெரிவிக்கின்றன.
கனிமொழி கருணாநிதி: முதிர்ந்த அரசியல் ஆளுமை
திமுகவின் தலைமைப் பீடத்தைப் பொறுத்தவரை, அடுத்தகட்ட தலைவராக உதயநிதி ஸ்டாலினை முன்னிறுத்தும் முயற்சிகள் நீண்டகாலமாக நடைபெற்று வருகின்றன. அதேநேரத்தில், கட்சியின் மூத்த தலைவரும், செல்வாக்குமிக்க நாடாளுமன்ற உறுப்பினருமான கனிமொழி கருணாநிதி, முதிர்ந்த அரசியல் ஆளுமையாகவும் தலைசிறந்த பேச்சாளராகவும் திகழ்கிறார். உதயநிதியைக் காட்டிலும் பரந்த அரசியல் தொடர்புகளும், ஆழமான கொள்கைப் புரிதலும் கனிமொழிக்கு உண்டு என்பது அரசியல் விமர்சகர்களின் பொதுவான கணிப்பாக உள்ளது.
கனிமொழி கையில் எடுக்கும் சூழல் உருவானால் சிக்கல்
ஒருவேளை எதிர்காலத்தில் திமுகவின் முதன்மைத் தலைமைப் பொறுப்பைக் கனிமொழி கையில் எடுக்கும் சூழல் உருவானால், அரசியல் ரீதியாக அவரை எதிர்கொள்வது ஆளுங்கட்சியான தவெகவிற்கும் முதல்வர் விஜய்க்கும் மிகப் பெரிய சவாலாக உருவெடுக்கும் என்று தவெக உயர்மட்டம் கருதுவதாகக் கூறப்படுகிறது. மேலும், தமிழகத்தில் கனிமொழி தலைமைப் பொறுப்பிற்கு வந்தால், பெண் என்ற ரீதியிலும், முதிர்ச்சியான அணுகுமுறையின் மூலமாகவும், தவெகவிற்குச் சென்ற பெண் வாக்காளர்களின் ஆதரவை அதிக அளவில் திமுக பக்கம் ஈர்க்கக்கூடிய வாய்ப்புகள் அதிகம் உள்ளன.
பெண் வாக்காளர்கள் - விஜய் போடும் பிளான்
தவெகவிற்கு அதிகம் செல்வது பெண் வாக்குகள்தான். கனிமொழி வந்தால் அந்த பெண் வாக்குகள் அப்படியே திமுக பக்கம் செல்லும். விஜய் தமிழ்நாட்டில் பெண்கள் வாக்குகளை இழக்க நேரிடும்.
இந்தச் சூழலில்தான், உதயநிதி ஸ்டாலினை திமுகவின் தவிர்க்க முடியாத தலைவராகவும், தவெக அரசிற்கு முதன்மை எதிரியாகவும் பிம்பத்தைக் கட்டமைக்கும் வியூகம் வகுக்கப்பட்டதாக அரசியல் வட்டாரங்கள் தெரிவிக்கின்றன. உதயநிதி கைது செய்யப்படும்போது, அவர் மீதான அனுதாப அலையும், தொண்டர்கள் மத்தியிலான அவரது பிம்பமும் கணிசமாக அதிகரிக்கும். கைது நடவடிக்கை மூலம் அவரை ஒரு அரசியல் தியாகியாகவும், அரசின் நேரடி எதிரியாகவும் முன்னிறுத்துவது, கட்சியின் பிற தலைவர்களின் செல்வாக்கை இயல்பாகவே கட்டுப்படுத்தும் என்று கணிக்கப்படுகிறது. இதை விஜய் எளிதாக பயன்படுத்திக்கொள்ள முடியும்.
உதயநிதி ஸ்டாலினின் பிம்பம்
தஞ்சாவூர் நகருக்குள் 20,000-க்கும் மேற்பட்ட திமுக தொண்டர்கள் திரண்டதால் சட்டம் - ஒழுங்கு பிரச்னையைக் கருத்தில் கொண்டு செங்கிப்பட்டியிலேயே விசாரணை நடத்தப்பட்டதும், இந்த நாடகத்தின் மூலம் உதயநிதி ஸ்டாலினின் பிம்பம் பெருமளவில் வலுப்பெற்றுள்ளதும் கவனிக்கத்தக்கது. அதிகாரப்பூர்வமாகப் பெண் வன்கொடுமைத் தடுப்புச் சட்டத்தின் கீழ் வழக்கு தொடரப்பட்டாலும், இதன் பின்னணியில் இயங்குவது திமுகவின் எதிர்காலத் தலைமை மற்றும் பெண் வாக்காளர்களைக் தக்கவைக்கும் தவெகவின் நுட்பமான அரசியல் வியூகமே என்று அரசியல் பார்வையாளர்கள் சுட்டிக்காட்டுகின்றனர்.
Click it and Unblock the Notifications
Sign in with Google
