வங்கி கணக்கில் விவசாயிகளுக்கு பணம்.. யாருக்கெல்லாம் ஊக்கத்தொகை கிடைக்கும்? இந்த ஆவணங்கள் போதுமே
சென்னை: தமிழகத்தில் கரும்பு விவசாயிகளுக்கு ஒரு டன்னுக்கு ரூ.709.50 சிறப்பு ஊக்கத்தொகை வழங்கப்பட உள்ளது. இதற்காக ரூ.603.34 கோடியை ஒதுக்கி தமிழக அரசு அரசாணை வெளியிட்டுள்ளது. இதன் மூலம் தகுதியுள்ள விவசாயிகளுக்கு ஒரு டன் கரும்புக்கு மொத்தம் ரூ.4,000 கிடைக்கும்.. இதையடுத்து, எந்த விவசாயிகளுக்கு இந்தப் பணம் கிடைக்கும், யாருக்கு கிடைக்காது, பணம் வங்கிக் கணக்கில் வருவதற்கு என்ன செய்ய வேண்டும், என்னென்ன ஆவணங்கள் தேவை என்ற கேள்விகள் எழுந்துள்ளன.. அதைப் பற்றி பார்ப்போம்.
விவசாயிகளுக்கு ஊக்கத்தொகை தொடர்பாக வேளாண்மை மற்றும் உழவர் நலத்துறை சார்பில் 2026 அக்டோபர் 8-ம் தேதி செய்திக்குறிப்பு வெளியிடப்பட்டுள்ளது.
அதில், 2025-2026-ம் ஆண்டு அரவைப் பருவத்தில் சர்க்கரை ஆலைகளுக்குப் பதிவு செய்து கரும்பு வழங்கிய விவசாயிகளுக்கு ஊக்கத்தொகை வழங்குவதற்கான விவரங்கள் தெரிவிக்கப்பட்டுள்ளன.
யாருக்கெல்லாம் கிடைக்கும்? கிடைக்காது?
2025 அக்டோபர் 1 முதல் 2026 செப்டம்பர் 30 வரை, சர்க்கரை ஆலைகளுக்குப் பதிவு செய்து கரும்பு வழங்கிய விவசாயிகளுக்கு இந்த ஊக்கத்தொகை வழங்கப்படும். தமிழகத்தில் உள்ள 12 கூட்டுறவு, 2 பொதுத்துறை, 15 தனியார் சர்க்கரை ஆலைகள் என மொத்தம் 29 ஆலைகளுக்குக் கரும்பு வழங்கிய சுமார் 90,000 விவசாயிகள் இதன் மூலம் பயனடைவார்கள்.
சர்க்கரை ஆலைகளில் பதிவு செய்யாமல் கரும்பு வழங்கியவர்களுக்கும், இடைத்தரகர்கள் மூலம் கரும்பை விற்பனை செய்தவர்களுக்கும் இந்த ஊக்கத்தொகை கிடைக்காது என்று தெரிவிக்கப்பட்டுள்ளது. அதாவது, அரசு குறிப்பிட்டுள்ள காலத்தில் சர்க்கரை ஆலைகளுக்குப் பதிவு செய்து கரும்பு வழங்கிய விவசாயிகள்தான் இந்தத் தொகையைப் பெறத் தகுதியானவர்கள்.
ஊக்கத்தொகை எப்படிக் கிடைக்கும்?
இந்த ஊக்கத்தொகையை வழங்குவதற்காக, 2025 அக்டோபர் 1 முதல் 2026 செப்டம்பர் 30 வரை சர்க்கரை ஆலைகளுக்குக் கரும்பு வழங்கிய விவசாயிகளின் கரும்பு எடை, ஆதார் எண், வங்கிக் கணக்கு விவரங்கள் சேகரிக்கப்பட்டுள்ளன.
இந்த விவரங்கள் மாவட்ட ஆட்சியர் தலைமையிலான மாவட்ட அளவிலான குழுவால் பரிந்துரைக்கப்பட்டு, சர்க்கரைத்துறை இயக்குநரகத்தால் ஆய்வு செய்யப்படும். அதன் பிறகு தகுதியுள்ள விவசாயிகளுக்கு ஊக்கத்தொகை வழங்கப்படும்.
விவசாயிகள் செய்ய வேண்டியது
இந்த ஊக்கத்தொகையைப் பெறுவதற்காக விவசாயிகள் புதிதாக விண்ணப்பிக்க வேண்டும் என்று இதுவரை வெளியான தகவல்களில் குறிப்பிடப்படவில்லை... சர்க்கரை ஆலைகளே ஒவ்வொரு விவசாயியும் வழங்கிய கரும்பின் அளவு, ஆதார் எண், வங்கிக் கணக்கு விவரங்களைச் சமர்ப்பிக்க வேண்டும் என்று அறிவுறுத்தப்பட்டுள்ளன.
அதனால் கரும்பு வழங்கிய விவசாயிகள் தங்களுடைய விவரங்கள் சர்க்கரை ஆலையில் சரியாகப் பதிவு செய்யப்பட்டுள்ளதா என்பதை உறுதிப்படுத்திக் கொள்வது நல்லது.. ஆதார் எண்ணுடன் இணைக்கப்பட்ட வங்கிக் கணக்கு விவரங்களும் சரியாக உள்ளதா என்பதைச் சரிபார்த்துக் கொள்ளலாம். விவரங்களில் ஏதேனும் தவறு இருந்தால், சம்பந்தப்பட்ட சர்க்கரை ஆலையின் கரும்புப் பிரிவைத் தொடர்புகொண்டு சரிசெய்வது அவசியம்.
என்னென்ன ஆவணங்கள்?
அரசு வெளியிட்டுள்ள தகவலின்படி, விவசாயிகள் வழங்கிய கரும்பின் எடை, ஆதார் எண், வங்கிக் கணக்கு விவரங்கள் ஆகியவை சேகரிக்கப்பட்டுள்ளன. ஆனால், விவசாயிகள் தனியாகச் சமர்ப்பிக்க வேண்டிய ஆவணங்களின் முழுமையான பட்டியல் இதுவரை வெளியிடப்பட்ட தகவல்களில் குறிப்பிடப்படவில்லை.
அதனால் ஆதார் அட்டை, வங்கிக் கணக்குப் புத்தகம் போன்றவற்றைத் தயாராக வைத்துக்கொண்டு, சம்பந்தப்பட்ட சர்க்கரை ஆலையில் என்னென்ன விவரங்கள் தேவை என்பதை உறுதிப்படுத்திக் கொள்வது நல்லது. இவற்றைச் சமர்ப்பிப்பது கட்டாயம் என்று தனிப்பட்ட உத்தரவு வெளியாகியுள்ளதாகக் கூற முடியாது.
வங்கிக் கணக்கில் எப்போது பணம் வரும்?
தகுதியுள்ள விவசாயிகளின் ஆதார் எண்ணுடன் இணைக்கப்பட்ட வங்கிக் கணக்கில் நேரடியாக ஊக்கத்தொகை செலுத்தப்பட உள்ளது. விவசாயிகளின் விவரங்கள் கரும்பு உதவியாளர்கள், கரும்பு அலுவலர்கள் மற்றும் மாவட்ட ஆட்சியர் தலைமையிலான குழுக்கள் மூலம் சரிபார்க்கப்படும். சர்க்கரைத்துறை இயக்குநரகமும் விவரங்களை ஆய்வு செய்த பிறகு தகுதியானவர்களுக்குப் பணம் வழங்கப்படும்.
தீபாவளிப் பண்டிகை முதல் ஊக்கத்தொகை வழங்கும் பணி தொடங்கும் என்று அரசு தெரிவித்துள்ளது. எனவே, கரும்பு வழங்கிய விவசாயிகள் தங்களுடைய பதிவு மற்றும் வங்கிக் கணக்கு விவரங்களைச் சரிபார்த்துக் கொள்வது முக்கியம்..!!
Click it and Unblock the Notifications
Sign in with Google
