இயக்குனர் பாரதிராஜா காலமானார்.. இமயம் சரிந்தது.. திரையுலகம் கண்ணீர்!

சென்னை: இயக்குனர் பாரதிராஜா இன்று காலமானார். அவருக்கு வயது 84. உடல்நலக்குறைவு காரணமாக நீலாங்கரை இல்லத்திலேயே சிகிச்சை பெற்று வந்த பாரதிராஜா சிகிச்சை பலனின்றி இன்று உயிரிழந்தார். தமிழ் திரையுலகின் முடிசூடா மன்னனாகவும், கிராமியக் கதைகளின் இமயமாகவும் போற்றப்படும் மூத்த இயக்குனர் பாரதிராஜா மறைவு தமிழ் திரையுலகை அதிர்ச்சியில் ஆழ்த்தியுள்ளது. பலரும் அவரது மறைவுக்கு இரங்கல் தெரிவித்து வருகின்றனர்.

முன்னதாக அவர் ஒரு மாதத்திற்கும் மேலாக மருத்துவமனையில் அனுமதிக்கப்பட்டு தீவிர சிகிச்சை பெற்று வந்தார். பின்னர் வீடு திரும்பிய அவருக்கு உடல்நலக்குறைவு ஏற்பட்டது. இதையடுத்து நீலாங்கரையில் உள்ள இல்லத்தில் தீவிர மருத்துவக் கண்காணிப்பில் வைக்கப்பட்டு, அவருக்குத் தேவையான சிகிச்சைகள் அனைத்தும் அவரது இல்லத்திலேயே வழங்கப்பட்டு வந்தது. இன்று அதிகாலையிலேயே அவர் உயிரிழந்ததாக தகவல்கள் பரவிய நிலையில் இது வதந்தி என அவரது உறவினர் மனோஜ் கூறியிருந்தார்.

இயக்குனர் இமயம் பாரதிராஜா

'16 வயதினிலே' திரைப்படத்தின் மூலம் தமிழ் சினிமாவில் இயக்குநராக அறிமுகமானவர் பாரதிராஜா. 1941 ஆம் ஆண்டு தேனி மாவட்டத்தில் உள்ள அல்லிநகரம் கிராமத்தில் பிறந்தார். இவரது இயற்பெயர் சின்னசாமி. கன்னடத் திரைப்பட இயக்குனர் புட்டண்ணா கனகலிடம் உதவியாளராக சேர்ந்து சினிமா நுணுக்கங்களை கற்றார். 40-க்கும் மேற்பட்ட படங்களை இயக்கியுள்ளார். சாதி ஒழிப்பை தனது படங்களில் வைத்து இருந்தார். மத்திய அரசின் பத்மஸ்ரீ விருதை பெற்றவர்.

முதல் மரியாதை, வேதம் புதிது, உள்ளிட்ட 6 திரைப்படங்களுக்காக தேசிய விருதை வென்று இருக்கிறார். தமிழ் சினிமாவின் போக்கையே மாற்றிய மாபெரும் இயக்குநர் என போற்றப்படும் இவர் இயக்குனர் இமயம் என அழைக்கப்பட்டார்.

தனது முதல் படத்திலேயே ரஜினிகாந்த், கமல்ஹாசன், ஸ்ரீதேவி உள்ளிட்ட முன்னணி நட்சத்திரங்களை இயக்கி கவனம் பெற்றார். அதனைத் தொடர்ந்து ஏராளமான வெற்றிப் படங்களை இயக்கிய அவர், ராதிகா, ராதா, கார்த்திக் உள்ளிட்ட பல முன்னணி நடிகர், நடிகைகளை தமிழ் திரையுலகிற்கு அறிமுகப்படுத்திய பெருமைக்குரியவர். 'முதல் மரியாதை', 'கிழக்கே போகும் ரெயில்', 'அலைகள் ஓய்வதில்லை' உள்ளிட்ட பல படங்கள் அவரது இயக்கத்தில் பெரும் வரவேற்பைப் பெற்றன.

இயக்குநராக மட்டுமல்லாமல் நடிகராகவும் பல படங்களில் தனித்துவமான கதாபாத்திரங்களில் நடித்துள்ளார். சமீபத்தில் வெளியான 'திருச்சிற்றம்பலம்' திரைப்படத்தில் நடிகர் தனுஷின் தாத்தா வேடத்தில் நடித்திருந்தார். தொடர்ந்து பல திரைப்படங்களில் குணச்சித்திர வேடங்களிலும் தோன்றினார்.

மகன் மனோஜ் உயிரிழப்பால் வேதனை

இதற்கிடையில், அவரது ஒரே மகனும் நடிகர், இயக்குநருமான மனோஜ் பாரதிராஜாவின் மறைவு அவரை மிகுந்த மனவேதனைக்குள்ளாக்கியது. அந்த இழப்பிலிருந்து முழுமையாக மீள முடியாமல் இருந்த நிலையில், அவரது உடல்நலமும் பாதிக்கப்பட்டதாக கூறப்படுகிறது. இதையடுத்து மருத்துவமனையில் சிகிச்சை பெற்று வந்தார்.

பின்னர் மீண்டும் உடல்நலக்குறைவு ஏற்பட்டதால் மருத்துவமனையில் அனுமதிக்கப்பட்டு சிகிச்சை அளிக்கப்பட்டது. அப்போது நடிகை ராதிகா உள்ளிட்ட திரைப்பிரபலங்கள் நேரில் சென்று நலம் விசாரித்தனர்.

பாரதிராஜா காலமானார்

இந்த நிலையில், மீண்டும் உடல்நல பாதிப்பு ஏற்பட்டதால் நீலாங்கரையில் உள்ள அவரது இல்லத்தில் சிகிச்சை பெற்று வந்த பாரதிராஜா (84), சிகிச்சை பலனின்றி இன்று உயிரிழந்தார். அவரது மறைவு தமிழ் திரையுலகில் பெரும் சோகத்தை ஏற்படுத்தியுள்ளது. நீலாங்கரையில் உள்ள அவரது இல்லத்தில் திரைப்பிரபலங்கள் அஞ்சலி செலுத்தி வருகின்றனர்.

English summary

Bharathiraja Death has shocked the Tamil film industry. The legendary filmmaker, known for introducing several stars and directing iconic movies, passed away at the age of 84 after battling prolonged health issues. Film personalities have been expressing their condolences.