அரசு ஊழியர் தம்பதி வீட்டில் ₹1 கோடி ரொக்கம்.. ஏராளமான தங்கம்! பல கோடி சொத்து சிக்கியது எப்படி?
டெல்லி: அரசுப் பதவிகளையும், அதிகாரத்தையும் தங்களுக்குச் சாதகமாகப் பயன்படுத்தி ஏராளமான சொத்து சேர்த்த உயர் அதிகாரி தம்பதி பீகாரில் சிக்கியுள்ளனர். "பல நாள் திருடன் ஒரு நாள் அகப்படுவான்" என்ற பழமொழிக்கு ஏற்ப, நீண்ட நாட்களாக அரசு வேலையைத் தவறாகப் பயன்படுத்திச் சேர்த்த கோடிக்கணக்கான சொத்துக்கள் தற்போது சிக்கியுள்ளன. லஞ்ச ஒழிப்புத் துறை அதிகாரிகள் நடத்திய அதிரடிச் சோதனையில், சுமார் ₹1 கோடி ரூபாய் ரொக்கம், ஏராளமான தங்க நகைகள், சொகுசு கடிகாரங்கள் மற்றும் பல கோடி மதிப்பிலான சொத்துப் பத்திரங்கள் பறிமுதல் செய்யப்பட்டுள்ளன.
யார் இந்த அதிகாரி தம்பதி?
பாட்னாவின் கூடுதல் மாவட்ட ஆட்சியர் ரவீந்திர குமார் திவாகர் மற்றும் தானாபூர் பகுதியின் மாவட்ட துணைப் பதிவாளர் குமாரி ஸ்வீட்டி ஆகிய இருவரும் தம்பதியர் ஆவர். இவர்கள் தங்களது அதிகாரத்தைத் தவறாகப் பயன்படுத்தி, முறைகேடான வழிகளில் பல கோடிகளில் சொத்துக்களைக் குவித்துள்ளதாகக் குற்றச்சாட்டுகள் எழுந்தன. இது குறித்து லஞ்ச ஒழிப்புத் துறைக்கு தொடர் புகார்கள் வந்தன.
அதிரடி சோதனை நடந்தது எங்கே?
புகார்களின் அடிப்படையில், பீகார் மாநிலத்தின் தலைநகரான பாட்னா மற்றும் அவர்களின் சொந்த ஊரான பேகுசராய் ஆகிய இடங்களில் ஒரே நேரத்தில் சோதனை நடந்தது. பாட்னாவில் உள்ள இவர்களது சொகுசு இல்லம் மற்றும் பேகுசராயில் உள்ள பூர்வீக வீடு ஆகிய இரண்டு இடங்களிலும், லஞ்ச ஒழிப்புப் பிரிவின் தனிப்படைகள் ஒரே நேரத்தில் அதிரடியாகப் புகுந்து சோதனையில் ஈடுபட்டன. இவர்கள் மூத்த அரசு அதிகாரிகள் என்பதால், லஞ்ச ஒழிப்புத் துறை டி.ஐ.ஜி (DIG) தலைமையில், டி.எஸ்.பி-க்களின் (DSP) நேரடி மேற்பார்வையில் இந்த ரெய்டு நடைபெற்றது.
மலைபோலக் குவிந்த பணம்!
திங்கட்கிழமை அதிகாலையிலேயே வீடுகளின் கதவுகளைத் தட்டிய லஞ்ச ஒழிப்புப் படை அதிகாரிகள் சோதனையிடச் சென்றபோது, அதிகாரிகளே தலைசுற்றும் அளவிற்கு கட்டுக்கட்டாகப் பணமும், தங்க நகைகளும் குவிந்து கிடந்தன. மலை போல் குவிந்து கிடந்த பணத்தைப் பார்த்த அதிகாரிகள், கையால் எண்ண முடியாமல் பரிதவித்தனர். இதையடுத்து, பணம் எண்ணும் இயந்திரங்கள் (Cash Counting Machines) வரவழைக்கப்பட்டன. அதேபோல், அங்கிருந்த தங்க நகைகள் மற்றும் சொத்துப் பத்திரங்களையும் அதிகாரிகள் தீவிரமாகச் சரிபார்த்தனர்.
பறிமுதல் செய்யப்பட்ட சொத்து விவரங்கள்:
இதுவரை கிடைத்துள்ள தகவலின்படி:
பாட்னா வீட்டில் ₹70 லட்சம் ரொக்கம் மற்றும் ₹6 லட்சம் மதிப்பிலான 48 சொகுசு கடிகாரங்கள் பறிமுதல் செய்யப்பட்டன.
பேகுசராய் வீட்டில் ₹9 லட்சம் ரொக்கம், அத்துடன் ஏராளமான தங்கம் மற்றும் வெள்ளி நகைகள் மீட்கப்பட்டன.
மொத்த ரொக்கம் இரு இடங்களிலும் சேர்த்து ஒட்டுமொத்தமாக ₹1 கோடிக்கும் அதிகமான ரொக்கம், கோடிக்கணக்கிலான தங்க நகைகள் மற்றும் ஆடம்பரப் பொருட்கள் பறிமுதல் செய்யப்பட்டுள்ளன.
வாங்கிய சொத்துக்கள்:
பாட்னாவில் இத்தம்பதியரின் பெயரில் ₹1.07 கோடி மதிப்பிலான 2 ஆடம்பர அடுக்குமாடி குடியிருப்புகள் (Flats) வாங்கப்பட்டிருப்பதை லஞ்ச ஒழிப்பு போலீசார் கண்டுபிடித்தனர். அதேபோல், கூடுதல் ஆட்சியர் தனது மனைவி மற்றும் தந்தையின் பெயர்களில் பாட்னாவில் ₹1.28 கோடி மதிப்பிலான 3 மனைப்பிரிவுகளை (Plots) வாங்கியதும் தெரியவந்தது. இரு இடங்களிலும் சேர்த்து ஏராளமான நிலம் மற்றும் முதலீடுகள் தொடர்பான பத்திரங்கள் கைப்பற்றப்பட்டுள்ளன.
அடுத்தகட்ட நடவடிக்கை என்ன?
பறிமுதல் செய்யப்பட்ட ரொக்கப் பணம், தங்க நகைகள் மற்றும் சொத்துப் பத்திரங்களை லஞ்ச ஒழிப்புத் துறை அதிகாரிகள் இறுதி மதிப்பீடு செய்து வருகின்றனர். முழுமையான சொத்து விவரங்கள் கணக்கிடப்பட்ட பிறகு, அவர்களின் அதிகாரப்பூர்வ சம்பள விவரம் ஆய்வு செய்யப்படும்.
வருமானத்திற்கு அதிகமாகச் சொத்து சேர்க்கப்பட்டது உறுதியான பின்னர், அவர்கள் மீது அதிகாரப்பூர்வ வழக்கு பதிவு செய்யப்படும். மேலும், சட்டவிரோதப் பணப்பரிவர்த்தனைக்காக (Money Laundering) அமலாக்கத்துறையும் தனியாக வழக்குத் தொடரும் வாய்ப்புள்ளது. இதில் இந்த உயர் அதிகாரி தம்பதி தப்புவது கடினம் என்பதால், அவர்கள் கைது செய்யப்படுவது உறுதி என்றே அதிகாரிகள் தெரிவிக்கின்றனர்.
Click it and Unblock the Notifications
Sign in with Google
