“விடியலுக்கு இதுதான் அர்த்தமா?.. புரிஞ்சு போச்சு..” லண்டனில் இருந்தபடி உதயநிதியை சீண்டிய அண்ணாமலை!
சென்னை: உதயநிதி ஸ்டாலின், தமிழ்நாட்டின் துணை முதலமைச்சராகி உள்ள நிலையில், திமுகவில் வாரிசு அரசியல் நிலவுவதாக விமர்சித்து எக்ஸ் தளத்தில் பதிவிட்டுள்ளார் பாஜக மாநிலத் தலைவர் அண்ணாமலை. "விடியல்" என்ற வார்த்தையின் அர்த்தம் என்ன என்பதை மக்கள் இப்போது புரிந்துகொண்டுள்ளனர். அவர்களுக்கு விடியல், அவர்களின் குடும்பத்திற்கு விடியல் எனத் தெரிவித்துள்ளார் அண்ணாமலை.
தமிழக இளைஞர் நலன் மற்றும் விளையாட்டு மேம்பாட்டுத்துறை அமைச்சர் உதயநிதி ஸ்டாலின், தமிழ்நாட்டின் துணை முதலமைச்சராக நியமிக்கப்பட்டுள்ளார். துணை முதல்வராக அமைச்சர் உதயநிதி ஸ்டாலின் பொறுப்பேற்ற நிலையில், திமுக மற்றும் கூட்டணி கட்சி தலைவர்கள் பலரும் வாழ்த்து தெரிவித்து வருகின்றனர். திரை பிரபலங்கள் பலரும் துணை முதல்வர் உதயநிதி ஸ்டாலினுக்கு வாழ்த்து தெரிவித்துள்ளனர்.
கோபாலபுர வாரிசுகளுக்கு மட்டுமே தலைமைப் பதவி: அதேசமயம், பாஜக இந்த செயல்பாட்டை கடுமையாக விமர்சித்துள்ளது. அரசியலில் சேர்ந்து மக்களுக்கு சேவை செய்ய வேண்டும் என்ற எண்ணம் கொண்ட இளைஞர்கள் திமுகவில் இணைந்தால் அவர்கள் இறுதி வரை தொண்டர்களாக மட்டுமே இருக்க முடியும் என்பதற்கு சிறந்த உதாரணமே
உதயநிதி ஸ்டாலினின் இந்த பதவி உயர்வு காட்டுகிறது என தமிழக பாஜகவின் அதிகாரப்பூர்வ சமூக வலைதள பக்கத்தில் விமர்சித்துள்ளனர்.
கோபாலபுரத்தின் வாரிசாக இருப்பது ஒன்றே திமுக கட்சியில் தலைமைக்கு வரவும், ஆட்சி செய்யவும் ஒரே தகுதி. பரம்பரை பரம்பரையாக கட்சிக்கு உழைத்த தொண்டர்களுக்கு சிறை தண்டனையும் வழக்குகளும், ஆனால் அரசியல் அனுபவமற்ற கோபாலபுர வாரிசுகளுக்கு பதவியும் அதிகாரமும் என தமிழக பாஜக விமர்சித்துள்ளது.
அண்ணாமலை கடும் விமர்சனம்: இந்நிலையில், தமிழக பாஜக தலைவர் அண்ணாமலையும் உதயநிதி ஸ்டாலின் துணை முதலமைச்சராகி உள்ளதை விமர்சித்துள்ளார். மேற்படிப்புக்காக லண்டன் சென்றுள்ள அண்ணாமலை, எக்ஸ் தளத்தில், திமுகவில் வாரிசு அரசியல் இருப்பதை விமர்சிக்கும் வகையில் இரு கேலிச்சித்திரத்தை பதிவிட்டு விமர்சித்துள்ளார். அதில் கருணாநிதி குடும்பம் தொடங்கி, ஆற்காடு வீராசாமி, கே.என்.நேரு, பொன்முடி வரை பலரையும் குறிப்பிட்டுள்ளனர்.
விடியல் யாருக்கு?: அண்ணாமலை வெளியிட்டுள்ள அந்தப் பதிவில், "சலுகை பெற்ற சிலருக்கு மட்டுமே சூரியன் பிரகாசிக்கிறது. கடந்த 40 மாதங்களாக தமிழ்நாட்டின் மற்ற அனைவருக்கும் கிரகணம் தான். "விடியல்" என்ற வார்த்தையின் அர்த்தம் என்ன என்பதை மக்கள் இப்போது புரிந்துகொண்டுள்ளனர். அவர்களுக்கு விடியல், அவர்களின் குடும்பத்திற்கு விடியல் மற்றும் அந்த தலைவர்களுக்கான விடியல்." எனத் தெரிவித்துள்ளார்.
பாஜக விமர்சனம்: பிரதமர் மோடி, உள்துறை அமைச்சர் அமித் ஷா, பாஜக தேசிய தலைவர் ஜேபி நட்டா உள்ளிட்ட பாஜக தலைவர்கள் பலரும் குடும்ப அரசியலை கடுமையாக விமர்சித்துப் பேசி வருகின்றனர். செல்லும் இடங்களில் எல்லாம், காங்கிரஸ், திமுக உள்ளிட்ட 'இந்தியா' கூட்டணி கட்சிகளின் வாரிசு அரசியலை விமர்சிப்பதே பாஜக தலைவர்களின் வழக்கமாக உள்ளது.
நாடாளுமன்றத் தேர்தலின்போது ஜேபி நட்டா கூட, DMK-வில் இருக்கும் D என்பதே Dynasty Politics (வாரிசு அரசியல்) எனப் பேசினார். பிரதமர் மோடி, தான் செல்லும் இடங்களில் எல்லாம், திமுகவில் குடும்ப அரசியல் நிலவுவதாக விமர்சித்தார். பாஜக மாநிலத் தலைவர் அண்ணாமலையும், திமுக வாரிசு அரசியல் செய்வதாக பல இடங்களில் விமர்சித்துள்ளார்.
Click it and Unblock the Notifications
Sign in with Google