கோவையில் தொடரும் வன்முறை.. சட்டசபையில் பேசவிடவில்லை.. வானதி சீனிவாசன் குற்றச்சாட்டு

சென்னை: கோவையில் கார் குண்டு வெடிப்பு நிகழ்ந்த நிலையில் அதை ஒரு விபத்து என்று மாநில அரசு கூறி வருவதாக கோவை தெற்கு தொகுதி பாஜக எம்எல்ஏ வானதி சீனிவாசன் கூறியுள்ளார். கவனஈர்ப்பு தீர்மானம் கொண்டு வந்தும் தங்களை பேச விடாமல் தடுப்பதாக கூறிய வானதி சீனிவாசன் பாஜக எம்எல்ஏக்கள் அனைவரும் வெளிநடப்பு செய்வதாக கூறினார்.

சட்டசபையில் இருந்து பாஜக எம்எல்ஏக்கள் வெளிநடப்பு செய்த பின்னர் செய்தியாளர்களிடம் பேசிய வானதி சீனிவாசன், கோவையில் நிகழ்ந்த கார் குண்டு வெடிப்பு திட்டமிட்ட சதி செயல். இதில் ஐஎஸ்ஐஎஸ் தீவிரவாத இயக்கத்தினர் ஈடுபட்டுள்ளனர் என்று தேசிய புலனாய்வு முகமை தங்களின் குற்றப்பத்திரிக்கையில் குறிப்பிட்டுள்ளனர்.

கோவை கார் குண்டு வெடிப்பு வழக்கு என்ஐஏவிற்கு மாற்றப்பட்டு தீவிரவாத தொடர்புகள் எல்லாம் அம்பலப்படுத்தப்பட்டு வருகிறது. கோவையில் வன்முறைகள் தொடர்ந்து கொண்டிருக்கின்றன. கோவை இன்னும் கூட மத அடிப்படைவாதிகள் தீவிரவாதிகள் செயல்பாட்டிலேயே இருக்கின்ற காரணத்தினால் இம்மாதிரியான செயல்பாடுகள் கோவை மக்களின் அமைதியை பாதுகாப்பை பாதிக்கும் என நம்புகிறோம். இந்த விசயத்தில் அரசு மிகுந்த கவனத்தோடும் எச்சரிக்கை உணர்வோடும் இருக்கவேண்டும்.

எப்படி நீங்கள் ஒருபுறம் இஸ்லாமிய வாக்கு வங்கிக்காக நீங்கள் அரசியல் செய்கிறீர்களோ நாங்கள் பாதிக்கப்பட்ட இந்துக்களுக்காக அவர்களின் குரலை பதிவு செய்ய விரும்பி கவன ஈர்ப்பு தீர்மானத்தை கொண்டு வந்தோம். வழக்கம் போல பேரவைத்தலைவர் அவர்கள் எங்களை பேச அனுமதிக்கவில்லை. அமைச்சர்களுக்கு பதிலாக சபாநாயகர் அப்பாவு பதில் அளிப்பதாகவும் வானதி சீனிவாசன் தெரிவித்தார்.

English summary

Coimbatore South Constituency BJP MLA Vanathi Srinivasan has said that the state government is claiming that the car bomb blast in Coimbatore was an accident. Vanathi Srinivasan said that all the BJP MLAs are walking out even after bringing the attention resolution.