கார்த்தி சிதம்பரம்-அண்ணாமலை திடீர் செல்பி.. எதிரெதிர் துருவங்கள் சந்தித்ததன் பின்னணி தெரியுமா?

Updated: Thursday, September 1, 2022, 21:26 [IST]

Subscribe to Oneindia Tamil

சென்னை: காங்கிரஸ் கட்சியின் மூத்த தலைவரான ப சிதம்பரத்தின் மகனும் சிவகங்கை எம்பியுமான கார்த்தி சிதம்பரம், பாஜக மாநில தலைவர் அண்ணாமலை ஆகியோர் திடீரென்று சேர்ந்து எடுத்த செல்பி போட்டோ வெளியாகி பரபரப்பை ஏற்படுத்தியுள்ளது.

தேசிய அரசியல் முதல் மாநில அரசியல் வரை எதிரெதிர் கட்சியாக பாஜக, காங்கிரஸ் கட்சிகள் செயல்பட்டு வருகின்றன. இருப்பினும் சில வேளைகளில் கட்சி பாகுபாட்டை மறந்து இருகட்சி தலைவர்களும் சந்தித்து கொள்ளும் நிகழ்வுகள் நடக்கும்.

குறிப்பாக அடிக்கடி பொது நிகழ்ச்சிகளில் இரு கட்சிகளின் தலைவர்கள் சந்தித்து கொள்ளும் படங்கள் வெளியாகி இணையதளத்தில் விவாதத்துக்கு உள்ளாகும்.

அண்ணாமலை-கார்த்தி சிதம்பரம் செல்பி

அந்த வகையில் தான் தற்போது இணையதளத்தில் ஒரு படம் வெளியாகி உள்ளது. தமிழக பாஜக தலைவர் அண்ணாமலை, காங்கிரஸ் கட்சியின் எம்பியான கார்த்தி சிதம்பரம் ஆகியோர் சேர்ந்து எடுத்து கொண்ட செல்பி போட்டோ இணையதளத்தில் வேகமாக பரவி வருகிறது. பாஜக மாநில தலைவர் அண்ணாமலை செல்போனில் செல்பி எடுக்க கார்த்தி சிதம்பரம் எம்பி, திருப்பத்தூர் மாவட்ட காங்கிரஸ் தலைவர் பிரபு ஆகியோர் போட்டோவில் உள்ளனர்.

வெளியானது எப்படி?

இந்த போட்டோவை திருப்பத்தூர் மாவட்ட காங்கிரஸ் தலைவர் பிரபு தனது டுவிட்டர் பக்கத்தில் வெளியிட்டுள்ளார். அதில், ‛‛இருதுருவங்களுடன் கோவை விமான பயணம்'' என பதிவிட்டுள்ளார். இதன்மூலம் தான் அண்ணாமலை-கார்த்தி சிதம்பரம் ஆகியோர் சந்தித்து செல்பி எடுத்த படம் வெளியாகி உள்ளது.

கார்த்தி சிதம்பரம் பதில்

இந்த போட்டோவுக்கு கார்த்தி சிதம்பரம் டுவிட்டர் மூலமாக பதிலளித்துள்ளார். அதில், ‛‛பிரபு நீங்கள் ட்ரோலுக்கு தயாராகிவிட்டீர்கள். பிரபு என்பவர் காங்கிரஸ் கட்சியின் மாவட்ட தலைவர் தான். எனவே பிற யோசனைகள் செய்ய வேண்டாம்'' என கூறியுள்ளார். இந்த படத்துக்கு தற்போது பலர் கருத்துகளை தெரிவித்து வருகின்றனர். இந்த படம் கலவையான விமர்சனங்களை பெற்று வருகிறது.

பதிலின் உள்அர்த்தம்

தற்போதைய சூழலில் காங்கிரஸ் தலைவர்கள் அடிக்கடி பாஜகவில் இணைந்து வருகின்றனர். அந்த அடிப்படையில் இதுபற்றியும் சிலர் சிந்தித்து கருத்து தெரிவிக்க வாய்ப்புள்ளது. இதனை தவிர்க்கும் நோக்கத்தில் தான் கார்த்தி சிதம்பரம் ‛வேறு யோசனைகள் வேண்டாம்' என குறிப்பிட்டுள்ளார்.