"நாங்கதான் பெரிய கட்சி".. பாஜகவிடம் கெத்து காட்டும் தமாகா?.. ஜி.கே.வாசன் கேட்கும் தொகுதிகள் எத்தனை?

சென்னை: பாஜக- தமிழ் மாநில காங்கிரஸ் கட்சி இடையே தொகுதி பங்கீட்டு பேச்சுவார்த்தை முதற்கட்டமாக நடந்துள்ளது.

மூப்பனாரால் தமிழ் மாநில காங்கிரஸ் கட்சி தொடங்கப்பட்டு பின்னர் அவராலேயே காங்கிரஸுடன் ஐக்கியமாக்கப்பட்டது. இந்த நிலையில் அவருடைய மறைவுக்கு பிறகு கடந்த 2014 ஆம் ஆண்டு மீண்டும் தமிழ் மாநில காங்கிரஸ் கட்சியை ஜி.கே.வாசன் தொடங்கினார்.

அடுத்தடுத்த தேர்தல்களில் போட்டியிட்ட நிலையில் கடந்த 2019ஆம் ஆண்டு நடந்த நாடாளுமன்றத் தேர்தலில் அதிமுக, பாஜக கூட்டணியில் அங்கம் வகித்தது. அந்த தேர்தலில் தமாகா சார்பில் என்.ஆர். நடராஜன் போட்டியிட்டு தோல்வி அடைந்தார். இதையடுத்து ஜி.கே. வாசனுக்கு மாநிலங்களவை எம்பி பதவியை பாஜக கொடுத்தது.

அதிமுகவுடன் கூட்டணியா?: கடந்த 2021 ஆம் ஆண்டு நடந்த சட்டசபை தேர்தலில் தமாகா மீண்டும் அதிமுக கூட்டணியில் இணைந்தது. தற்போது 2024 ஆம் ஆண்டு தேர்தலில் தமாகா யாருடன் கூட்டணிக்கு செல்லும் என எதிர்பார்க்கப்பட்ட நிலையில் அதிமுகவுடன் பேச்சுவார்த்தை நடத்தப்பட்டதாக சொல்லப்பட்டது.

தமாகா பாஜக கூட்டணி: இந்த நிலையில் தமாகா பாஜக கூட்டணியில் இணைவதாக கட்சித் தலைவர் ஜி.கே.வாசன் தெரிவித்திருந்தார். கடந்த சில தினங்களுக்கு முன்பு பிரதமர் நரேந்திர மோடி கலந்து கொண்ட பாஜக பொதுக் கூட்டத்திலும் கூட்டணி கட்சி என்ற முறையில் ஜி.கே.வாசன் கலந்து கொண்டிருந்தார்.

ஜி.கே.வாசன் கட்சி: இந்த நிலையில் பாஜக- தமாகா இடையே முதல் கட்டமாக இன்றைய தினம் தொகுதி பங்கீட்டு பேச்சுவார்த்தை நடந்தது. ஜி.கே.வாசனின் ஆழ்வார்பேட்டை இல்லத்தில் மத்திய இணையமைச்சர் எல்.முருகன் தலைமையில் அமைக்கப்பட்ட 7 பேர் கொண்ட தேர்தல் குழு பேச்சுவார்த்தை நடத்தியது.

4+1 கேட்கிறதா தமாகா: இந்த பேச்சுவார்த்தையின் போது பாஜகவிடம் தமிழ் மாநில காங்கிரஸ் கட்சிக்கு 4 மக்களவைத் தொகுதிகளையும், ஒரு மாநிலங்களவை தொகுதியையும் கொடுக்க வேண்டும் என ஜி.கே. வாசன் கேட்டதாக தகவல்கள் வெளியாகியுள்ளன. இதில் சுமூகம் எட்டப்படவில்லை என்பதால் மார்ச் 4 ஆம் தேதி மீண்டும் ஒரு பேச்சுவார்த்தை நடத்தப்படுகிறது. அதிலாவது வாசனின் கோரிக்கை நிறைவேறுமா என தெரியவில்லை.

டெல்டா மாவட்டங்கள்: பாஜக கூட்டணியில் தற்போது இருக்கும் கட்சியில் பெரிய கட்சி என பார்த்தால் அது ஜி.கே.வாசனுடையதுதான். அக்கட்சிக்கு தமிழகம் முழுவதும் செல்வாக்கு இல்லாவிட்டாலும் டெல்டா மாவட்டங்களில் பட்டுக்கோட்டை, தஞ்சை, பேராவூரணி உள்ளிட்ட பகுதிகளில் செல்வாக்கு இருக்கிறது.

தாமரை சின்னமா சைக்கிள் சின்னமா: எல்லாவற்றுக்கும் மேல் மூப்பனார் கட்சி என்ற ஒரு பிராண்டும் இருக்கிறது. இதையெல்லாம் கருத்தில் கொண்டு பாஜக அக்கட்சிக்கு 4+1 இடங்களை ஒதுக்க நினைத்தால் ஒதுக்கலாம். மேலும் ஜி.கே. வாசன் சைக்கிள் சின்னத்தில் போட்டியிட விரும்புகிறார். ஆனால் பாஜகவோ அவரை தாமரை சின்னத்தில் போட்டியிட நிர்பந்திக்கலாம். இல்லாவிட்டால் 4 தொகுதிகளில் இரு தொகுதிகளில் தாமரை சின்னத்திலும் 2 தொகுதிகளில் சைக்கிள் சின்னத்திலும் போட்டியிட கட்டாயப்படுத்தலாம். அப்போதுதான் தாமரை சின்னத்தில் தமாகா வெல்லும் போது அதையும் கருத்தில் கொண்டு மாநிலங்களவை ஒதுக்கப்படும் என்றும் பாஜக அறிவுறுத்தலாம்.

அதிமுக கூட்டணி: அதே வேளையில் தேமுதிக, பாமக உள்ளிட்ட கட்சிகள் எல்லாம் அதிமுக கூட்டணியில் இணையாமல் தங்களுக்கு இத்தனை தொகுதிகளை வேண்டும் என கேட்டு பேச்சுவார்த்தை நடத்தி வருகின்றன. ஆனால் தொகுதிகளை பேசுவதற்கு முன்பே தங்கள் கட்சி பாஜக கூட்டணியில் இணைந்து செயல்படும் என அறிவித்துவிட்டு தற்போது ஜி.கே. வாசன் பேரம் பேசுவது ஏற்புடையதாக இல்லை என்றே தெரிகிறது. பேரம் பேசியும் பாஜக கொடுக்காவிட்டால் தமாகா அதிமுக கூட்டணி செல்லவும் முடியாது.

எத்தனை தொகுதிகள்: ஏற்கெனவே முக்கிய நிர்வாகியான அசோகன் தமாகாவிலிருந்து விலகிவிட்டார். இன்னும் சிலர் பாஜகவுடன் கூட்டணியால் அதிருப்தி என சொல்லப்படுகிறது. இதனால் கூட்டணி பேரம் முடிவதற்குள் எத்தனை பேர் அக்கட்சியிலிருந்து வெளியேறுவார்கள் என தெரியவில்லை. இதையெல்லாம் கருத்தில் கொண்டே பாஜக சொற்ப இடங்களை ஒதுக்கும் என அரசியல் ஆர்வலர்கள் தெரிவிக்கிறார்கள். எனவே 4+1 என்ற நிலையிலேயே தமாகா அடம் பிடிக்க போகிறதா இல்லை கிடைத்தவரை லாபம் என மாநிலங்களவை உறுப்பினர் பதவியுடன் கிடைக்கும் 1 அல்லது 2 மக்களவை தொகுதிகளை பெற்றுக் கொள்ளுமா என தெரியவில்லை.

English summary

First phase of seat sharing talks went between BJP- Tamil Maanila Congress.