பிடி அரசகுமார் மீதான குண்டர் சட்டத்தை எதிர்த்து மனைவி தொடர்ந்து ஆட்கொணர்வு வழக்கு.. இன்று விசாரணை
சென்னை: தனியார் பள்ளிகள் சங்கத் தலைவர் பி.டி. அரசகுமாரை குண்டர் தடுப்பு சட்டத்தில் சிறையில் அடைத்த உத்தரவை ரத்து செய்யக் கோரி அவரது மனைவி தொடர்ந்த ஆட்கொணர்வு வழக்கு இன்று மீண்டும் விசாரணைக்கு வருகிறது.
தனியார் பள்ளிகளுக்கு நிரந்தர அங்கீகாரம், டிடிசிபி, சிம்டிஏ அனுமதிகள் மற்றும் பிற சட்டப்பூர்வ அனுமதிகளைப் பெற்றுத்தருவதாகக் கூறி, தமிழகம் முழுவதும் பல தனியார் பள்ளி நிர்வாகிகளிடமிருந்து 100 கோடி ரூபாய் வரை வசூலித்து மோசடி செய்ததாக, தனியார் பள்ளிகள் சங்கத் தலைவர் பிடி அரசகுமார் உள்ளிட்டோருக்கு எதிராக சென்னை மத்திய குற்றப்பிரிவு போலீசார் வழக்குப்பதிவு செய்துள்ளனர்.
இந்த வழக்கில் கைது செய்யப்பட்ட பிடி அரசகுமாரை குண்டர் சட்டத்தில் சிறையில் அடைத்து, சென்னை காவல் ஆணையர், ஜூலை 11 ஆம் தேதி உத்தரவு பிறப்பித்தார். இந்த உத்தரவை ரத்து செய்யக் கோரி, பிடி அரசகுமாரின் மனைவி கோகிலா சென்னை உயர் நீதிமன்றத்தில் ஆட்கொணர்வு மனு தாக்கல் செய்துள்ளார்.
அந்த மனுவில், 2024-25 ஆம் ஆண்டு நடந்ததாகக் கூறப்படும் சம்பவத்துக்கு, 2026 ஆம் ஆண்டு வழக்குபப்திவு செய்து, கைது செய்து, குண்டர் சட்டத்தில் சிறையில் அடைத்துள்ளதாக தெரிவிக்கப்பட்டுள்ளது. இந்த வழக்கில் கூறப்படும் குற்றச்சாட்டுகள் ஜோடிக்கப்பட்டவை எனவும், அரசியல் உள்நோக்கம் கொண்டவை எனவும் தெரிவிக்கப்பட்டுள்ளது.
இந்த வழக்கு கடந்த முறை விசாரணைக்கு வந்தபோது பிடி அரசகுமார் மனைவி தரப்பில் ஆஜரான மூத்த வழக்கறிஞர் வில்சன், "தனியார் பள்ளிகல்வித்துறை செயலாளர் அளித்த புகாரின் அடிப்படையில் எனது கட்சிக்காரர் மீது கைது நடவடிக்கை எடுக்கப்பட்டுள்ளது. கட்சி நிதி என்ற பெயரில் பி.டி. அரசகுமார் பணம் வசூலித்ததாக கூறப்படுவது முற்றலும் தவறானது. அதற்கு ஆதாரங்கள் இல்லை.
குண்டர் சட்டத்தை திரும்ப பெற வேண்டும் என அரசுக்கு கோரிக்கை மனு அளித்தும், கோரிக்கை மனு மீது காலதாமதமாக நடவடிக்கை எடுக்கப்பட்டுள்ளது. தங்களிடம் பி.டி. அரசகுமார் பண மோசடி செய்ததாக யாரும் காவல்துறையில் புகார் அளிக்கவில்லை. அப்படியிருக்கையில், குண்டர் சட்டம் தவறாக பயன்படுத்தப்பட்டுள்ளது. தொடர் குற்றத்தில் ஈடுபடுபவர்களை மட்டுமே குண்டர் சட்டத்தின் கீழ் அடைக்க முடியும் என்ற விதிக்கு எதிராக இது அமைந்துள்ளது. எனவே, அவர் மீதான குண்டர் தடுப்பு சட்டத்தை ரத்து செய்ய வேண்டும்" வாதிட்டார்.
இந்த வழக்கை விசாரித்த நீதிபதிகள் தமிழக அரசும், காவல் துறையும் பதிலளிக்க உத்தரவிட்டிருந்தனர். மேலும் விசாரணையை இன்றைய தேதிக்கு தள்ளி வைத்திருந்தனர். இன்று இந்த வழக்கு மீண்டும் விசாரணைக்கு வருகிறது.
Click it and Unblock the Notifications
Sign in with Google
