விஜய்யால் சீமானுக்கு ஏற்படும் சேதாரம்.. தம்பிகளுக்கு அதிர்ச்சி கொடுத்த சி வோட்டர் சர்வே ரிப்போர்ட்!

Updated: Friday, January 30, 2026, 11:10 [IST]

Subscribe to Oneindia Tamil

சென்னை: இந்தியா டுடே மற்றும் சி வோட்டர் வெளியிட்டுள்ள கருத்துக்கணிப்பில் விஜய்யின் வருகையால் சீமானின் வாக்கு வங்கியில் மிகப்பெரிய பின்னடைவு ஏற்படுவதாக தெரிய வந்துள்ளது. விஜய்யின் தவெக சுமார் 15 சதவிகித வாக்குகளை பெறும் என்றும், சீமான் சுமார் 7 சதவிகிதத்திற்கும் குறைவான வாக்குகளையே பெறுவார் என்றும் தெரிவிக்கப்பட்டுள்ளது.

இந்தியா டுடே மற்றும் சி வோட்டர் நிறுவனம் இணைந்து தமிழ்நாட்டில் தேர்தல் நடந்தால் எந்தக் கட்சிக்கு எவ்வளவு வாக்கு சதவிகிதம் கிடைக்கும் என்ற கருத்துக்கணிப்பு வெளியிடப்பட்டுள்ளது. அதன்படி என்டிஏ கூட்டணிக்கு 33 சதவிகித வாக்குகளும், திமுக கூட்டணி 45 சதவிகித வாக்குகளையும், மற்ற கட்சிகள் 22 சதவிகித வாக்குகளையும் பெறுவார்கள் என்று தெரிவிக்கப்பட்டுள்ளது.

இதில் மற்ற கட்சிகள் பிரிவில் தவெக இடம்பெற்றுள்ளது. அதன்படி தவெக 15 சதவிகித வாக்குகளை பெறும் என்று கணிக்கப்பட்டுள்ளது. மீதமுள்ள 7 சதவிகித வாக்குகளை நாம் தமிழர் கட்சி மற்றும் சுயேட்சைகள் பங்கு போடுவார்கள் என்று தெரிகிறது. ஆகஸ்ட் மாதத்தில் மற்ற கட்சிகள் இணைந்து 15 சதவிகித வாக்குகளை மட்டுமே பெறும் என்று தெரிவிக்கப்பட்டிருந்தது.

ஆனால் 5 மாதத்தில் 7 சதவிகித வாக்குகள் அதிகரித்துள்ளது. ஆகஸ்ட் மாதத்தில் ஒப்பிடும் போது திமுகவின் வாக்கு சதவிகித 3 சதவிகிதமும், என்டிஏ கூட்டணியின் வாக்குகள் 4 சதவிகிதம் குறைந்துள்ளது. இதனால் தமிழக அரசியல் களத்தில் விஜய் வேகமாக வளர்ந்து வருவதாக கணிக்கப்படுகிறது. விஜய் இன்னும் முழு நேர பிரச்சாரத்தில் ஈடுபடாத சூழலில், 15 சதவிகித வாக்குகள் என்பது மிகப்பெரிய ஒன்றாக பார்க்கப்படுகிறது.

தேர்தல் தேதிக்கு பின் இது அதிகரிக்கவும் செய்யலாம் என்றும் எதிர்பார்க்கப்படுகிறது. ஆனால் விஜய்யின் வளர்ச்சியால் திமுக மற்றும் அதிமுக ஆகிய கட்சிகளை விடவும் நாம் தமிழர் கட்சிக்கு மிகப்பெரிய பாதிப்பு ஏற்படும் என்பதே இந்த கருத்துக்கணிப்பின் மறைமுக செய்தியாக அமைந்துள்ளது. ஏனென்றால் லோக்சபா தேர்தலில் சீமான் 8 சதவிகிதத்திற்கும் அதிக வாக்குகளை பெற்றிருந்தார்.

இதன் காரணமாக நாம் தமிழர் கட்சி மாநிலக் கட்சி என்ற அந்தஸ்தையும் பெற்றது. ஆனால் விஜய்யின் வருகையால் சீமானின் வாக்கு சதவிகித குறைய தொடங்கியுள்ளதாக பார்க்கப்படுகிறது. ஏனென்றால் சுயேட்சைகளின் ஒரு சதவிகிதம் வாக்குகளை பெறுவார்கள் என்று எடுத்துக் கொண்டாலும், சீமானின் வாக்கு 6 சதவிகிதமாக குறையும் என்று கணிக்கப்படுகிறது.

நாம் தமிழர் கட்சி ஏற்கனவே வேட்பாளர்கள் அறிவிப்பை கிட்டத்தட்ட முடித்துவிட்ட சூழலில், அவர்கள் களத்தில் பணியாற்ற தொடங்கியுள்ளனர். ஆனாலும் நாதக வாக்கு சதவிகிதம் குறையத் தொடங்கி இருக்கிறது. இதனால் வரும் நாட்களில் சீமான் நடவடிக்கைகள் எப்படி இருக்கும் என்ற எதிர்பார்ப்பு அதிகரித்துள்ளது.