மன்சூர் அலிகானுக்கு பெரிய சிக்கல்.. வழக்கு பதிவு செய்த சென்னை போலீஸ்.. என்னென்ன பிரிவுகள் தெரியுமா?

சென்னை: நடிகை த்ரிஷா குறித்து சர்ச்சைக்குரிய வகையில் பேசிய நடிகர் மன்சூர் அலி கான் மீது, ஆயிரம் விளக்கு அனைத்து மகளிர் காவல் நிலையத்தில் வழக்கு பதிவு செய்யப்பட்டுள்ளது.

விஜய்க்கு ஜோடியாக த்ரிஷா நடித்த 'லியோ' படத்தில், நடிகர் மன்சூர் அலிகானும், இருதயராஜ் என்கிற முக்கிய கதாபாத்திரத்தில் நடித்திருந்தார். லியோ படத்தில் நடிகை த்ரிஷாவுடன் தனக்கு ஒரு காட்சி கூட இல்லை என்பதை ஒரு பேட்டியின்போது மிகவும் அருவருக்கத்தக்க வகையில் மன்சூர் அலிகான் வெளிப்படுத்தியது சர்ச்சையை ஏற்படுத்தியது.

மன்சூர் அலிகானின் இந்தப் பேச்சுக்கு கடும் எதிர்ப்பு கிளம்பியது. மன்சூர் அலிகானின் இந்த பேச்சுக்கு எதிர்ப்பு தெரிவித்திருந்த நடிகை த்ரிஷா தனது எக்ஸ் சமூக வலைதள பக்கத்தில், "இவரை போன்றவர்களால் தான் மனித குலத்துக்கே அவப்பெயர். எனது திரை வாழ்க்கையில் அவருடன் இணைந்து நடிக்கவே மாட்டேன்" என்றும் கூறியிருந்தார்.

மேலும் மன்சூர் அலி கான் பேச்சுக்கு தமிழ் திரையுலகினர் பலரும் கண்டனம் தெரிவித்திருந்தனர். மேலும் நடிகர் சங்கம், இந்த விஷயம் தொடர்பாக மன்சூர் அலிகான் பகிரங்க மன்னிப்பு கேட்க வேண்டும் என்றும் கூறியது. இன்று இயக்குநர் பாரதிராஜாவும் மன்சூர் அலிகான் நிச்சயம் மன்னிப்பு கேட்டு இந்த சர்ச்சைக்கு முற்றுப்புள்ளி வைக்கவேண்டும் என தெரிவித்தார்.

இந்நிலையில், மன்சூர் அலிகான் மீது நடவடிக்கை எடுக்குமாறு தமிழக டிஜிபிக்கு தேசிய மகளிர் ஆணையம் அறிவுறுத்தி இருந்தது. இது குறித்து தேசிய மகளிர் ஆணையத்தில் அதிகாரபூர்வ எக்ஸ் பக்கத்தில், "நடிகை த்ரிஷா குறித்து நடிகர் மன்சூர் அலிகான் பேசியது மிகுந்த கவலை அளிப்பதாக உள்ளது. இந்த விவகாரத்தில் நாங்கள் தாமாக முன்வந்து, ஐபிசி பிரிவு 509 பி மற்றும் பிற சட்டங்களின் அடிப்படையில் நடவடிக்கை எடுக்குமாறு டிஜிபிக்கு அறிவுறுத்துகிறோம். இதுபோன்ற கருத்துகள் பெண்களுக்கு எதிரான வன்முறையை சாதாரணமாக கருதத் தூண்டுகிறது. இது வன்மையாக கண்டிக்கப்படவேண்டியது" என தெரிவித்தது.

இந்நிலையில் சென்னை ஆயிரம் விளக்கு அனைத்து மகளிர் காவல் நிலையத்தில் நடிகர் மன்சூர் அலி கான் மீது இரு பிரிவுகளின் கீழ் வழக்குப்பதிவு செய்துள்ளனர். இது தொடர்பாக காவல்துறை வெளியிட்டுள்ள செய்திக் குறிப்பில், "நடிகர் மன்சூர் அலிகான், நடிகை த்ரிஷா கிருஷ்ணன் குறித்து கண்ணியத்தை குறைக்கும் வகையில் மிகவும் அநாகரிகமான முறையில் அவமானப்படுத்தி, பெண்ணின் அடக்க உணர்ச்சிக்கு குந்தகம் விளைவிக்கும் வகையில் பேசிய வீடியோ சமூகவலைதளத்தில் பரவியது.

இது குறித்து தேசிய மகளிர் ஆணையம் அளித்த புகாரின் பேரில் சென்னை பெருநகர காவல் W-1 ஆயிரம் விளக்கு அனைத்து மகளிர் காவல் நிலையத்தில் இன்று (21.11.2023) நடிகர் மன்சூர் அலிகான் மீது 354 (A), 509 ஆகிய 2 சட்டப்பிரிவுகளில் வழக்கு பதிவு செய்து விசாரணை செய்யப்பட்டு வருகிறது." என தெரிவிக்கப்பட்டுள்ளது.

English summary

A case has been registered against actor Mansoor Ali Khan for his controversial comments about actress Trisha at the Thousand lights All Women Police Station.