72% இஸ்லாமியர்கள்... 59% கிறிஸ்துவர்கள்... 56% பட்டியலின மக்கள்... அமோக ஆதரவு... திமுக அபாரம்..!

சென்னை: தமிழகத்தில் நடைபெற்று முடிந்துள்ள சட்டமன்றத் தேர்தலில், சிறுபான்மையினர் மற்றும் ஒடுக்கப்பட்டோர் வாக்குகளை மொத்தமாக திமுக அள்ளியிருக்கிறது.

இந்தியா டுடே வெளியிட்டுள்ள கருத்துக்கணிப்பில், திமுகவுக்கு 56 % பட்டியலின மக்கள் ஆதரவு அளித்திருப்பதாக தெரிவிக்கப்பட்டுள்ளது. அதேவேளையில் அதிமுகவுக்கு 27% தான் பட்டியலின மக்கள் ஆதரவு அளித்திருப்பதாக எக்சிட் போல் முடிவில் கூறப்பட்டுள்ளது.

இஸ்லாமியர்கள் வாக்குகளை பொறுத்தவரை திமுக மொத்தமாக அள்ளிவிட்டது என்றே கூறலாம். இந்தியா டுடே கருத்துக்கணிப்பு முடிவின் படி தமிழகத்தில் 72% இஸ்லாமியர்கள் திமுகவுக்கு வாக்களித்துள்ளதாக தெரிவிக்கப்படுகிறது. அதிமுக வெறும் 10% முஸ்லீம்கள் மட்டுமே வாக்களித்துள்ளதாகவும் அந்த எக்சிட் போல் முடிவில் தெரிவிக்கப்பட்டுள்ளது.

பட்டியலின மக்களும், இஸ்லாமியர்களும் திமுகவுக்கு அதிக அளவில் வாக்களித்துள்ளதை போல் கிறிஸ்துவர்களும் திமுகவுக்கே அதிகமான சதவீதம் வாக்களித்துள்ளனர். அதன்படி திமுகவுக்கு 59% கிறிஸ்துவர்களும், அதிமுகவுக்கு 23% கிறிஸ்துவர்களும் வாக்களித்துள்ளதாக இந்தியா டுடே செய்தி நிறுவனம் வெளியிட்டுள்ள கருத்துக்கணிப்பில் தெரிவிக்கப்படுகிறது.

அமமுக கூட்டணியில் எஸ்.டி.பி.ஐ மற்றும் உவைசியின் மஜ்லிஸ் கட்சி இடம்பெற்றும் 4% இஸ்லாமியர்கள் மட்டுமே அந்தக் கட்சிக்கு வாக்களித்திருப்பதும் எக்சிட் போல் முடிவில் தெரிய வந்துள்ளது. கிறிஸ்துவர்கள் மற்றும் பட்டியலின மக்கள் தலா 2% பேர் மட்டுமே இந்த தேர்தலில் அமமுகவுக்கு வாக்களித்துள்ளனர். இந்த விவரத்தையும் இந்தியா டுடே நிறுவனம் தனது எக்சிட் போல் முடிவில் தெரிவித்துள்ளது.

கமல்ஹாசனின் மக்கள் நீதி மய்யத்திற்கு இஸ்லாமியர்கள் மத்தியில் 6% ஆதரவும், கிறிஸ்துவர்கள் மத்தியில் 5% ஆதரவும் கிடைத்திருப்பதாக கருத்துக் கணிப்பு முடிவுகள் கூறுகின்றன.

மொத்தத்தில் நடைபெற்று முடிந்த தேர்தலில் இஸ்லாமியர்கள், கிறிஸ்துவர்கள், பட்டியலின மக்கள், என அனைத்து தரப்பட்டோரின் பேராதரவை திமுக பெற்றிருப்பது இந்தியா டுடே கருத்துக்கணிப்பு முடிவில் தெரிய வந்துள்ளது.

English summary

Caste wise vote sharing details to dmk