9ம் வகுப்பு பாடத்தில் டேட்டிங் குறித்த பாடம்.. கிளம்பிய எதிர்ப்பு.. சிபிஎஸ்இ பரபரப்பு விளக்கம்

சென்னை: 9ஆம் வகுப்பு பாடப்புத்தகத்தில் டேட்டிங் குறித்த பாடம் இடம்பெற்றுள்ள விவகாரம் குறித்த சர்ச்சைக்கு சிபிஎஸ்இ விளக்கமளித்துள்ளது.

மத்திய இடைநிலைக் கல்வி வாரியம் எனப்படும் சிபிஎஸ்இ பாடத்திட்டத்தின் 9ஆம் வகுப்பு பாடப்புத்தகத்தில் Dating and Relationship (புதிய நட்புறவை உருவாக்குதல் மற்றும் உறவுகள்) என்ற தலைப்பிலவான பாடம் இடம் பெற்றுள்ளதாக சமூகவலைதளங்களில் தகவல்கள் பரவுகின்றன.

இதை எதிர்த்து கல்வியாளர்கள் உள்பட பல்வேறு தரப்பினரும் தங்கள் கருத்துகளைத் தெரிவித்து வருகிறார்கள். மேலும் பதின்பருவ மாணவர்களுக்கு இது போன்ற பாடங்கள் அவசியமில்லை. எனவே அந்த பாடத்தை புத்தகத்திலிருந்து நீக்க வேண்டும் என கோரிக்கைகள் எழுந்தன.

இந்த நிலையில் அந்த பாடப்புத்தகம் தொடர்பாக சிபிஎஸ்இ விளக்கம் அளித்துள்ளது. அதாவது அந்த பாடப்புத்தகத்தை அவர்கள் வெளியிடவில்லை என தெரிவித்துள்ளார்கள். இதுகுறித்து எக்ஸ் சமூகவலைதள பக்கத்தில் கூறியிருப்பதாவது: சமூகவலைதளங்களில் பரவும் பாடத்தின் உள்ளடக்கம், ககன்தீப் கவுர் எழுதிய சுய விழிப்புணர்வு மற்றும் அதிகாரம் அளிப்பதற்கான வழிகாட்டி என்ற நூலில் இருந்து அந்த பகுதி வெளியிடப்பட்டுள்ளது.

இதை சிபிஎஸ்இ வெளியிடவில்லை. மேலும் எந்த தனியார் பதிப்பகங்களின் புத்தகத்தையும் சிபிஎஸ்இ பரிந்துரை செய்யவில்லை. இவ்வாறு அந்த பதிவில் குறிப்பிடப்பட்டுள்ளது. கடந்த 2021ஆம் ஆண்டு 10ஆம் வகுப்பு ஆங்கில வினாத்தாளில் பெண்ணடிமைத்தனத்தை ஊக்குவிக்கும் வகையிலான பிற்போக்குத்தனமான கருத்துகளை கொண்ட கேள்வி இடம்பெற்றிருந்ததற்கு பலர் எதிர்ப்பு தெரிவித்திருந்தனர்.

அது போல் கடந்த 2018ஆம் ஆண்டு 6ஆம் வகுப்பு மாணவர்களுக்கான கேள்வித்தாளில் வர்ணாசிரமத்தின்படி கீழ் ஜாதி எது என கேள்வி கேட்கப்பட்டிருந்தது பெரும் சர்ச்சையை ஏற்படுத்தியிருந்தது. அது போல் சிபிஎஸ்இ பள்ளி ஒன்றில் அண்ணல் அம்பேத்கரும் அப்துல் கலாமும் எந்த வர்ணத்தை சேர்ந்தவர்கள் என்ற சர்ச்சைக்குரிய கேள்வி இடம்பெற்றதை அடுத்து பலர் கண்டனம் தெரிவித்தனர்.

English summary

CBSE explains about the controversy about the chapter found in class 9 book.