சென்னையில் அதிர்ச்சி.. அலறி அடித்து ஓடிய வடமாநில தொழிலாளர்கள்.. சிலிண்டர் வெடித்து 7 பேர் படுகாயம்!
சென்னை: சென்னை பூந்தமல்லியில் புலம்பெயர் தொழிலாளர்கள் வசித்து வந்த வீட்டில் இன்று மதியம் சமையல் கேஸ் சிலிண்டர் வெடித்ததில் 7 பேர் படுகாயம் அரைந்துள்ளனர். சிலிண்டர் வெடித்துச் சிதறும் சிசிடிவி காட்சி வெளியாகி அதிர்வலைகளை ஏற்படுத்தியுள்ளது.
சென்னை பூந்தமல்லியை அடுத்த சக்தி நகர் பகுதியில் குமார் என்பவருக்கு சொந்தமான வீட்டில் வட மாநில தொழிலாளர்கள் வாடகைக்கு வசித்து வருகின்றனர். அவர்கள் இன்று மதியம் உணவு தயாரிப்பதற்காக கேஸ் சிலிண்டரை ஆன் செய்துள்ளனர். அப்போது அதிலிருந்து கேஸ் கசிவு ஏற்பட்டு தீ விபத்து ஏற்பட்டது.
இதனைப் பார்த்து அதிர்ந்து போன வடமாநில தொழிலாளர்கள் அங்கிருந்து கூச்சலிட்டபடி அவசரமாக வெளியேறி உள்ளனர். சத்தம் கேட்டு எதிர் வீட்டில் வசிக்கக்கூடிய குமார், சரஸ்வதி, ஜெகன், ஆகியோர் என்ன என்று வெளியே வந்து பார்த்துக் கொண்டிருந்தனர். அப்போது திடீரென சிலிண்டர் வெடித்தது. இதில் தீ பரவிய நிலையில் அவர்களுக்கு தீக்காயம் ஏற்பட்டது.
மேலும், சிலிண்டர் வெடித்ததால் வீட்டின் ஒருபகுதி இடிந்து விழுந்துள்ளது. இந்த விபத்தில் குமார், ஜெகன், சரஸ்வதி, யுவராஜ், ஷீலா, ரிஷி மற்றும் நீலக்குமார் ஆகிய ஏழு பேர் காயமடைந்துள்ளனர். இதனை அடுத்து அங்கிருந்தவர்கள் தீக்காயமடைந்த சிறுவர்கள் உட்பட 7 பேரை மீட்டு கீழ்பாக்கம் அரசு மருத்துவமனைக்கு சிகிச்சைக்காக அனுப்பி வைத்தனர்.
தகவலறிந்து வந்த பூவிருந்தவல்லி தீயணைப்பு வீரர்கள் மற்றும் அப்பகுதி போலீசார் விரைந்து வந்து விசாரணை மேற்கொண்டு வருகின்றனர். மேலும், பூந்தமல்லி தீயணைப்பு துறையினர் சம்பவ இடத்திற்கு விரைந்து வந்தனர். வடமாநில தொழிலாளர்கள் வீட்டில் உள்ள காலி சிலிண்டர்களை வாங்கி வைத்து, பெட்ரோல் பங்க்குகளில் ஆட்டோ மற்றும் வாகனங்களுக்கு நிரப்பக்கூடிய கேஸை நிரப்பி வீட்டில் உபயோகப்படுத்தி வந்துள்ளனர்.
மேலும் அந்த சிலிண்டர்களில் ஏற்கனவே கசிவு ஏற்பட்ட நிலையில் அதனை கவனிக்காமல் இருந்ததால் இந்த தீ விபத்து ஏற்பட்டுள்ளது. இந்த தீ விபத்துக்கான காரணம் குறித்து பூந்தமல்லி போலீசார் விசாரணை மேற்கொண்டு வந்த நிலையில் அந்த வீட்டிலிருந்த ஒரு பகுதி இடித்து விழுந்தது. இதனால் பெரும் பரபரப்பு ஏற்பட்டது. இந்நிலையில், கேஸ் சிலிண்டர் வெடித்து சிதறும் சிசிடிவி காட்சி வெளியாகி பெரும் அதிர்வலையை ஏற்படுத்தியுள்ளது.
Click it and Unblock the Notifications
Sign in with Google