அடி வெளுக்கப்போகுது மழை..வெயிலடிக்குதுன்னு அசால்டா இருக்காதீங்க..காயப்போட்ட துணி கவனம்

சென்னை: தமிழ்நாட்டில் அடுத்த 3 மணி நேரத்தில் 9 மாவட்டங்களில் மழைக்கு வாய்ப்புள்ளதாக இந்திய வானிலை ஆய்வு மையம் தகவல் தெரிவித்துள்ளது. கரூர், தருமபுரி, திருவண்ணாமலை, கோவை, திருப்பூர், திண்டுக்கல், தேனி, தென்காசி, விருதுநகர், ஆகிய மாவட்டங்களில் மழை பெய்யும் என இந்திய வானிலை மையம் வெளியிட்டுள்ள அறிவிப்பில் தெரிவிக்கப்பட்டுள்ளது.

தமிழ்நாட்டில் பல ஊர்களில் நேற்று கோடை மழை கொட்டித்தீர்த்தது. சாலைகளில் வெள்ளம் பெருக்கெடுத்தது. தென் மாவட்டங்களில் வறண்டு காணப்பட்ட அருவிகள் உயிர்பெற்று தண்ணீரை கொட்டி வருகின்றன. இதனால் கோடை காலத்தை சுற்றுலா பயணிகள் அருவிக்கரைகளில் உற்சாகமாக கொண்டாடி வருகின்றனர். இந்த நிலையில் மழையானது 3ஆம் தேதி வரைக்கும் நீடிக்கும் என வானிலை ஆய்வு மையம் அறிவித்துள்ளது.

இதுகுறித்து சென்னை வானிலை ஆய்வு மையம் வெளியிட்டுள்ள செய்திக்குறிப்பில், "தென் இந்திய பகுதிகளின் மேல் வளி மண்டலத்தின் கீழடுக்குகளில் கிழக்கு திசை காற்றும், மேற்கு திசை காற்றும் சந்திக்கும் பகுதி நிலவுகிறது.
இதன் காரணமாக மே 1 ஆம் தேதியான இன்று திண்டுக்கல், நீலகிரி, விருதுநகர், தென்காசி, தேனி, கோவை, ஆகிய 6 மாவட்டங்களில் கனமழை பெய்ய வாய்ப்பு உள்ளது.

சேலம், தர்மபுரி, நீலகிரி, ஈரோடு, கோயம்புத்தூர், தேனி, திண்டுக்கல், தென்காசி, திருப்பூர், நாமக்கல், கரூர், கள்ளக்குறிச்சி, திருவள்ளூர், காஞ்சிபுரம், விழுப்புரம், பெரம்பலூர் மற்றும் திருச்சிராப்பள்ளி மாவட்டங்களில் ஓரிரு இடங்களில் கனமழையும் பெய்ய வாய்ப்புள்ளது என தெரிவிக்கப்பட்டு உள்ளது.

தென் தமிழக கடலோரப் பகுதிகள், இலங்கை கடலோரப் பகுதிகள் மற்றும் அதனை ஒட்டிய தென்மேற்கு வங்கக்கடல் பகுதிகளில் சூறாவளிக் காற்று மணிக்கு 40 முதல் 45 கிலோ மீட்டர் வேகத்தில் வீசக்கூடும் என்பதால் மீனவர்கள் கடலுக்கு செல்ல வேண்டாம் என அறிவுறுத்தப்பட்டுள்ளது.

English summary

The Indian Meteorological Department has informed that rain is likely in 9 districts in Tamil Nadu in the next 3 hours. According to the Indian Meteorological Department, it will rain in the districts of Karur, Dharmapuri, Tiruvannamalai, Coimbatore, Tirupur, Dindigul, Theni, Thenkasi, Virudhunagar.