28 புதிய மெட்ரோ ரயில்கள் வாங்க புதிய டெண்டர்! 2028 ஆம் ஆண்டு முதல் சென்னையில் இயங்கும்!

சென்னை: சென்னை மெட்ரோ ரயில் சேவையை அதிகப்படியானவர்களுக்கு வழங்கிடும் நோக்கி 28 புதிய ரயில்கள் வாங்க டெண்டர் அறிவிக்கப்பட்டுள்ளது. இவை ஒவ்வொன்றும் 6 பெட்டிகள் கொண்டவை ஆகும்.

இதுகுறித்து தமிழ் ரயில் செய்திகள் எனும் சமூகவலைதள பக்கத்தில் கூறியிருப்பதாவது: சென்னை மெட்ரோ ரயில் சேவையில் நாளுக்கு நாள் அதிகரித்து வரும் பயணிகள் கூட்டத்தைச் சமாளிக்கவும், சேவையை மேம்படுத்தவும் 28 புதிய மெட்ரோ ரயில்களை (6 பெட்டிகள் கொண்டவை) வாங்குவதற்கான டெண்டரை சென்னை மெட்ரோ ரயில் நிறுவனம் (CMRL) கோரியுள்ளது.

திட்ட மதிப்பு: சுமார் ₹2,820.90 கோடி மதிப்பீட்டில் இந்தப் புதிய ரயில்கள் வாங்கப்பட உள்ளன.

கூடுதல் பெட்டிகள்: தற்போதுள்ள மெட்ரோ ரயில்களில் 4 பெட்டிகள் மட்டுமே உள்ளன. ஆனால், புதிதாக வாங்கப்படவுள்ள இந்த 28 ரயில்களும் 6 பெட்டிகளைக் (6-Coach Trains) கொண்டிருக்கும். இது அதிகப்படியான பயணிகளை ஏற்றிச் செல்ல உதவும்.

முதற்கட்ட வழித்தடங்களில் (விமான நிலையம் - விம்கோ நகர் & சென்ட்ரல் - பரங்கிமலை) பீக் ஹவர்ஸில் (Peak Hours) ஏற்படும் கடுமையான நெரிசலைக் குறைப்பது.

தற்போதுள்ள 52 ரயில்களுடன் இந்த 28 புதிய ரயில்களும் சேரும்போது, மொத்த ரயில்களின் எண்ணிக்கை 80-ஆக உயரும்.

நிதியுதவி: இத்திட்டத்திற்குப் பன்னாட்டு வங்கிகளிடமிருந்து நிதியுதவி பெறப்பட உள்ளது. இந்த ரயில்கள் 2028-ஆம் ஆண்டிற்குள் பயன்பாட்டிற்கு வரும் என்று எதிர்பார்க்கப்படுகிறது.

இந்த நடவடிக்கை மூலம், ரயில்களுக்கு இடையிலான கால இடைவெளி குறைக்கப்பட்டு, பயணிகள் காத்திருக்கும் நேரம் வெகுவாகக் குறையும். இவ்வாறு அந்த பதிவில் குறிப்பிடப்பட்டுள்ளது.

English summary

To expand Chennai Metro rail services to a larger number of commuters, a tender has been issued to purchase 28 new trains. Each train will consist of six coaches, aimed at increasing capacity and improving service efficiency.