Chennai Rain: அடுத்த 2 மணி நேரம் விட்டு விளாச போகுது மழை.. சென்னை உள்பட தமிழகம் முழுக்க 16 மாவட்டங்களுக்கு அலர்ட்

சென்னை: அடுத்த 2 மணி நேரத்தில் தமிழகத்தில் சென்னை உள்பட 16 மாவட்டங்களில் மழைக்கு வாய்ப்பு உள்ளதாக வானிலை மையம் கூறியுள்ளது. குமரி, நெல்லை, விருதுநகர், கடலூர், அரியலூர் மாவட்டங்களில் இடி, மின்னலுடன் கூடிய மழை வெளுத்து வாங்க உள்ளதாக வானிலை மையம் அறிவித்துள்ளது.

தமிழகத்தில் வெயில் சுட்டெரித்து வருகிறது. கடந்த சில நாட்களாகவே வெயிலின் தாக்கம் அதிகரித்து வருகிறது. இதனால் கோடை காலம் தொடங்கிவிட்டதோ என மக்கள் நினைத்த நிலையில் மீண்டும் மழைக்கு வாய்ப்பு உள்ளதாக வானிலை ஆய்வு மையம் தெரிவித்துள்ளது.

உருவாகிய காற்றழுத்த தாழ்வு பகுதி

இன்று காலையில் புதிதாக வங்கக் கடலில் புதிய காற்றழுத்த தாழ்வு பகுதி உருவாகி இருப்பதாகவும், இதனால் இன்று மற்றும் நாளை சென்னை உள்பட தமிழகத்தின் பல்வேறு பகுதிகளில் மழை பெய்ய வாய்ப்பு இருப்பதாக வானிலை மையம் கூறியிருந்தது. நெல்லை, தென்காசி உள்ளிட்ட தென் மாவட்டங்களில் கனமழை பெய்ய வாய்ப்பு இருப்பதாக கூறி உள்ளது.

இந்தியப் பெருங்கடல் பகுதிகள் மற்றும் அதனை ஒட்டிய தென்கிழக்கு வங்கக்கடல் பகுதிகளின் மேல் ஒரு வளிமண்டல மேலடுக்கு சுழற்சி நிலவியது. இதன் காரணமாக, இன்று ஒரு காற்றழுத்த தாழ்வு பகுதி அதே பகுதிகளில் உருவாகியுள்ளது. இது மேற்கு-வடமேற்கு திசையில் நகர்ந்து தென்மேற்கு வங்கக்கடல் மற்றும் அதனை ஒட்டிய பூமத்தியரேகைக்கு அருகிலுள்ள இந்தியப் பெருங்கடல் பகுதிகளில் அடுத்த 24 மணி நேரத்தில் வலுப்பெற வாய்ப்பு உள்ளது.

அடுத்த 2 மணி நேரத்தில்

இதற்கிடையே அடுத்த 2 மணி நேரத்தில் தமிழகத்தில் சென்னை உள்பட 16 மாவட்டங்களில் மழை பெய்ய வாய்ப்பு உள்ளதாக வானிலை மையம் கூறியுள்ளது. இது தொடர்பாக வானிலை மையம் வெளியிட்டுள்ள அறிவிப்பில் கூறப்பட்டிருப்பதாவது:-

தமிழகத்தில் இன்று இரவு 7 மணி வரை, அரியலூர், கடலூர், குமரி, மயிலாடுதுறை, நாகை, பெரம்பலூர், புதுக்கோட்டை, ராமநாதபுரம், சிவகங்கை, தஞ்சை, திருவாரூர், தூத்துக்குடி, திருச்சி, நெல்லை மற்றும் காரைக்கால் ஆகிய 14 மாவட்டங்களில் இடி மின்னலுடன் கூடிய லேசானது முதல் மிதமான மழைக்கு வாய்ப்பு உள்ளது.

சென்னையிலும் மழை கொட்டும்

இதேபோல் சென்னை மற்றும் செங்கல்பட்டில் லேசான மழைக்கு வாய்ப்பு உள்ளது என்று வானிலை ஆய்வு மையம் கூறியுள்ளது. இதன் காரணமாக சில இடங்களில் தண்ணீர் தேங்க வாய்ப்பு உள்ளது. குறிப்பாக தாழ்வான பகுதிகளில் மழைநீர் தேங்க வாய்ப்பு உள்ளது. என்று கூறப்பட்டுள்ளது.

முன்னதாக வானிலை மையம் வெளியிட்டிருந்த அறிவிப்பில், "இன்று தென் தமிழகத்தில் ஒருசில இடங்களிலும், வட தமிழகத்தில் ஓரிரு இடங்களிலும், புதுவை மற்றும் காரைக்கால் பகுதிகளிலும் லேசானது முதல் மிதமான மழை பெய்யக்கூடும். குறிப்பாக கன்னியாகுமரி, திருநெல்வேலி, தூத்துக்குடி மற்றும் விருதுநகர் மாவட்டங்களில் ஓரிரு இடங்களில் இடி, மின்னலுடன் கூடிய கனமழை பெய்யக்கூடும்.

நாளை 4 மாவட்டங்களில் கனமழை பெய்யும்

நாளை தென் தமிழகத்தில் ஒருசில இடங்களிலும், வட தமிழகத்தில் ஓரிரு இடங்களிலும், புதுவை மற்றும் காரைக்கால் பகுதிகளிலும் லேசானது முதல் மிதமான மழை பெய்யக்கூடும். குறிப்பாக தேனி, திண்டுக்கல், மதுரை மற்றும் விருதுநகர் மாவட்டங்களில் ஓரிரு இடங்களில் இடி, மின்னலுடன் கூடிய கனமழை பெய்யக்கூடும்.

23-02-2026 முதல் 25-02-2026 வரை: தமிழகத்தில் ஓரிரு இடங்களிலும், புதுவை மற்றும் காரைக்கால் பகுதிகளிலும் லேசான மழை பெய்யக்கூடும். 26-02-2026 மற்றும் 27-02-2026: தமிழகம், புதுவை மற்றும் காரைக்கால் பகுதிகளில் வறண்ட வானிலை நிலவக்கூடும்.

சென்னையில் இன்றும், நாளையும்

சென்னையில் இன்று (21-02-2026) வானம் ஓரளவு மேகமூட்டத்துடன் காணப்படும். நகரின் ஒருசில பகுதிகளில் லேசான மழை பெய்யக்கூடும். அதிகபட்ச வெப்பநிலை 32-33° செல்சியஸை ஒட்டியும், குறைந்தபட்ச வெப்பநிலை 25° செல்சியஸை ஒட்டியும் இருக்கக்கூடும்.

சென்னையில் நாளை (22-02-2026): வானம் ஓரளவு மேகமூட்டத்துடன் காணப்படும். அதிகபட்ச வெப்பநிலை 32-33° செல்சியஸை ஒட்டியும், குறைந்தபட்ச வெப்பநிலை 24-25* செல்சியஸை ஒட்டியும் இருக்கக்கூடும்" என்று வானிலை மையம் கூறியுள்ளது.

English summary

Chennai Rain Alert: The Meteorological Department has issued a two-hour rain alert for 16 districts across Tamil Nadu, including Chennai. Heavy rain with thunder and lightning is expected in Kanyakumari, Tirunelveli, Virudhunagar, Cuddalore, and Ariyalur districts.