பள்ளி மாணவர்களுக்கு அறிவிப்பு.. சென்னையில் இன்று பள்ளிகள் வழக்கம்போல் செயல்படும்.. காரணம் இதுதான்

சென்னை: சென்னையில் இன்று பள்ளிகள் இயங்கும் என்று மாவட்ட முதன்மைக் கல்வி அலுவலர் அறிவித்துள்ளார். இது தொடர்பாகச் சென்னை முதன்மைக் கல்வி அலுவலர் அறிக்கை ஒன்றையும் வெளியிட்டுள்ளார்.

தமிழகத்தில் இந்த வருடம், கோடை வெயில் கடுமையாக இருந்தது.. அதனால், திட்டமிட்டபடி பள்ளிகளை திறக்க முடியவில்லை. வெயில் அதிகமாக இருந்ததால், பள்ளிகள் தாமதமாகவே திறக்கப்பட்டன.

இதனால் பாடத்திட்டங்களை விரைவாக முடிக்க வேண்டிய கட்டாயம் ஆசிரியர்களுக்கு ஏற்பட்டுள்ளது... இதற்கு நடுவில், பலத்த மழை தமிழகத்தை தாக்கியது.. அதுவும், கடந்த மாதம் திடீரென பெய்த மழை காரணமாக சென்னையில் பள்ளிகளுக்கு விடுமுறை அளிக்கப்பட்டது.
அந்த விடுமுறையை ஈடு செய்யும் வகையில், சனிக்கிழமைகளில் பள்ளிகள் செயல்படும் என அறிவிக்கப்பட்டது. அந்தவகையில் சென்னையில் 6முதல் 12 ஆம் வகுப்பு வரையிலான மாணவர்களுக்கு இன்று பள்ளிகள் இயங்கும் என தெரிவிக்கப்பட்டுள்ளது. இது தொடர்பாக, மாவட்ட முதன்மை கல்வி அலுவலர் மார்க்ஸ் அறிவித்துள்ளார்.

அந்த அறிக்கையில், கனமழையின் காரணமாக சென்னை மாவட்டத்தில் செயல்பட்டு வரும் அனைத்து வகைப் பள்ளிகளுக்கும் 19.06.2023 அன்று விடுமுறை அறிவிக்கப்பட்டது.

அப்பணி ஈடு செய்திடும் வகையில் 22.07.2023 அன்று (இன்று சனிக்கிழமை) சென்னை மாவட்டத்தில் செயல்பட்டு வரும் அனைத்து வகை உயர்நிலை மற்றும் மேல்நிலைப் பள்ளிகளில் 6 முதல் 12 ஆம் வகுப்பு வரை பயிலும் மாணவர்களுக்கு திங்கள் கிழமை பாடவேளையினை பின்பற்றி முழு பணி நாளாக செயல்படுமாறு அனைத்து வகை பள்ளித் தலைமையாசிரியர்கள் /முதல்வர்கள் கேட்டுக் கொள்ளப்படுகிறார்கள்" என தெரிவிக்கப்பட்டுள்ளது.

English summary

Chennai schools open today and Major announcement from Chennai District principal education officer