2 நாள் பயணமாக ஸ்டாலின் ராமநாதபுரம் விசிட்! 54 இடங்களில் வரவேற்பு! அமைச்சர் ராஜகண்ணப்பன் தடபுடல்!

சென்னை: முதலமைச்சர் ஸ்டாலின் 2 நாள் பயணமாக ராமநாதபுரம் மாவட்டத்திற்கு செல்லும் நிலையில் அவருக்கு 54 இடங்களில் உற்சாக வரவேற்பு கொடுப்பதற்கான ஏற்பாடுகளை தடபுடலாக கவனித்து வருகிறார் அமைச்சர் ராஜகண்ணப்பன்.

தென் மண்டல திமுக வாக்குச்சாவடி முகவர்கள் பயிற்சி பாசறைக் கூட்டத்தில் பங்கேற்கவும், தங்கச்சிமடத்தில் நடைபெறும் மீனவர்கள் சங்க மாநாட்டில் கலந்துகொள்ளவும் நாளை மறுநாள் ராமநாதபுரம் செல்கிறார் முதல்வர் ஸ்டாலின். முன்னதாக நாளை மாலை சென்னையிலிருந்து விமானம் மூலம் மதுரை செல்லும் அவர் அங்கு ஓய்வெடுக்கிறார்.

அதைத் தொடர்ந்து நாளை மறுநாள் காலை கார் மூலம் சாலை மார்க்கமாக ராமநாதபுரம் புறப்பட்டுச் செல்லும் முதல்வர் ஸ்டாலின், பேராவூரில் நடைபெறும் தென் மண்டல திமுக வாக்குச்சாவடி முகவர்கள் பயிற்சி பாசறைக் கூட்டத்தில் பங்கேற்று பேசுகிறார்.

இந்தக் கூட்டத்தில் இராமநாதபுரம், சிவகங்கை , திண்டுக்கல் கிழக்கு, திண்டுக்கல் மேற்கு, தேனி வடக்கு, தேனி தெற்கு, மதுரை மாநகர் , மதுரை வடக்கு, மதுரை தெற்கு விருதுநகர் வடக்கு, விருதுநகர் தெற்கு , திருநெல்வேலி கிழக்கு, திருநெல்வேலி மத்திய, தென்காசி வடக்கு, தென்காசி தெற்கு
தூத்துக்குடி வடக்கு, தூத்துக்குடி தெற்கு, கன்னியாகுமரி கிழக்கு , கன்னியாகுமரி மேற்கு என 10 மாவட்டங்களை சேர்ந்த திமுகவினர் கலந்துகொள்கிறார்கள்.

சுமார் 20,000 பேர் முதல் 25,000 பேர் வரை கலந்துகொள்வார்கள் என்பதால் அவர்களுக்கான உணவு பொறுப்பை அமைச்சர் ராஜகண்ணப்பன் கவனித்து வருகிறார். நாளை மறுதினம் ராமேஸ்வரத்தில் ஓய்வெடுக்கும் முதல்வர் ஸ்டாலின் வரும் வெள்ளிக்கிழமை அன்று மீனவர்கள் சங்க மாநாட்டில் கலந்துகொண்டு பேசுகிறார்.

சுமார் 50,000 மீனவர்கள் இந்த மாநாட்டில் பங்கேற்பார்கள் என எதிர்பார்க்கப்படுகிறது. மொத்தத்தில் முதல்வரின் ராமநாதபுரம் வருகையை ஒட்டி வரவேற்பு ஏற்பாடுகளை மிகவும் தடபுடலாக செய்து வருகிறார் அமைச்சர் ராஜகண்ணப்பன்.

English summary

Chief Minister Stalin is going on a 2-day visit to Ramanathapuram district, Minister Raja Kannappan is busy making arrangements to give him a warm welcome at 54 places.