அதிமுக எம்.பி டெல்லியில் பேசலயா? ஆதாரத்தை நான் காட்டவா? சட்டசபையில் முதல்வர் ஸ்டாலின் ஆவேசம்!

சென்னை: "அதிமுக எம்.பி கனிமவள சட்டத்திருத்த மசோதாவை மாநிலங்களவையில் ஆதரித்து பேசினார். அதை மறுக்கிறீர்களா? பேசவில்லை என நீங்கள் சொன்னால், ஆதாரத்தை நான் சபாநாயகரிடம் சமர்ப்பிக்கிறேன்" என முதல்வர் ஸ்டாலின் கூறியுள்ளார். அமைச்சர் தங்கம் தென்னரசு டங்ஸ்டன் சுரங்கம் தொடர்பாக விளக்கம் அளித்தபோது அமளியில் ஈடுபட்ட அதிமுகவினருக்கு முதலமைச்சர் மு.க.ஸ்டாலின் பதிலடி கொடுத்துள்ளார்.

மதுரை மாவட்டம் மேலூர் அருகே அரிட்டாபட்டி பகுதியில் டங்ஸ்டன் சுரங்கம் அமைக்க மத்திய அரசு ஏலம் விட அனுமதி அளித்ததைத் தொடர்ந்து போராட்டம் வெடித்துள்ளது. டங்ஸ்டன் சுரங்க விவகாரம் தொடர்பான கவன ஈர்ப்பு தீர்மானத்துக்கு அமைச்சர் தங்கம் தென்னரசு தமிழக சட்டப்பேரவையில் இன்று பதிலளித்தார். அப்போது பேசிய அவர், "அதிமுக மாநிலங்களவை உறுப்பினர், கனிமவள திருத்த மசோதாவுக்கு ஆதரித்து வாக்களித்ததே எல்லா பிரச்சனைக்கும் காரணம். டங்ஸ்டன் சுரங்கம் அமைய மூல முதல் காரணமே அதிமுகதான்.

மதுரை அரிட்டாபட்டியில் ஒருபோதும் டங்ஸ்டன் சுரங்கம் அமையாது. டங்ஸ்டன் சுரங்கத்துக்கு எதிராக சட்டமன்றத்தில் தீர்மானம் நிறைவேற்றி ஒன்றிய அரசுக்கு அனுப்பிவைக்கப்பட்டுள்ளது. ஏலம் விட முயற்சித்தபோது அப்போதே எதிர்த்தது திமுக அரசு. எதிர்ப்பை மீறிதான் டங்ஸ்டன் ஏல நடைமுறையை ஒன்றிய அரசு மேற்கொண்டது. ஒன்றிய அரசு குறிப்பிட்ட நிறுவனத்துக்கு ஏலம் கொடுத்தபோதும் திமுக அரசு தொடர்ந்து எதிர்த்தது.

மாநில உரிமைகளை பாஜக அரசு அபகரித்ததை அதிமுக ஆதரித்ததன் விளைவு தான் இன்றைக்கு டங்ஸ்டன் சுரங்க ஏலமாக வந்திருக்கிறது. டங்ஸ்டன் விவகாரத்தில் அரசியல் ஆதாயம் தேட அதிமுக முயற்சி செய்து வருகிறது. சட்டமன்றத்தில் தீர்மானம் நிறைவேற்றப்பட்ட பிறகும் டங்ஸ்டன் சுரங்க விவகாரத்தில் அதிமுக குளிர்காய நினைக்கிறது." எனத் தெரிவித்தார்.

அமைச்சர் தங்கம் தென்னரசு பேச்சுக்கு எதிர்ப்பு தெரிவித்து அதிமுக உறுப்பினர்கள் அமளியில் ஈடுபட்டனர். இதையடுத்து எழுந்த முதல்வர் ஸ்டாலின், "அதிமுக எம்.பி தம்பிதுரை கனிமவள சட்டத் திருத்த மசோதாவை மாநிலங்களவையில் ஆதரித்து பேசினார். அதை மறுக்கிறீர்களா? பேசவில்லை என நீங்கள் சொன்னால், ஆதாரத்தை நான் சபாநாயகரிடம் சமர்ப்பிக்கிறேன்." என அதிமுகவினருக்கு முதலமைச்சர் மு.க.ஸ்டாலின் பதிலடி கொடுத்துள்ளார்.

English summary

Chief Minister MK Stalin has retaliated against the AIADMK members who were involved in the uproar when Minister Thangam Thennarasu gave an explanation, saying, “AIADMK MP Thambidurai spoke in support of the Minerals Amendment Bill in the Rajya Sabha. If you say that he did not speak, I will submit the evidence to the Speaker.”