முகக் கவசம் அணிவதை உறுதி செய்யுங்கள்- முதல்வர் ஸ்டாலின்

Updated: Monday, April 25, 2022, 15:26 [IST]

Subscribe to Oneindia Tamil

சென்னை: தமிழகத்தில் முகக் கவசம் அணிவதை உறுதி செய்யுங்கள் என முதல்வர் ஸ்டாலின் அறிவுறுத்தியுள்ளார்.

தமிழகத்தில் கொரோனா

தமிழகத்தில் கொரோனா தொற்று இரட்டை இலக்கங்களில் குறைந்து கொண்டே வந்தது. ஆனால் கடந்த சில தினங்களாக கொரோனா தொற்று அதிகரித்துள்ளது. இந்தியாவில் மகாராஷ்டிரா, டெல்லி உள்ளிட்ட மாநிலங்களில் தொற்று அதிகரித்து வரும் நிலையில் தமிழகத்திலும் கொரோனா மீண்டும் அதிகரித்துள்ளது.

கொரோனா கட்டுப்பாடுகள்

ஏற்கெனவே கொரோனா கட்டுப்பாடுகள் முழுமையாக விலக்கிக் கொள்ளப்பட்டன. அது போல் மெகா தடுப்பூசி முகாம்களும் நிறுத்தப்பட்டன. ஆனால் அரசு மருத்துவமனைகளில் கொரோனா தடுப்பூசி போடப்பட்டு வருகிறது. வரும் ஜூன் மாதம் 4 ஆவது அலை உச்சத்தில் இருக்கும் என மருத்துவ நிபுணர்கள் தெரிவித்துள்ளார்கள்.

கொரோனா பாதிப்பு

இந்த நிலையில் நாட்டில் கொரோனா பாதிப்பு நிலவரம் குறித்தும் கட்டுப்பாடுகள் குறித்தும் பிரதமர் நரேந்திர மோடி வரும் 27ஆம் தேதி மாநில முதல்வர்களுடன் ஆலோசனை நடத்துகிறார். இந்த நிலையில் தமிழக முதல்வர் மு.க.ஸ்டாலின் இன்று மருத்துவத் துறை செயலாளர், அதிகாரிகளுடன் ஆலோசனை நடத்தினார்.

இன்று ஆலோசனை

தலைமைச் செயலகத்தில் காலை 9 மணிக்கு நடைபெற்ற இந்த ஆலோசனை கூட்டத்தில் முதல்வர் ஸ்டாலின் தலைமை வகித்தார். அப்போது அவர் பேசுகையில் வடமாநிலங்களிலும் சென்னை ஐஐடியிலும் கொரோனா பரவல் அதிகரித்து வருகிறது. ஒரு வாரத்தில் தொற்று அதிகரித்துள்ளது. இரண்டாவது தவணை தடுப்பூசி போடாதவர்களின் எண்ணிக்கை 1.48 கோடி பேராகும். பூஸ்டர் டோஸ் போட தகுதியிருந்தும் 11.06 லட்சம் பேர் போடவில்லை. கொரோனா பரவலை தடுக்க நம்மிடம் இருக்கும் ஆயுதம் கொரோனா தடுப்பூசி. தடுப்பூசி போடாதவர்கள் உடனடியாக தடுப்பூசி போட வேண்டும். அது போல் மக்கள் பொது இடங்களில் முகக் கவசம் அணிந்து செல்ல வேண்டும். கொரோனா பரவலை தடுக்க அதிகாரிகள் தயார் நிலையில் இருக்க வேண்டும் என முதல்வர் ஸ்டாலின் தெரிவித்தார்.