பிளான் 440.. ஸ்டாலின் தனித்தனியாக கொடுத்த டார்கெட்.. வேறு ரூட்டை எடுக்கும் திமுக.. கவனிச்சீங்களா?

Updated: Thursday, December 11, 2025, 9:20 [IST]

Subscribe to Oneindia Tamil

சென்னை: தமிழ்நாடு சட்டசபை தேர்தலை முன்னிட்டு ஆளும் திமுக தரப்பு புதிய வாக்குச்சாவடி திட்டத்தை கையில் எடுத்துள்ளது. ஒவ்வொரு வாக்குச்சாவடிக்கு ஒரு டார்கெட்டை நிர்ணயிக்க வேண்டும் என்று திமுக தலைவர் முதல்வர் ஸ்டாலின் உத்தரவிட்டு உள்ளார். ஆளும் திமுக தரப்பு தேர்தல் பணிகளை தீவிரமாக முன்னெடுத்து வரும் நிலையில் வாக்குச்சாவடி பணிகளை தற்போது தீவிரப்படுத்தி உள்ளது.

தமிழ்நாடு சட்டமன்ற தேர்தலை முன்னிட்டு, 'என் வாக்குச்சாவடி வெற்றி வாக்குச்சாவடி' என்கிற பிரச்சாரம் திமுக சார்பாக தொடங்கப்பட்டுள்ளது. ஒவ்வொரு வாக்கச்சாவடியிலும் திமுக நிர்வாகிகள், தொண்டர்களை உற்சாகப்படுத்துவதற்காக இந்த முன்னெடுப்பை திமுக தலைமை கையில் எடுத்துள்ளது. சென்னை தேனாம்பேட்டை அண்ணா அறிவாலயம் அருகே நேற்று நடைபெற்ற நிகழ்ச்சியில் முதலமைச்சரும், திமுக தலைவருமான மு.க. ஸ்டாலின் பங்கேற்றார்.

தமிழக முதலமைச்சரும், திமுக தலைவருமான மு.க. ஸ்டாலின், 2026 சட்டமன்றத் தேர்தலுக்குக் கட்சியைத் தயார்படுத்தும் நோக்கில் பூத் கமிட்டிக்கான இந்த பிரத்யேக இயக்கத்தை முன்னெடுத்து வருகிறார். இதன் ஒரு பகுதியாக, தனக்கு ஒதுக்கப்பட்ட 24-ஆம் எண் வாக்குச்சாவடியில் நடைபெற்ற கூட்டத்தில் அவர் பங்கேற்றார். ஆழ்வார்பேட்டை சித்தரஞ்சன் சாலையில் உள்ள இந்த வாக்குச்சாவடி, மயிலாப்பூர் சட்டமன்றத் தொகுதிக்கு உட்பட்டது.

முன்பு, காணொலிக் காட்சி மூலம் மாவட்டச் செயலாளர்களுடன் உரையாற்றியபோது, தனது வாக்குச்சாவடி கூட்டத்தில் தான் பங்கேற்கப் போவதாக ஸ்டாலின் தெரிவித்திருந்தார். அதன்படி, நேற்று (புதன்கிழமை) நடைபெற்ற இந்தக் கூட்டத்தில், தனது வாக்குச்சாவடியில் குறைந்தது 440 வாக்குகளைப் பெற வேண்டும் என்று கட்சித் தொண்டர்களுக்கு அவர் இலக்கு நிர்ணயித்தார். ஒவ்வொரு வாக்குச்சாவடி குழு உறுப்பினருக்கும் குறிப்பிட்ட பணிகளை அவர் ஒதுக்கினார்.

ஸ்டாலின் டார்கெட்

இதேபோல் ஒவ்வொரு வாக்குச்சாவடிக்கு ஒரு டார்கெட்டை நிர்ணயிக்க வேண்டும் என்று திமுக தலைவர் முதல்வர் ஸ்டாலின் கட்சி நிர்வாகிகளுக்கு உத்தரவிட்டு உள்ளார். முதலமைச்சர் ஸ்டாலின் அளித்த இந்த இலக்கை எட்டுவதற்கான வியூகங்களை வகுத்த கட்சி நிர்வாகிகள், தங்கள் திட்ட அறிக்கையை உடனடியாகக் கட்சித் தலைமைக்குச் சமர்ப்பித்தனர்.

அதேபோல, தமிழ்நாடு முழுவதும் மாநில நிர்வாகிகள் தொடங்கி அந்தந்த வாக்குச்சாவடிக்கு உட்பட்ட நிர்வாகிகள் வரை அனைவரும் அந்தந்த வாக்குசாவடி அருகே இந்த நிகழ்வில் பங்கேற்றனர். வீடு வீடாக சென்று தேர்தல் பணிகளில் ஈடுபடும் திமுக பெண் நிர்வாகிகள் அதிகளவில் பங்கேற்றனர். தேர்தலுக்கு சில மாதங்கள் மட்டுமே உள்ள நிலையில் திமுகவின் இந்த நகர்வு திமுக பூத் கமிட்டியை பலப்படுத்தி, அவர்களின் தொண்டர்களை உற்சாகத்துடன் களப்பணியில் ஈடுபடுத்தும் வகையில் இந்த முன்னெடுப்பு மேற்கொள்ளப்பட்டுள்ளது.

அமித் ஷாவிற்கு ஸ்டாலின் சவால்

இந்த நிகழ்வுகளுக்குப் பிறகு, சமூக வலைத்தளத்தில் ஒரு பதிவை வெளியிட்ட ஸ்டாலின், மத்திய உள்துறை அமைச்சர் அமித் ஷா குறித்த ஒரு கருத்தைத் தெரிவித்தார்.

எந்த ஷா வந்தாலென்ன? எத்தனை திட்டம் போட்டாலென்ன? டெல்லி பாதுஷா என்ற நினைப்போடு தமிழ்நாட்டுக்கு வர நினைத்தால், ஒவ்வொரு வாக்குச்சாவடியிலும் எங்களது கருப்பு சிவப்புப் படை உங்களுக்குத் தக்க பாடம் புகட்டும்! மிழ்நாடு என்றைக்குமே ஆணவம் பிடித்த டெல்லிக்கு Out of Control தான்! என்று குறிப்பிட்டு உள்ளார்.