முதல்வர் ஸ்டாலின் பிறந்தநாள் விழா.. சென்னையில் இன்று கூடும் அரசியல் தலைவர்கள்.. திரும்பும் பாஜக!
முதல்வர் ஸ்டாலின் பிறந்தநாள் விழாவையொட்டி இன்று சென்னையில் திமுக சார்பில் விழா நடைபெற உள்ளது. இந்த விழாவுக்கான பொதுக்கூட்டத்தில் பிற அரசியல் கட்சி தலைவர்கள் பங்கேற்க உள்ளனர்.
சென்னை: தமிழ்நாடு முதல் அமைச்சர் முக ஸ்டாலினின் 70வது பிறந்தநாள் இன்று கொண்டாடப்பட்டு வருகிறது. இந்த விழாவையொட்டி சென்னை நந்தனத்தில் இன்று மாலை ஸ்டாலின் பிறந்தநாள் பொதுக்கூட்டம் நடைபெற உள்ளது. இதில் காங்கிரஸ் கட்சியின் தேசிய தலைவர் மல்லிகார்ஜூன கார்கே, உத்தர பிரதேச முன்னாள் முதல்வர் அகிலேஷ் யாதவ் உள்பட பிற அரசியல் கட்சி தலைவர்கள் பங்கேற்க உள்ளனர். 2024ம் ஆண்டு நாடாளுமன்ற தேர்தலில் பாஜகவை வீழ்த்த எதிர்க்கட்சிகள் ஒன்றிணைய வேண்டும் என கூறப்பட்டு வரும் நிலையில் இந்த நிகழ்வு முக்கியமானதாக பார்க்கப்படுகிறது.
தமிழ்நாடு முதல்வராகவும், திமுக தலைவராகவும் இருக்கும் முக ஸ்டாலின் இன்று 70வது வயதில் அடியெடுத்து வைத்துள்ளார். இவரது பிறந்தநாளை திமுக நிர்வாகிகள் சில நாட்களுக்கு முன்பிருந்தே கொண்டாட தொடங்கி உள்ளனர்.
முதல்வராக ஸ்டாலின் பொறுப்பேற்ற பிறகு அவர் கொண்டாடும் 2வது பிறந்தநாள் இதுவாகும். இவரது பிறந்தநாளையொட்டி இன்று தமிழ்நாடு முழுவதும் சிறப்பாக கொண்டாட திமுகவினர் முடிவு செய்துள்ளனர்.
பாஜகவுக்கு எதிரான அணி
இந்நிலையில் தான் முதல்வர் ஸ்டாலினின் பிறந்தநாள் விழாவையொட்டி தேசிய அளவில் எதிர்க்கட்சி தலைவர்களை ஒன்றிணைத்து பொதுக்கூட்டம் நடத்த முடிவு செய்யப்பட்டது. 2024 நாடாளுமன்ற தேர்தலில் மத்தியில் ஆளும் பாஜகவை வீழ்த்த பல்வேறு தலைவர்கள் எதிர்க்கட்சிகளை ஒருங்கிணைக்கும் பணியில் ஈடுபட்டு வருகின்றனர். இதன் ஒரு பகுதியாக ஸ்டாலின் பிறந்தநாள் கொண்டாட்டம் அமைய வேண்டும் என திட்டமிடப்பட்டது. அதன்படி இன்று சென்னை நந்தனத்தில் பொதுக்கூட்டத்துக்கு ஏற்பாடு செய்யப்பட்டுள்ளது.
திமுக பொதுக்கூட்டம்
இதுதொடர்பாக ஏற்கனவே திமுக பொதுச்செயலாளர் துரைமுருகன் அறிவித்து இருந்தார். அதில், முக ஸ்டாலின் மார்ச் 1ம் நாள் 70வது பிறந்தநாள் கொண்டாட உள்ளார். இளைஞரணியை உருவாக்கிய காலத்தில் அதன் ஏற்றமிகு செயலாளராக வளர்ந்தார். துணைபொது செயலாளராக- பொருளாளராக - செயல் தலைவராக உயர்ந்து இன்று கழகத்தின் தன்னிகரில்லா தலைவராகச் செயல்பட்டு வருகிறார். எம்எல்ஏ, அமைச்சர், துணை முதல்வர் வரிசையில் முதல்வராக செயல்பட்டு வருகிறார்'' என புகழாரம் சூடியிருந்தார். மேலும், தலைமை கழகத்தின் சார்பில் மார்ச் 1ம் தேதி 5 மணிக்கு சென்னை நந்தனம் ஒய்எம்சிஏ மைதானத்தில் முக ஸ்டாலினின் 70வது பிறந்தநாள் விழா கொண்டாடப்பட இருக்கிறது என தெரிவித்து இருந்தார்.
கார்கே, அகிலேஷ் யாதவ் பங்கேற்பு
அதன்படி அங்கு முதல்வர் ஸ்டாலின் பிறந்தநாளையொட்டி பொதுக்கூட்டம் இன்று நடைபெற உள்ளது. இதில் அகில இந்தியத் தலைவர்கள் பங்கேற்க உள்ளனர். காங்கிரஸ் கட்சியின் தேசிய தலைவர் மல்லிகார்ஜூன கார்கே, ஜம்மு காஷ்மீர் தேசிய மாநாட்டுக் கட்சி தலைவரும் காஷ்மீர் மாநில முன்னாள் முதல்வருமான பரூக் அப்துல்லா, சமாஜ்வாதி கட்சித் தலைவரும் உத்தரப்பிரதேச மாநில முன்னாள் முதல்வருமான அகிலேஷ் யாதவ், ராஷ்ட்ரீய ஜனதா தளம் கட்சித் தலைவரும் பீகார் மாநில துணை முதல்வருமான தேஜஸ்வி யாதவ் உள்ளிட்டவர்கள் வந்து பங்கேற்க உள்ளனர்.
உற்றுநோக்கும் பாஜக
மேலும் இந்த விழாவில் பங்கேற்க தமிழ்நாட்டின் அனைத்து பகுதிகளிலும் இருந்து ஏராளமான திமுகவினர் சென்னைக்கு படையெடுத்துள்ளனர். மேலும் இதில் பாஜகவுக்கு எதிரான சித்தாந்தங்கள் கொண்ட அரசியல் கட்சி தலைவர்கள் பங்கேற்க உள்ளதால் இது தேசிய அளவில் கவனம் பெற்றுள்ளதோடு, பாஜகவும் உற்று நோக்க தொடங்கி உள்ளது என்பது குறிப்பிடத்தக்கது.
Click it and Unblock the Notifications
Sign in with Google