பாஜகவுக்கு போட்டி! பொள்ளாச்சியில் பிரம்மாண்ட திமுக பொதுக்கூட்டம்! செந்தில் பாலாஜி மும்முரம்!

கோவை: பாரதிய ஜனதா கட்சிக்கு போட்டியாக கோவை மாவட்டம் பொள்ளாச்சியில் பிரம்மாண்ட திமுக பொதுக்கூட்டத்தை நடத்த அமைச்சர் செந்தில் பாலாஜி மும்முரம் காட்டி வருகிறார்.

முதலமைச்சர் ஸ்டாலின் பங்கேற்கும் அந்த பொதுக்கூட்டத்தில் 15,000 வரை பங்கேற்பார்கள் எனத் தெரிகிறது.

அதற்கேற்றவாறு இடத்தை தேர்வு செய்து அங்கு திமுக பொதுக்கூட்டத்துக்கான முன்னேற்பாடுகளை மும்முரமாக செய்து வருகிறார் அமைச்சர் செந்தில் பாலாஜி.

கோவை மாவட்டம்

முதலமைச்சர் ஸ்டாலின் மாவட்டந்தோறும் சுற்றுப்பயணம் செய்து அரசு நலத்திட்ட உதவிகள் வழங்கும் விழாவில் கலந்துகொண்டு வருகிறார். அந்த வகையில் இம்மாதம் 15-ஆம் தேதி கோவை ஈச்சனாரி அருகே நடைபெறவுள்ள அரசு விழாவில் பங்கேற்பதற்காக 14-ஆம் தேதி மாலையே அவர் கோவை செல்கிறார். அங்கு அரசு விருந்தினர் மாளிகையில் தங்கும் அவர், கோவை தொழில்முனைவோர்களுடன் ஒரு மணி நேரம் கலந்துரையாடுகிறார்.

திமுக பொதுக்கூட்டம்

அதைத் தொடர்ந்து 15-ஆம் தேதி காலை கோவையில் அரசு விழாவில் பங்கேற்கும் முதலமைச்சர் ஸ்டாலின் அன்றைய தினம் மாலையே பொள்ளாச்சியில் ஏற்பாடு செய்யப்பட்டுள்ள திமுக அரசின் ஓராண்டு சாதனை விளக்கப் பொதுக்கூட்டத்தில் கலந்துகொண்டு பேசுகிறார். மோடி அரசின் 8 ஆண்டுகால சாதனை விளக்கப் பொதுக்கூட்டத்தை அண்மையில் தான் அங்கு பாஜக நடத்தியிருந்தது. சுமார் 10,000 பேர் வரை பங்கேற்ற அந்த பாஜக பொதுக்கூட்டத்துக்கு போட்டியாக திமுக இன்னும் பல பிரம்மாண்டத்தை காட்டவுள்ளது.

பொள்ளாச்சி தொகுதி

திமுக அரசின் ஓராண்டு சாதனை விளக்கப் பொதுக்கூட்டத்தில் 15,000 பேர் வரை பங்கேற்பார்கள் என எதிர்பார்க்கப்படுகிறது. அதற்கேற்றவாறு இடம் தேர்வு செய்யப்பட்டு நாற்காலிகள் போடப்படவுள்ளன. கோவை மாவட்ட பொறுப்பு அமைச்சர் என்கிற முறையில் இதற்கான ஏற்பாடுகளை அமைச்சர் செந்தில் பாலாஜி தொடர்ந்து கோவையில் முகாமிட்டு கவனித்து வருகிறார். பொள்ளாச்சி தொகுதியை பொறுத்தவரை திமுக எப்படியும் வெற்றிபெறும் என முதல்வர் ஸ்டாலின் எண்ணிய நிலையில் அதற்கு நேர்மாறாக தேர்தல் முடிவு வந்தது.

முதல்வர் உரை

இதனிடையே கோவை மாவட்டம் பொள்ளாச்சி நடைபெறவுள்ள திமுக பொதுக்கூட்டத்தில், அதிமுக முன்னாள் அமைச்சர் எஸ்.பி.வேலுமணியை முதல்வர் ஸ்டாலின் வெளுத்து வாங்கவுள்ளதாக தகவல்கள் வெளியாகியுள்ளன.

English summary

DMK meeting in Pollachi on July 15: பாரதிய ஜனதா கட்சிக்கு போட்டியாக கோவை மாவட்டம் பொள்ளாச்சியில் பிரம்மாண்ட திமுக பொதுக்கூட்டத்தை நடத்த அமைச்சர் செந்தில் பாலாஜி மும்முரம் காட்டி வருகிறார்.