புறம்போக்கு நிலத்தை சொந்த நிலம் என கூறும் விஜய்! ஜெயலலிதாவின் ‘டான்சி’ முறைகேடு போன்றது?
சென்னை: தமிழக முதல்வர் சி. ஜோசப் விஜய், கொடைக்கானல் வில்பட்டி கிராமத்தில் உள்ள 50 சென்ட் அரசு புறம்போக்கு நிலத்தைத் தனது சொத்தாகத் தேர்தல் பிரமாணப் பத்திரத்தில் காட்டியுள்ளார் என சென்னை உயர்நீதிமன்றத்தில் தேர்தல் வழக்கு தொடரப்பட்டுள்ளது. இந்த விவகாரம் அரசியல் வட்டாரங்களில் மறைந்த முன்னாள் முதல்வர் ஜெயலலிதா மீதான புகழ்பெற்ற 'டான்சி' (TANSI) நில வழக்கோடு ஒப்பிட்டுப் பேசப்படுகிறது.
மேலோட்டமாகப் பார்த்தால் இரண்டுமே "அரசு நிலம் மற்றும் முதல்வர்கள் மீதான சர்ச்சை" போலத் தோன்றினாலும், சட்டப்படியும் வழக்கின் தன்மையிலும் இரண்டுக்கும் இடையே சில வேறுபாடுகள் மட்டுமே உள்ளன.
மறைந்த ஜெயலலிதாவின் 'டான்சி வழக்கு' என்பது என்ன?
1991-1996 காலகட்டத்தில் அதிமுக ஆட்சியில் இருந்தபோது, தமிழக அரசுக்குச் சொந்தமான 'டான்சி' (தமிழ்நாடு சிறுதொழில் வளர்ச்சிக் கழகம்) நிறுவனத்திற்குச் சொந்தமான நிலங்கள் தனியாருக்கு விற்கப்பட்டன.
முதல்வராக அதிகாரத்தில் இருந்துகொண்டே, அரசுக்குச் சொந்தமான 3 ஏக்கருக்கும் அதிகமான தொழிற்சாலை நிலத்தை, வழிகாட்டி மதிப்பை விட மிகக் குறைந்த விலைக்குத் தனது 'ஜெயா பப்ளிகேஷன்ஸ்' மற்றும் 'சசி எண்டர்பிரைசஸ்' நிறுவனங்கள் மூலம் வாங்கினார் என்பது ஜெயலலிதா மீதான பிரதான குற்றச்சாட்டு.
அரசுப் பதவியைத் தவறாகப் பயன்படுத்தி பொதுச் சொத்தை அடிமாட்டு விலைக்கு வாங்கியதாக ஊழல் தடுப்புச் சட்டம் மற்றும் கூட்டுச் சதிப் பிரிவுகளின் கீழ் சிபிசிஐடி வழக்கு பதிவு செய்தது. இந்த வழக்கில் தொடக்கத்தில் விசாரணை நீதிமன்றத்தால் ஜெயலலிதாவுக்கு சிறைத் தண்டனை விதிக்கப்பட்டது. அதனால் 2001-ல் அவர் முதல்வர் பதவியில் இருந்து விலக நேரிட்டது. பின்னர் சென்னை உயர்நீதிமன்றமும், 2003-ல் உச்ச நீதிமன்றமும் போதிய ஆதாரங்கள் இல்லை எனக் கூறி அவரை விடுதலை செய்தன.
முதல்வர் விஜய் மீதான தற்போதைய புகார் என்ன?
2026 சட்டப்பேரவைத் தேர்தலில் பெரம்பூர் தொகுதியில் போட்டியிட்டு வென்ற முதல்வர் விஜய் மீது எஸ். தினேஷ் என்ற வாக்காளர் தொடர்ந்துள்ள தேர்தல் வழக்கில் வில்பட்டி நிலம் முக்கிய இடத்தைப் பிடித்துள்ளது.
கொடைக்கானல் வில்பட்டி கிராமத்தில் 50 சென்ட் நிலத்தை 1997-ல் ரூ.30,000-க்கு வாங்கியதாகவும், அதன் தற்போதைய மதிப்பு ரூ.20 லட்சம் என்றும் விஜய் வேட்புமனுவில் குறிப்பிட்டுள்ளார். ஆனால், கிராமத்தின் 'ஏ' பதிவேட்டின்படி (A-Register) அது அரசு புறம்போக்கு நிலம் என மனுதாரர் வாதிடுகிறார்.
இதற்குப் பதிலளித்துள்ள விஜய் தரப்பு, 1997-ல் கிரயம் செய்யப்பட்ட சொத்து ஆவணங்களின் அடிப்படையில் விவரங்கள் தெரிவிக்கப்பட்டுள்ளன என்றும், ஏதேனும் வகைப்பாட்டு முரண்பாடுகள் இருந்தால் அது தேர்தல் முடிவை மாற்றாது என்றும், வேண்டுமென்றே எந்தத் தகவலையும் மறைக்கவில்லை என்றும் வாதிட்டு வருகிறது.
இரண்டு வழக்குகளுக்கும் இடையிலான நேரடி ஒப்பீடு
முதலாவதாக, வழக்கின் சட்டப் பிரிவில் மிகப்பெரிய வித்தியாசம் உள்ளது. ஜெயலலிதா மீதான டான்சி வழக்கு என்பது இந்திய தண்டனைச் சட்டம் மற்றும் ஊழல் தடுப்புச் சட்டத்தின் கீழ் தொடரப்பட்ட கிரிமினல் ஊழல் வழக்காகும். ஆனால் முதல்வர் விஜய் மீதான விவகாரம், மக்கள் பிரதிநிதித்துவச் சட்டத்தின் கீழ் தேர்தல் வேட்புமனுவில் தகவல் பிழை உள்ளதா என்பதை மட்டுமே ஆராயும் சிவில் தேர்தல் வழக்காகும்.
இரண்டாவதாக, அதிகாரத் துஷ்பிரயோகக் காரணியைப் பார்த்தால், ஜெயலலிதா முதலமைச்சராகப் பதவியில் அமர்ந்திருந்த காலத்திலேயே அரசாங்கத்தின் நிறுவனத்திற்குச் சொந்தமான நிலத்தைத் தனது சொந்த நிறுவனத்தின் பெயருக்குக் குறைந்த விலையில் வாங்கினார் என்ற புகார் எழுந்தது. மாறாக, முதல்வர் விஜய் இந்த வில்பட்டி நிலத்தை வாங்கியது 1997-ல், அதாவது அவர் தீவிர அரசியலுக்கு வருவதற்குப் பல ஆண்டுகளுக்கு முன்பு, ஒரு தனிநபர் திரைப்பட நடிகராக இருந்த காலகட்டத்திலாகும்.
மூன்றாவதாக, வழக்கின் மையப் பொருளை ஒப்பிடும்போது, டான்சி விவகாரத்தில் அரசு சொத்து முறைகேடாக விற்கப்பட்டு அரசு கருவூலத்திற்குப் பல கோடி ரூபாய் நிதி இழப்பு ஏற்படுத்தப்பட்டதாகக் கூறப்பட்டது. ஆனால் விஜய் விவகாரத்தில், 1997-ல் பதிவு செய்யப்பட்ட நிலம் வருவாய்த்துறை ஆவணங்களில் புறம்போக்கு என்று குறிப்பிடப்பட்டுள்ளதா, அந்த விவரத்தைத் தேர்தல் படிவத்தில் சொந்த நிலம் என்று தவறாகக் காட்டினாரா என்ற ஆவணக் குளறுபடி மட்டுமே கேள்விகுறியாக உள்ளது.
Click it and Unblock the Notifications
Sign in with Google
