"புளிப்பு சுவை பிடித்தது" இந்திரஜாவுக்கு 5 வது மாத வளைகாப்பு.. பூரிப்பில் ரோபோ சங்கர் குடும்பம்!

Updated: Sunday, October 20, 2024, 22:29 [IST]

Subscribe to Oneindia Tamil

சென்னை: கடந்த மார்ச் மாதம் காமெடி நடிகர் ரோபோ சங்கரின் மகள் இந்திரஜா - கார்த்திக் ஜோடிக்கு திருமணம் நடைபெற்றது. இந்த நிலையில் இந்திரஜா இன்று தனது இன்ஸ்டாகிராம் பக்கத்தில் ஐந்தாம் மாத வளைகாப்பு புகைப்படங்களை பகிர்ந்துள்ளார்.

சின்னத்திரைகளில் காமெடிகளில் கலக்கிய ரோபோ சங்கர் தற்போது வெள்ளித்திரையிலும் காமெடி நடிகராக வலம் வந்து கொண்டு இருக்கிறார். ஆரம்பத்தில் மேடை நாடகங்களில் மூலம் தன்னுடைய பயணத்தை தொடங்கிய ரோபோ சங்கர், தனது அசாத்திய காமெடி திறனால், பல கஷ்டங்களை தாண்டி இன்று புகழின் உச்சத்தை எட்டியிருக்கிறார்.

ரோபோ சங்கருக்கு இந்திரஜா சங்கர் என்ற மகள் உள்ளார். நடிகர் விஜய் நடித்த பிகில் படத்தில் முக்கிய கதாப்பாத்திரத்தில் இந்திரஜா நடித்து இருந்தார். அவருடைய நடிப்பும் பெரிய அளவில் பிகில் படத்தில் பேசப்பட்டது. பிகில் படத்தில் பாண்டியம்மா என்ற இந்திரஜாவின் கேரக்டர் பெரிய அளவில் பேசப்பட்டது. வெள்ளித்திரையில் முன்னணி நடிகையாக வலம் வருவார் என ரசிகர்கள் எதிர்பார்த்த நிலையில், கடந்த சில மாதங்களுக்கு முன்பாக தனது மாமாவான கார்த்திக் என்பவரை இந்திரஜா திருமணம் செய்து கொண்டார்.

கடந்த மார்ச் மாதம் பிரம்மாண்டமாக இந்திரஜா - கார்த்திக் ஜோடி திருமணம் நடைபெற்றது. இந்த திருமணத்தில் நடிகர் கமல்ஹாசன், நயன்தாரா, சூர்யா, ஜோதிகா என்று அதிகமான பிரபலங்களும், அரசியல் பிரமுகர்களும் கலந்து கொண்டனர். திருமணத்திற்கு பிறகு விஜய் டிவியில் ஒளிபரப்பாகி வந்த மிஸ்டர் அண்ட் மிஸ்ஸஸ் சின்னத்திரை நிகழ்ச்சியில் இருவரும் கலந்து கொண்டனர்.

அந்த நிகழ்ச்சியிலேயே இந்திரஜாவின் கணவர் கார்த்திக், நாங்கள் இருவருமே அப்பா -அம்மா ஆகப் போகிறோம் என்று அறிவித்தார். கடந்த ஆகஸ்ட் மாதம் தனது கர்ப்பத்தை அறிவித்த நிலையில், இந்திரஜா இன்று தனது இன்ஸ்டாகிராம் பக்கத்தில் ஐந்தாம் மாத வளைகாப்பு புகைப்படங்களை பகிர்ந்துள்ளார்.

புளிப்பு சுவை பிடித்து, குழந்தையின் இதயத்துடிப்பை அறிந்து ரசித்த நாள்... 5 ஆம் மாதம் பூச்சூடல் விழா என்ற கேப்ஷனும் பதிவிட்டுள்ளார். இந்த வளைகாப்பு நிகழ்ச்சியில் நெருங்கிய உறவினர்கள் மட்டுமே கலந்து கொண்டுள்ளனர். இந்திரஜாவுக்கு ரசிகர்கள் வாழ்த்து தெரிவித்து வருகிறார்கள்.