விஜய் ஆதரவு தந்தால் போதும்.. 5% கூடுதல் வாக்கு உறுதி.. முதல்வராகலாம்! KC போடும் பிளான்! யாருங்க இது?

சென்னை: காங்கிரஸ் கட்சியின் மூத்த தலைவரான கே.சி. வேணுகோபால், நடிகர் விஜய் தொடங்கிய தமிழக வெற்றிக் கழகத்துடன் (தவெக) கூட்டணி அமைப்பதில் மிகுந்த ஆர்வம் காட்டுவதாகத் தகவல்கள் தெரிவிக்கின்றன.

வேணுகோபால், தற்போது ஆலப்புழா தொகுதியின் நாடாளுமன்ற உறுப்பினராகவும், அகில இந்திய காங்கிரஸ் கட்சியின் பொதுச் செயலாளராகவும் முக்கியப் பொறுப்புகளை வகித்து வருகிறார். தேசிய அரசியலில் நீண்ட அனுபவமும், ஐக்கிய முற்போக்குக் கூட்டணி ஆட்சியில் கேபினட் அமைச்சராகப் பணியாற்றிய அனுபவமும் கொண்ட இவர், விஜய்யின் வளர்ந்து வரும் அரசியல் செல்வாக்கை நல்ல அரசியல் வாய்ப்பாகக் கருதுகிறார்.

காங்கிரஸின் நிலையை வலுப்படுத்தும்

கட்சி வட்டாரங்களின்படி, தமிழகத்தில் விஜய்யுடன் கூட்டணி அமைப்பது காங்கிரஸின் நிலையை வலுப்படுத்தும் என்றும், புதிய அரசியல் சாத்தியங்களைத் திறக்கும் என்றும் வேணுகோபால் நம்புகிறார். இக்கூட்டணியானது கேரளாவுக்கும் நேரடிப் பலன் அளிக்கும் என அவர் கருதுகிறார்.

கேரளாவில் விஜய்க்கு ஏராளமான ரசிகர்கள் இருப்பதால், இக்கூட்டணியின் மூலம் காங்கிரஸ் கிட்டத்தட்ட 5% கூடுதல் வாக்குகளைப் பெற முடியும் என்று வேணுகோபால் நினைக்கிறார். இந்த வாக்கு அதிகரிப்பு, கேரள அரசியலில் காங்கிரஸை மீண்டும் ஆட்சிக்குக் கொண்டுவரும் என அவர் நம்புகிறார் என்று கூறப்படுகிறது.

இந்த அரசியல் கணக்குகள் வெறும் வாக்கு வங்கியைத் தாண்டிச் செல்கின்றன. கேரள முதலமைச்சராகும் நீண்டகால கனவு கொண்ட வேணுகோபால், இந்தக் கூட்டணியை அதற்கான ஒரு வழியாகப் பார்க்கிறார். விஜய்யின் செல்வாக்கு, மாநில எல்லைகளைக் கடந்து இளைஞர்கள், முதல்முறை வாக்காளர்கள், மற்றும் நடுநிலை வாக்காளர்களை இணைக்கும் பாலமாக அமையும் என்று அவருக்கு நெருக்கமான தலைவர்கள் கூறுகின்றனர். கேரள விஜய் ரசிகர்கள் மூலம் முதல்வர் ஆக முடியும் என்று அவர் நினைக்கிறார்.

தமிழகத்தில், காங்கிரஸ் - தவெக. கூட்டணி ஒரு புதிய அரசியல் சக்தியை உருவாக்கும் என்றும் வேணுகோபால் கருதுகிறார். கூட்டணி வலுவாகச் செயல்பட்டால், எதிர்கால அரசாங்கத்தில் காங்கிரஸ் தலைவர்கள் துணை முதலமைச்சர் பதவி உட்பட முக்கியப் பதவிகளைப் பெற முடியும் என்றும் அவர் எதிர்பார்க்கிறார். இதன் மூலம் கேரளா, தமிழ்நாடு, தெலுங்கானா, ஏற்கனவே உள்ள கர்நாடகாவில் ஆட்சியை பிடிக்கலாம்.

விஜய்யின் கட்சி வேகமெடுத்து வருவதாலும், தெற்கில் புதிய வாய்ப்புகளை காங்கிரஸ் தேடுவதாலும், இரு கட்சிகளின் நலன்களும் இணையும் ஒரு அரசியல் வாய்ப்பாக இதை வேணுகோபால் பார்க்கிறார் என்று கூறப்படுகிறது. அதிகாரப்பூர்வ அறிவிப்புகள் எதுவும் வெளியாகாத நிலையில், இந்தச் கூட்டணி குறித்த விவாதங்கள் இரு கட்சிகளிலும், தமிழகம் மற்றும் கேரள வாக்காளர்களிடமும் பெரும் ஆர்வத்தை ஏற்படுத்தியுள்ளன.

காங்கிரஸ் உள்ளே குழப்பம்

சட்டப்பேரவைத் தேர்தல்கள் நெருங்கி வரும் நிலையில், தமிழ்நாடு காங்கிரஸ் கமிட்டி (TNCC) தனது கூட்டணிக் கட்சியான திமுகவுடன் தொகுதிப் பங்கீடு தொடர்பாக ஒரு தீவிரமான பேரத்தை நடத்தத் தயாராகி வருகிறது. காங்கிரஸ் கட்சிக்குள் பிளவுபட்டுள்ள மூன்று வெவ்வேறு கருத்துகளால் கூட்டணி பேச்சுவார்த்தையில் சிக்கல் ஏற்படும் என்று கதர் கட்சி வட்டாரங்கள் தெரிவிக்கின்றன.

ஒரு பிரிவினர், திமுக ஒதுக்கும் எண்ணிக்கையை காங்கிரஸ் ஏற்றுக்கொள்ள வேண்டும் என்று கருதுகின்றனர். மற்றொரு பிரிவினர், 40 முதல் 45 தொகுதிகள் மற்றும் அதிகாரப் பங்கீட்டிற்காக திமுகவுடன் பேரம் பேச வேண்டும் என்று விரும்புகின்றனர். மூன்றாவது பிரிவினர், நடிகர் விஜய்யின் TVK கட்சியுடன் கூட்டணி அமைக்கும் சாத்தியக்கூறுகளை ஆராய வேண்டும் என்று கூறுவதாக காங்கிரஸ் வட்டாரங்கள் தெரிவிக்கின்றன. இதனால் காங்கிரஸ் என்ன முடிவை எடுக்கும் என்ற எதிர்பார்ப்பு எழுந்துள்ளது.