“ஆளுநர் அரசியலமைப்புக்கு எதிராக செயல்படுவதை அனுமதிக்க முடியாது" TVKவுக்கு ஆதரவாக காங்கிரஸ் போராட்டம்

சென்னை: விஜய்யை பதவியேற்க அழைப்பு விடுக்குமாறு ஆளுநரை கண்டித்து செல்வப்பெருந்தகை தலைமையில் காங்கிரஸ் சார்பில் சென்னையில் இன்று கண்டனப் போராட்டம் நடைபெற்றது. அரசியலமைப்புக்கு எதிராக ஆளுநர் செயல்படுவதை அனுமதிக்க முடியாது என செல்வப்பெருந்தகை பேசியுள்ளார்.

நடந்து முடிந்த சட்டமன்ற தேர்தலில் தமிழக வெற்றிக் கழகம் 108 இடங்களில் வெற்றி பெற்றுள்ளது. இந்த வெற்றியை தொடர்ந்து அவர்கள் ஆட்சியமைப்பார்கள் என எதிர்பார்க்கப்பட்டது. ஆனாலும் பெரும்பான்மையை நிரூபிக்க தேவைப்படும் 118 இடங்கள் தவெகவிடம் இல்லை என்பதால் என்ன நடக்கும் என்ற கேள்வியும் எழுந்தது. இதற்கிடையே காங்கிரஸ் விஜய்யின் தவெகவுடன் கூட்டணி அமைத்தது.

தான் ஆட்சியமைக்க ஆதரவு கோரி விஜய், காங்கிரஸ் உட்பட சில கட்சிகளுக்கு அழைத்து கடிதம் விடுத்தார். காங்கிரஸ் கட்சி ஆலோசனை நடத்தி விஜய்க்கு ஆதரவு தெரிவித்தது. இதன் மூலம் தற்போது தவெகவிடம் 113 இடங்கள் இருக்கின்றன. எனவே தன்னை ஆட்சியமைக்க அழைக்குமாறு விஜய் ஆளுநரை சந்தித்து கடிதம் கொடுத்தார். ஆனாலும் தனிப்பெரும்பான்மை இருப்பதாகச் சொல்லவில்லை எனக் கூறி அவரை பதவியேற்க ஆளுநர் அழைக்கவில்லை.

இதற்கு பல்வேறு தரப்புகளில் இருந்தும் எதிர்ப்புகள் கிளம்பியுள்ளன. குறிப்பாக விஜய்க்கு ஆதரவு தெரிவித்து வரும் காங்கிரஸ் கட்சியினர் தொடர்ந்து கண்டனங்களை தெரிவித்து வருகின்றனர். அந்த வகையில் சென்னையில் காங்கிரஸ் சார்பில் ஆளுநர் மற்றும் பாஜகவை கண்டித்து ஆர்ப்பாட்டம் நடத்தப்பட்டது. இந்த ஆர்ப்பாட்டத்தில், தமிழக காங்கிரஸ் பொறுப்பாளர் கிரிஷ் சோடங்கர், தொண்டர்கள் கலந்துகொண்டு கோஷமிட்டனர். தவெகவை ஆட்சி அமைக்க வருமாறு ஆளுநர் அர்லேகர் அழைக்க வேண்டும் என காங்கிரஸ் கட்சியினர் வலியுறுத்தினர்.

தமிழ்நாடு காங்கிரஸ் தலைவர் செல்வப்பெருந்தகை பேசுகையில், 2026 தமிழ்நாடு சட்டமன்றத் தேர்தலில் தனிப்பெரும் கட்சியாக தமிழக வெற்றிக் கழகம் வெற்றி பெற்றுள்ளது. ஆனாலும் தவெக ஆட்சி அமைக்க கூடாது என்ற நோக்கத்தில் இந்திய அரசியலமைப்பு சட்டத்திற்கு எதிராக பாஜக மற்றும் அவர்களின் கைப்பாவையாக ஆளுநர் செயல்படுகிறார். அவர்களின் இந்த செயல்பாட்டை கண்டித்து மாவட்ட தலைநகரங்களில் காங்கிரஸ் சார்பாக மாபெரும் கண்டன ஆர்ப்பாட்டம் நடத்தப்படுகிறது" எனத் தெரிவித்தார்.

English summary

Led by Selvaperunthagai, the Congress party staged a protest in Chennai today, condemning the Governor for failing to invite Vijay to assume office. Selvaperunthagai asserted that the Governor cannot be permitted to act in violation of the Constitution.