வறண்ட வானிலைக்கு நடுவே ஜில் அறிவிப்பு..2 நாட்களுக்கு மழை..எங்கு குடை அவசியம் தெரியுமா?

தமிழகம் முழுவதும் வறண்ட வானிலை நிலவுகிறது. கடந்த 24 மணி நேரத்தில் ஈரோட்டில் அதிகபட்சமாக 36.8 டிகிரி செல்சியஸ் வெப்பநிலை பதிவாகியுள்ளது.

சென்னை: தமிழகம் முழுவதும் வறண்ட வானிலை நிலவி வரும் நிலையில் இரண்டு நாட்களுக்கு லேசான மழை பெய்ய வாய்ப்பு உள்ளதாக சென்னை வானிலை ஆய்வு மையம் அறிவித்துள்ளது. தென் தமிழக கடலோர மாவட்டங்கள், டெல்டா மாவடங்கள் மற்றும் காரைக்கால் பகுதிகளில் மிதமான மழைக்கு வாய்ப்பு உள்ளதாக வானிலை ஆய்வு மையம் அறிவித்துள்ளது.

தமிழகத்தில் தென்மேற்குப் பருவமழையும், வடகிழக்குப் பருவமழையும் சரியான அளவு பெய்துள்ளதால் நீர் நிலைகள் நிரம்பி வழிகின்றன. கடந்த ஜனவரி மாதத்துடன் வடகிழக்குப் பருவமழை முடிவுக்கு வந்த பின்னர் பனிக்காலம் தொடங்கி விட்டது. மூடு பனி ஒருபக்கம் அதிகரிக்க குளிரும் வாட்டி வதைத்தது.

கடந்த சில நாட்களாகவே வெயில் சுள்ளென்று அடிக்கிறது. வழக்கமாக மார்ச் மாத மத்தியில்தான் வெயிலின் தாக்கம் அதிகரிக்கும். சித்திரை மாதத்தில் அக்னி நட்சத்திர காலத்தில் வெயிலின் தாக்கம் கடுமையாகவே இருக்கும்.

இந்த சூழ்நிலையில் கடந்த சில நாட்களாவே வெயில் கோடை காலத்தைப் போல சுட்டெரிக்கிறது. தமிழகம் முழுவதும் வறண்ட வானிலை நிலவுகிறது. கடந்த 24 மணி நேரத்தில் ஈரோட்டில் அதிகபட்சமாக 36.8 டிகிரி செல்சியஸ் வெப்பநிலை பதிவாகியுள்ளதாக வானிலை ஆய்வு மையம் வெளியிட்டுள்ள அறிவிப்பில் தெரிவிக்கப்பட்டுள்ளது.

சென்னை வானிலை ஆய்வு மையம் இன்று வெளியிட்டுள்ள அறிவிப்பில், இன்று முதல் 26ஆம் தேதி வரைக்கும் தமிழ்நாடு, புதுச்சேரி மற்றும் காரைக்கால் பகுதிகளில் பொதுவாக வறண்ட வானிலை நிலவக்கூடும். 27, 28ஆம் தேதிகளில் தென் தமிழக கடலோர மாவட்டங்கள், டெல்டா மாவடங்கள் மற்றும் காரைக்கால் பகுதிகளில் ஓரிரு இடங்களில் லேசானது/ மிதமான மழை பெய்யக்கூடும் என தெரிவிக்கப்பட்டுள்ளது.

சென்னையை பொறுத்தவரை அடுத்த இரு தினக்களுக்கு வானம் ஓரளவு மேகமூட்டத்துடன் காணப்படும் என கூறப்பட்டுள்ளது. மீனவர்களுக்கான எச்சரிக்கை ஏதுமில்லை என்று அதில் கூறப்பட்டுள்ளது.

வெயிலின் தாக்கம் கடுமையாக உள்ள நிலையில் மழைக்கு வாய்ப்பு உள்ளதாக வானிலை ஆய்வு மையம் ஜில் அறிவிப்பை வெளியிட்டுள்ளது.

English summary

The Chennai Meteorological Department has announced that there is a possibility of light rain for two days while the dry weather is prevailing across Tamil Nadu. The Meteorological Department has announced that there is a possibility of moderate rain in the coastal districts of South Tamil Nadu, delta districts and Karaikal.