‛சுரேஷ் ரெய்னா'.. தமிழ் சினிமாவில் ஹீரோவாகும் ‛சின்ன தல'.. இயக்குநர் - இசையமைப்பாளர் யார் தெரியுமா?
சென்னை: இந்தியா மற்றும் சென்னை சூப்பர் கிங்ஸ் அணியின் முன்னாள் வீரரான சுரேஷ் ரெய்னா தமிழில் ஹீரோவாக அறிமுகம் ஆகிறார். இந்த திரைப்படத்துக்கு இன்னும் பெயர் வைக்காத நிலையில் சந்தோஷ் நாராயணன் இசையமைக்கிறார். இந்த திரைப்படம் குறித்த முக்கிய விவரங்கள் வெளியாகி உள்ளது.
இந்திய கிரிக்கெட் அணியின் மிடில் ஆர்டர் பேட்ஸ்மேனாக வலம் வந்தவர் சுரேஷ் ரெய்னா. ஐபிஎல்லில் சென்னை சூப்பர் கிங்ஸ்(சிஎஸ்கே) அணிக்காக நீண்ட காலமாக விளையாடினார்.
சென்னை சூப்பர் கிங்ஸ் (சிஎஸ்கே) அணியின் கேப்டன் தோனிக்கு, அடுத்ததாக சுரேஷ் ரெய்னாவுக்கு அதிக ரசிகர்கள் இருந்தனர். தோனியை தல எனவும், சுரேஷ் ரெய்னாவை சின்ன தல எனவும் ரசிகர்கள் அழைத்தனர். அதன்பிறகு சுரேஷ் ரெய்னாவை சிஎஸ்கே அணி புறக்கணித்தது. ஏலத்திலும் எடுக்கவில்லை.
தற்போது சுரேஷ் ரெய்னா ஓய்வில் உள்ளார். இதற்கிடையே தான் சுரேஷ் ரெய்னா தமிழ் சினிமாவில் ஹீரோவாக அறிமுகம் ஆகிறார். இந்த படத்துக்கான அறிமுக நிகழ்ச்சி சென்னையில் நேற்று நடந்தது. இதில் சிஎஸ்கே வீரர் ஷிவம் துபே பங்கேற்று படத்தின் அறிமுக வீடியோவை வெளியிட்டார்.
இந்த விழாவில் சுரேஷ் ரெய்னா வீடியோ கால் மூலமாக பங்கேற்றார். அவர் நேரில் வரவில்லை. தற்போது சுரேஷ் ரெய்னா குடும்பத்துடன் வெளிநாட்டில் உள்ளதால் அவரால் நேரில் பங்கேற்க முடியவில்லை. இந்த விழாவில் சுரேஷ் ரெய்னா பேசும்போது, ‛‛ இது ஒரு கிரிக்கெட் சார்ந்த படம் என்பதால் தமிழ்நாட்டிலிருந்து தொடங்க வேண்டும். ஏனென்றால் நாங்கள் பல ஆண்டுகளாக சிஎஸ்கேவுக்காக சென்னையில் நிறைய போட்டிகளில் விளையாடி இருக்கிறோம். எங்கள் மீது தமிழக மக்களுக்கு நிறைய அன்பு, விருப்பம் மற்றும் நிறைய பாசம் உள்ளது'' என்றார்.
இதன்மூலம் இந்த திரைப்படத்தின் கதைக்களம் கிரிக்கெட்டை மையப்படுத்தி இருக்கும் என்பதை சுரேஷ் ரெய்னா உறுதி செய்துள்ளார். இந்த படத்துக்கு இன்னும் பெயர் வைக்கவில்லை. ட்ரீம் நைட் ஸ்டோரீஸ் என்ற நிறுவனம் இந்த படத்தை தயாரிக்கிறது. புதுமுக இயக்குநர் லோகன் படத்தை இயக்குகிறார். சுரேஷ் ரெய்னா ஹீரோவாக ஜொலிக்க சந்தோஷ் நாராயணன் இசையமைக்க உள்ளார்.
இந்த விழாவில் இயக்குநர் மோகன் ராஜா, நடிகர் சதீஷ் உள்பட பலர் பங்கேற்றனர். ஏற்கனவே முன்னாள் இந்திய கிரிக்கெட் வீரரான ஹர்பஜன் சிங் தமிழில் ஹீரோவாக அறிமுகம் ஆன நிலையில் தற்போது சுரேஷ் ரெய்னாவும் தமிழில் ஹீரோவாக களமிறங்குவது குறிப்பிடத்தக்கது. இவர்கள் இருவருமே சென்னை சூப்பர் கிங்ஸ் அணியில் இடம்பெற்றவர்கள் என்பது குறிப்பிடத்தக்கது.
Click it and Unblock the Notifications
Sign in with Google