இன்று முதல் சமையல் சிலிண்டர் விலை குறைப்பு அமல்.. சென்னை சிலிண்டரின் விலை எவ்வளவு?

சென்னை: மகளிர் தினத்தையொட்டி நாடு முழுவதும் வீட்டு உபயோகத்துக்கான சிலிண்டர் விலை ரூ 100 குறைப்பு என பிரதமர் நரேந்திர மோடி அறிவித்த நிலையில் அது இன்று முதல் அறிமுகமாகிறது.

சர்வதேச சந்தையில் கச்சா எண்ணெய் விலை மற்றும் டாலருக்கு நிகரான இந்திய ரூபாய் மதிப்பு ஆகியவற்றை கொண்டுதான் பெட்ரோல், டீசல், சிலிண்டர் விலையை எண்ணெய் நிறுவனங்கள் மாதந்தோறும் நிர்ணயித்து வருகின்றன.

இந்த நிலையில் கடந்த ஓராண்டுக்கும் மேலாக பெட்ரோல், டீசல் விலை எந்த மாற்றமும் இல்லாமல் அதே விலை நீடித்து வருகிறது. அதுபோல் வீட்டு உபயோகத்திற்கான எரிவாயு சிலிண்டர் விலை கடந்த சில மாதங்களாக எவ்வித மாற்றமும் இல்லாமல் விற்பனை செய்யப்பட்டு வருகிறது.

வர்த்தக பயன்பாட்டுக்கான சிலிண்டர் விலை மட்டும் அவ்வப்போது உயர்ந்தும் குறைந்தும் விற்பனை செய்யப்பட்டு வருகிறது. அந்த வகையில் நாடு முழுவதும் 19 கிலோ எடை கொண்ட வணிக பயன்பாட்டுக்கான சிலிண்டர் விலை மார்ச் 1 ஆம் தேதி 19 ரூபாய் உயர்த்தப்பட்டது.

இதனால் சென்னையில் வணிக பயன்பாட்டுக்கான சிலிண்டர் ஒன்று ரூ 1,960க்கு விற்பனை செய்யப்படுகிறது. எனினும் வீட்டு சமையல் எரிவாயு சிலிண்டர் விலையில் எந்த மாற்றமும் செய்யப்படவில்லை. சென்னையில் வீட்டு உபயோக சமையல் எரிவாயு சிலிண்டர் விலை தற்போது ரூ 918.50 க்கு விற்பனை செய்யப்படுகிறது.

இந்த நிலையில் வீட்டு உபயோகத்திற்கான சிலிண்டர் விலை ரூ 100 குறைக்கப்படும் என பிரதமர் மோடி அறிவித்தார். மகளிர் தினத்தையொட்டி அவர் தனது எக்ஸ் வலைதளத்தில் கூறியிருப்பதாவது: மகளிர் தினத்தை முன்னிட்டு சிலிண்டர் விலையை ரூ 100 குறைக்க மத்திய அரசு முடிவு செய்துள்ளது. இந்த முடிவு நாடு முழுவதும் பல லட்சம் மக்களின் குடும்ப நிதிச் சுமையை பெருமளவு குறைக்கும்.

குறிப்பாக பெண் சக்திக்கு வலிமை தரும். சமையல் எரிவாயு சிலிண்டரை மேலும் எளிதாக வாங்கும் நிலையை உருவாக்குவதற்கு மூலம் குடும்பங்களின் நலனை உறுதி செய்வதோடு, ஆரோக்கியமான சுற்றுச்சூழலையும் உருவாக்கலாம். பெண்களுக்கு வலிமை சேர்ப்போம் என்ற எங்களது வாக்குறுதிக்கு ஏற்பவும் பெண்களின் வாழ்க்கையை எளிதாக்குவதை உறுதிப்படுத்தும் வகையிலும் இந்த அறிவிப்பு வெளியிடப்படுவதாக பிரதமர் தெரிவித்திருந்தார்.

இந்த நிலையில் இந்த விலை குறைப்பு இன்று முதல் அமலுக்கு வருகிறது. சென்னையில் இதுவரை ரூ 918.50 க்கு விற்பனை செய்யப்பட்ட சமையல் எரிவாயு சிலிண்டர் இனி ரூ 100 குறைந்து ரூ 818.50 க்கு விற்பனை செய்யப்படும். இந்த விலை மாநிலத்திற்கு மாநிலம் மாறுபடும். கடந்த ஆண்டு ரக்ஷா பந்தனின் போது வீட்டு உபயோக சிலிண்டர் விலையை ரூ 200 குறைத்தார் பிரதமர் மோடி.

இந்த நிலையில் மக்களவை தேர்தல் விரைவில் நடைபெறவுள்ள நிலையில் சிலிண்டர் விலை குறைக்கப்பட்டிருப்பது எதிர்க்கட்சிகளின் விமர்சனத்திற்குள்ளாகியுள்ளது. ஏன் 10 ஆண்டுகளாக மகளிர் தினமே வரவில்லையா என நாம் தமிழர் கட்சியின் தலைமை ஒருங்கிணைப்பாளர் சீமான் கேள்வி எழுப்பியிருந்தார்.

English summary

Domestic cylinder price reduce will implement from today. Rs 818.50 will be the price for Cylinder.