Exclusive 3 மேட்டர்.. சீனியர்களை ஓரங்கட்டும் திமுக தலைமை! பிளான் என்ன? புட்டு புட்டு வைக்கும் புள்ளி
சென்னை: திமுகவில் சீனியர்களை உதயநிதி ஸ்டாலின் ஓரம்கட்ட நினைக்கிறார் என்றும், திமுக தலைமையின் விருப்பத்தை ரஜினிகாந்த் வெளிப்படுத்தி இருக்கிறார் என்றும் கூறியுள்ளார் மூத்த பத்திரிகையாளர் மணி. சீனியர்களை வம்படியாக ஒதுக்க நினைத்தால் சேதாரம் பெரிதாக இருக்கும் என்றும் எச்சரித்துள்ளார். அவரது பிரத்யேக பேட்டியை பார்க்கலாம்.
சென்னையில் சமீபத்தில் நடந்த திமுக அமைச்சர் எ.வ.வேலு புத்தக வெளியீட்டு விழாவில் ரஜினிகாந்த் பேசிய விஷயத்தால் பெரும் களேபரம் ஏற்பட்டது. ஓல்டு ஸ்டூடண்ட்ஸ் வகுப்பை விட்டு செல்லாமல் இருக்கிறார்கள், அவர்களை சமாளிப்பது கடினம் என திமுகவில் இருக்கும் சீனியர்கள் பற்றி பேசினார் ரஜினிகாந்த். இதற்கு துரைமுருகன் பதிலடி கொடுத்தார்.
திமுகவில் வெடித்துள்ள பூசல்: இந்த விவகாரத்தில் அதிமுக தரப்பு ஒரு முக்கிய பாயிண்டை பிடித்தது. தான் வெளிப்படையாக பேச முடியாமல் ரஜினியை வைத்து திமுகவில் உள்ள சீனியர்களை ஓரங்கட்ட முதலமைச்சர் ஸ்டாலின் நினைக்கிறார் என அதிமுகவினர் கூறினர். அதை மெய்ப்பிக்கும் வகையில் அமைச்சர் உதயநிதி பேச்சும், முரசொலி தலையங்கமும் இருந்தன. திமுகவில் ஏற்பட்டுள்ள இந்த பிரச்சனை இன்னும் அணையாமல் புகைகிறது. இந்நிலையில் இதுதொடர்பாக ஒன் இந்தியா தமிழுக்கு பிரத்யேக பேட்டி அளித்துள்ளார் மூத்த பத்திரிகையாளர் மணி.
மூத்த பத்திரிகையாளர் பேட்டி: மூத்த பத்திரிகையாளர் மணி கூறுகையில், "திமுகவில் சீனியர்களை ஓரங்கட்ட கட்சி தலைமை விரும்புவது தெளிவாகத் தெரிகிறது. ரஜினிகாந்த், திமுக தலைமை சொல்லிக் கொடுத்து பேசினாரா என்பதை தாண்டி, ரஜினி பேசியதை திமுக தலைமை ரசிக்கிறது என்பதற்கு 3 உதாரணங்களைச் சொல்ல முடியும். ரஜினிகாந்த் பேச்சை முதல்வர் ஸ்டாலின் என்றைக்கும் இல்லாத அளவுக்கு ரொம்பவே சிரித்து ரசித்தார்.
3 விஷயங்கள்: ரஜினிகாந்த் எந்த யோசனையும் சொல்லாதபோதே, உங்கள் யோசனையை ஏற்கிறேன் என முதல்வர் ஸ்டாலின் சொல்கிறார். சீனியர்களுக்காக வாதாடவில்லை. சீனியர்கள் சீட்டை பிடித்திருப்பதாக ரஜினி பேசுவதை ஏற்பதாகச் சொல்கிறார் ஸ்டாலின். அடுத்த நாள் திமுக பொறியாளர் அணி கூட்டத்தில் பேசிய உதயநிதி ஸ்டாலின், சீனியர்கள் இளைஞர்களுக்கு வழிவிட்டு விலகி புதியவர்களின் கை பிடித்து அழைத்துச் செல்ல வேண்டும் என்கிறார்.
இவர்களின் ஆசிர்வாதத்தோடு தான் ரஜினி பேசி இருக்கிறார் என்பதற்கு இதுவே சான்று. ரஜினிகாந்த் பேச்சை முரசொலி தலையங்கமும் ஆதரித்து எழுதுகிறது. யார் சொல்லி ரஜினி இப்படி பேசினார் என்பதை இதன் மூலமாகவே புரிந்து கொள்ளலாம். திமுகவில் சீனியர்களை ஓரங்கட்டுவது பெரிய பிரச்சனையாகவே எழுந்து உள்ளது.
ரஜினி தானாக பேசவில்லை: திமுக உள்விவகாரத்தை ரஜினிகாந்த் தன்னிச்சையாக பேசியிருப்பார் என நான் நம்பவில்லை. அவர் யாருடைய தூண்டுதலின் பேரில் தான் பேசி இருக்கக்கூடும். இந்த பேச்சு இவ்வளவு பெரிய பிரச்சனை ஆகும் என ரஜினிகாந்த் எதிர்பார்த்திருக்க மாட்டார். திமுகவிற்குள் சீனியர்கள் பிரச்சனை விஸ்வரூபம் எடுத்திருப்பது ஸ்டாலினின் சிரிப்புடன் கூடிய ஏற்பு, உதயநிதியின் பேச்சு, முரசொலி தலையங்கம் ஆகியவற்றின் மூலம் வெளிப்படையாகி இருக்கிறது.
உதயநிதி எண்ணம்: திமுகவின் அடுத்த முகம் உதயநிதி ஸ்டாலின் என்பது உறுதிப்படுத்தப்பட்டு விட்டது. விஜய் அரசியலுக்கு வரும் நேரத்தில், இனி சீனியர்களுடன் தன்னால் பணியாற்ற முடியாது, தனக்கு ஒரு இளம் படை வேண்டும் என்று உதயநிதி நினைக்கிறார். ஆனால், இந்த சீனியர்கள் தான் திமுக கூட்டணி 40க்கு 40 வெற்றி பெற்றிருக்க முடியாது.
திருச்சியில் தனி சின்னத்தில் நின்ற துரை வைகோ, கே.என்.நேரு இல்லாமல் ஜெயித்திருக்க முடியாது. திண்டுக்கல்லில் ஐ.பெரியசாமி இல்லாமல் சிபிஐஎம் ஜெயித்திருக்க முடியாது. இன்று சீனியர்கள் வழிவிட வேண்டும் என பேசும் உதயநிதி கடந்த பிப்ரவரி மாதம் இதை பேசி இருக்கலாமே?
சேதாரம் பெரிதாக இருக்கும்: திமுகவை பொறுத்தவரை சீனியர்கள் குறுநில மன்னர்கள் தான். அதிமுகவில் ஜெயலலிதா யாரை வேண்டுமானாலும் அமைச்சரவையில் இருந்து தூக்குவார்.. ஏன் கட்சி பதவியையும் கூட பறிப்பார். ஆனால் திமுகவில் ஒரு அமைச்சரின் பி.ஏவை கூட மாற்ற முடியாது. இதுதான் திமுகவின் கட்சி அமைப்பு. இப்படி இருக்கும்போது ஒரே இரவில் சீனியர்களை தூக்கி வீச நினைத்தால், கட்சி அதற்குரிய விலையை கொடுக்க வேண்டி இருக்கும்.
உதாரணத்திற்கு, கே.என்.நேருவை வலுக்கட்டாயமாக ஓரங்கட்ட நினைத்தால், திருச்சியை யார் பொறுப்பில் ஒப்படைப்பீர்கள்? அன்பில் மகேஷ் பொய்யாமொழியால், கே.என்.நேருவை போல திருச்சியை கைக்குள் வைத்துக்கொள்ள முடியுமா? முடியாது. சேதாரம் அதிகமாக இருக்கும். இன்றைக்கு ரஜினியின் பேச்சு சீனியர்களை காயப்படுத்தி உள்ளது. துரைமுருகன் அதில் பொறுமிவிட்டார். சீனியர்களை திமுக கையாளும் விதம் தவறு." எனத் தெரிவித்துள்ளார்.
Click it and Unblock the Notifications
Sign in with Google