ஏமாற்று வார்த்தை வேண்டாம்.. உறுதி கொடுக்க ரெடியா? அமித் ஷாவுக்கு திமுக எம்.பி தயாநிதி மாறன் கேள்வி!
சென்னை: மக்களவையில் தமிழ்நாட்டின் பிரதிநிதித்துவ விகிதம் 7.18 சதவீதத்தில் எந்த மாற்றமும் இருக்காது என்ற உத்தரவாதத்தை சட்டப்படி அளிக்க உள்துறை அமைச்சர் அமித்ஷா தயாரா? என திமுக எம்.பி தயாநிதி மாறன் கேள்வி எழுப்பியுள்ளார்.
மத்திய பாஜக அரசு, தொகுதி மறுசீரமைப்பில் ஈடுபடப் போவதாக தகவல் வெளியாகி வருகிறது. அதன்படி, மக்கள்தொகை பெருக்கத்தை கட்டுப்படுத்திய தென் மாநிலங்களில் ஏற்கனவே உள்ள தொகுதிகளை குறைத்தும், வட மாநிலங்களில் தொகுதியை அதிகரிக்கும் நடவடிக்கையில் இறங்கியுள்ளதாக திமுக உள்ளிட்ட எதிர்க்கட்சிகள் குற்றம்சாட்டி வருகின்றன.
திமுக தலைவரும், தமிழக முதல்வருமான ஸ்டாலின் இதுதொடர்பாக தொடர்ந்து குரல் கொடுத்து வருகிறார். மத்திய உள்துறை அமைச்சர் அமித்ஷா கடந்த சில மாதங்களுக்கு முன்பு கோவை வந்தபோது, இது பொய்யான தகவல் என்றும், தொகுதி மறுசீரமைப்பால் தென்னிந்தியாவில் ஒரு தொகுதி கூட குறையாது என்றும் கூறியிருந்தார். இந்நிலையில், 2027ல் தொகுதி மறுசீரமைப்பு இருக்கும் எனக் கூறப்படுகிறது.
இது தொடர்பாக தயாநிதி மாறன் தமது எக்ஸ் சமூக வலைதள பக்கத்தில் வெளியிட்டுள்ள பதிவில், "அரசியலமைப்புச் சட்டத்திருத்தம் 84ன் படி 2026க்கு பின் மேற்கொள்ளப்படும் முதல் மக்கள்தொகை கணக்கெடுப்பின் அடிப்படையில் தொகுதி மறுவரையறையை மேற்கொண்டாக வேண்டும். அதை மனதில் வைத்தே மக்கள் தொகை கணக்கெடுப்பைக் காலம் தாழ்த்தி வந்து தற்போது 2027இல் மேற்கொள்ளப்படும் என அறிவித்துள்ளது ஒன்றிய பாஜக அரசு.
ஒன்றிய பாஜக அரசின் இந்த சதியை தமிழக முதலமைச்சர் ஸ்டாலின் ஆரம்பம் முதலே எதிர்த்து வருகிறார். நியாயமான தொகுதி மறுவரையறை மேற்கொள்ளப்பட வேண்டும் என இதனால் பாதிக்கப்போகும் மாநிலங்களின் முதல்வர்கள், தலைவர்களை ஓரணியில் அணிதிரட்டி எதிர்ப்பைப் பதிவு செய்தார்.
அப்போதெல்லாம் தமிழ்நாடு முதலமைச்சர் வீண் பதற்றத்தை உண்டாக்குகிறார் எனக் கூறி வந்தவர்களின் குட்டு இப்போது மக்கள் முன் அம்பலப்பட்டு கிடக்கிறது. இதோ நம் வீட்டு வாசல் வரை வந்துவிட்டது அந்த ஆபத்து.
இப்போது ஒன்றிய உள்துறை அமைச்சர் அமித்ஷா என்ன சொல்ல போகிறார்? தமிழ்நாட்டின் எம்.பி. தொகுதிகளின் எண்ணிக்கை குறையாது என்ற ஏமாற்று வார்த்தைகள் எங்களுக்கு வேண்டாம். மக்களவையில் தமிழ்நாட்டின் பிரதிநிதித்துவ விகிதம் 7.18 சதவீதத்தில் எந்த மாற்றமும் இருக்காது என்ற உத்தரவாதத்தை சட்டப்படி அளிக்க உள்துறை அமைச்சர் அமித்ஷா தயாரா? பதில் சொல்லுங்கள் அமித்ஷா அவர்களே!" எனக் கேள்வி எழுப்பியுள்ளார்.
Click it and Unblock the Notifications
Sign in with Google