"முக்கிய அப்டேட்" மதுரை மெட்ரோ ரயில் திட்டம்.. 75 நாட்களில் திட்ட அறிக்கை தயாராகும்!

சென்னை: 75 நாட்களில் மதுரை மெட்ரோ ரயில் திட்டத்திற்கான விரிவான திட்ட அறிக்கை தயாரிக்கப்படும் என்று சென்னை மெட்ரோ ரயில் இயக்குநர் அர்ச்சுனன் தெரிவித்துள்ளார். அதேபோல் அந்த அறிக்கையில் ரயில் நிலைய வகை, செலவுகள், செயல்படுத்தப்படும் முறை, சமூக மற்றும் பொருளாதார விவரங்கள் இடம்பெறும் என்றும் கூறியுள்ளார்.

சென்னை மெட்ரோ ரயில் முதல் கட்ட திட்டம் 54.1 கிலோ மீட்டர் தூரத்திற்கு விம்கோ நகர் முதல் சென்னை விமான நிலையம் வரை, சென்ட்ரல் முதல் பரங்கிமலை வரை என இரண்டு வழித்தடங்களில் முழுமையாக செயல்பாட்டில் உள்ளது.

இந்த நிலையில் 2ம் கட்ட மெட்ரோ பணிகள் மிக வேகமாக நடைபெற்று வருகின்றன. ரூ.69,180 கோடி செலவில், 118.9 கிலோ மீட்டர் நீளத்திற்கு பணிகள் மேற்கொள்ளப்பட்டு வருகிறது. இந்தப் பணிகள் அனைத்தும் 2026ம் ஆண்டுக்குள் முடிக்க இலக்கு நிர்ணயம் செய்யப்பட்டுள்ளது.'

திருமங்கலம் டூ ஒத்தக்கடை

இதனிடையே கோவை மற்றும் மதுரையில் மெட்ரோ ரயில் திட்டங்களை செயல்படுத்த தமிழ்நாடு அரசு முடிவு செய்துள்ளது. மதுரை மெட்ரோ ரயில் திட்டத்திற்கான விரிவான சாத்தியக்கூறு அறிக்கை தமிழக அரசிடம் சமர்ப்பிக்கப்பட்டது. இதில் மதுரையில் ஒத்தக்கடை முதல் திருமங்கலம் வரை 31 கிலோ மீட்டர் துாரம் மெட்ரோ ரயில் திட்டத்தை செயல்படுத்தலாம் என்று தெரிவிக்கப்பட்டது.

ரூ.6 ஆயிரம் கோடி

இதற்கிடையே 17 நிறுத்தங்கள் இடம்பெறும் வகையில் திட்டமிடப்பட்டுள்ளது. கோரிப்பாளையம், வசந்தநகர் பகுதிகளில் சுரங்கப்பாதை அமைக்கப்படும். இந்தத் திட்டத்தை சுரங்கப்பாதை வழியாக செயல்படுத்தினால் ரூ.8 ஆயிரம் கோடியும், உயர்மட்ட பாலம் வழியாக செயல்படுத்தினால் ரூ.6 ஆயிரம் கோடியும் செலவாகும் என்று மதிப்பீடு செய்யப்பட்டது.

திட்ட அறிக்கை

இந்த அறிக்கையின் அடிப்படையில் மதுரை மெட்ரோ ரயில் திட்டத்திற்கு விரிவான திட்ட அறிக்கை தயார் செய்ய சென்னை மெட்ரோ ரயில் நிறுவனம் டெண்டர் கோரி உள்ளது. இதற்கான விளம்பரத்தை சென்னை மெட்ரோ ரயில் நிறுவனம் வெளியிட்டது. இந்த நிலையில் 75 நாட்களில் விரிவான திட்ட அறிக்கை தயாரிக்கப்படும் என்று சென்னை மெட்ரோ ரயில் நிறுவனம் தெரிவித்துள்ளது.

மெட்ரோ இயக்குநர் பேட்டி

இதுகுறித்து சென்னை மெட்ரோ ரயில் திட்ட இயக்குநர் அர்ச்சுனன் பேசுகையில், 75 நாட்களில் மதுரை மெட்ரோ ரயில் திட்டத்திற்கான விரிவான திட்ட அறிக்கை தயாரிக்கப்படும். அந்த அறிக்கையில் ரயில் நிலைய வகை, செலவுகள், செயல்படுத்தப்படும் முறை, சமூக மற்றும் பொருளாதார விவரங்கள் இடம்பெறும். சென்னையில் மெட்ரோ ரயில் வெற்றிகரமாக இயங்குவதையடுத்து, மதுரையிலும் மெட்ரோ ரயில் செயல்படுத்த திட்டமிட்டு வருகிறோம் என்று தெரிவித்துள்ளார்.

English summary

Chennai Metro Rail Director Arjunan said that a detailed project report for the Madurai Metro Rail project will be prepared in 75 days.