ஆன்மீகத்திற்கு எதிரான கட்சியா?...நெருக்கடிகளுக்கு அடிபணிய மாட்டோம்...சட்டசபையில் முதல்வர் ஆவேசம்

ஆன்மீகத்திற்கு எதிரான கட்சியாக திமுகவை சித்தரிக்க முயற்சி நடைபெறுவதாக முதல்வர் மு.க ஸ்டாலின் குற்றம்சாட்டியுள்ளார்.

Updated: Wednesday, May 4, 2022, 16:00 [IST]

Subscribe to Oneindia Tamil

சென்னை: திராவிட முன்னேற்றக்கழகத்தை ஆன்மீகத்திற்கு எதிராக கட்சியாக சித்தரிக்க முயற்சி செய்யப்படுவதாக தமிழக முதல்வர் மு.க ஸ்டாலின் கூறியுள்ளார். நெருக்கடிகளுக்கு திமுக ஒருபோதும் அடிபணியாது என்றும் சட்டசபையில் பேசிய முதல்வர் மு.க ஸ்டாலின் கூறியுள்ளார்.

பாரம்பரிய நிகழ்ச்சி

பழம் பெருமை வாய்ந்த தருமபுரம் ஆதினத்தில் 500 ஆண்டுகளுக்கும் மேலாக பட்டினப் பிரவேசம் நடைபெற்று வருகிறது. பல்லக்கு தூக்குபவர்கள் பாரம்பரியமாக ஆதீனத்திற்கு சொந்தமான இடத்திலேயே வசித்து வருபவர்கள். தருமபுரம் ஆதீனம் பட்டினப் பிரவேசம் பாரம்பரியமாக நடைபெற்று வரும் நிகழ்வு. பக்தர்கள் தங்கள் குருநாதரை பல்லக்கில் அமரவைத்து மனமுவந்து சுமந்து வருவது ஒரு ஆன்மிக நிகழ்வு என எதிர்கட்சித் தலைவர் எடப்பாடி பழனிசாமி பேசினார்.

நல்ல முடிவு

இதற்கு பதிலளிக்கும் வகையில் பேசிய இந்து சமய அறநிலையத்துறை அமைச்சர் சேகர்பாபு,தருமபுரம் ஆதீன பட்டணப் பிரவேசம் குறித்து விரைவில் நல்ல முடிவு எடுக்கப்படும் என்று உறுதியளித்துள்ளார். ஆதினங்களுடன் 3 மணி நேரத்திற்கு இந்து சமய அறநிலையத்துறை அலுவலகத்தில் ஆலோசனை நடத்தப்பட்டது. தருமபுரம் ஆதீனம் கடந்த வாரம் முதல்வரை சந்தித்துவிட்டு ஆன்மிக அரசு என்று பேட்டியளித்திருந்தார்.

சேகர்பாபு அறிவிப்பு

பட்டினப்பிரவேச நிகழ்ச்சியில் பல்லக்கு தூக்க தடை விதிக்கப்பட்டதை சிலர் அரசியலாக்க முயற்சி செய்கின்றனர். மே 22 ஆம் தேதிதான் பல்லக்கு தூக்கும் நிகழ்வு நடைபெறும் என்பதால் அதற்குள் ஆதீனத்துடன் முதல்வர் ஸ்டாலின் அவர்கள் பேசி விரைவில் நல்ல முடிவை அறிவிப்பார் என்று அமைச்சர் சேகர்பாபு சட்டசபையில் விளக்கம் அளித்தார்.

முதல்வர் ஸ்டாலின் விளக்கம்

திராவிட முன்னேற்றக்கழகம் ஆன்மீகத்திற்கு எதிரான கட்சி என்று திட்டமிட்டு செய்தி பரப்பப்படுவதாக முதல்வர் மு.க ஸ்டாலின் கூறினார். எந்த ஒரு நெருக்கடிகளுக்கும் நாங்கள் அடிபணிந்து போக மாட்டோம் எனவும் சட்டசபையில் முதல்வர் ஸ்டாலின் தெரிவித்தார்.