வருங்கால திமுக உதயநிதி ஸ்டாலின்! தயாநிதி மாறன் வைத்த ஐஸ்! திமுக பொதுக்குழு சுவாரஸ்யம்!

Published: Sunday, October 9, 2022, 13:19 [IST]

Subscribe to Oneindia Tamil

சென்னை: திமுக பொதுக்குழுவில் பேசிய மத்திய சென்னை நாடாளுமன்ற உறுப்பினர் தயாநிதி மாறன், உதயநிதி ஸ்டாலினை வருங்கால திமுக என எனக் குறிப்பிட்டுள்ளார்.

இதேபோல் ஒரு காலத்தில் எதிரும் புதிருமாக இருந்த ஆ.ராசாவை, ஆருயிர் சகோதரர் என்றும் கனிமொழியை அன்புச் சகோதரி எனவும் தயாநிதி மாறன் குறிப்பிட்டு அழைத்துள்ளார்.

வருங்கால திமுக உதயநிதி ஸ்டாலின் என அவர் கூறிய போது பொதுக்குழு உறுப்பினர்கள் ஆரவாரம் செய்து வரவேற்றனர்.

திமுக பொதுக்குழு

திமுக தலைவராக ஸ்டாலின் 2-வது முறை தேர்வு செய்யப்பட்டுள்ள நிலையில் அவரை வாழ்த்தி பேசிய மத்திய சென்னை நாடாளுமன்ற உறுப்பினர் தயாநிதி மாறன், உதயநிதி தான் இனி திமுகவின் வருங்காலம் என்பதை பிரகனப்படுத்தினார். இவரது பேச்சு பொதுக்குழுவில் பங்கேற்ற இளைஞரணி நிர்வாகிகள் மத்தியில் மிகுந்த வரவேற்பை பெற்றிருந்ததுடன் கட்சியின் முக்கிய நிர்வாகிகள் மத்தியிலும் கைதட்டலை அள்ளியது. உதயநிதி ஸ்டாலினை வருங்கால திமுக என தயாநிதி மாறன் குறிப்பிட்ட போது அதை ஸ்டாலின் கண்டுகொள்ளாமல் அமர்ந்திருந்தார்.

ஆருயிர் சகோதரர்

இதேபோல் ஒரு காலத்தில் ஆ.ராசாவுடன் எதிரும் புதிருமாக அரசியல் செய்த தயாநிதி மாறன், இப்போது ஆருயிர் சகோதரர் ஆ.ராசா என அழைக்கும் அளவுக்கு மாறியிருக்கிறார். அதுமட்டுமல்லாமல் கனிமொழியையும் அன்புச் சகோதரி கனிமொழி எனக் குறிப்பிட்டு பேசி துணை பொதுச்செயலாளராக தேர்வு செய்யப்பட்டதற்கு தயாநிதி மாறன் வாழ்த்துக் கூறினார். சிறுவயதில் அங்கிள் என்று அழைத்த துரைமுருகனை அண்ணன் என்று குறிப்பிட்ட போது தயாநிதி மாறனால் சிரிப்பை அடக்க முடியவில்லை.

உதயநிதி சிரிப்பு

தன்னை வருங்கால திமுக என தயாநிதி மாறன் எம்.பி. பேசிய போது மேடைக்கு கீழ் அமர்ந்திருந்த உதயநிதி ஸ்டாலின் லேசாக புன்னகைத்ததோடு இப்போது எதற்கு இதை பேசுகிறார் என்கிற மைண்ட் வாய்ஸில் அவர் ரியாக்‌ஷன் கொடுத்தது கவனிக்கத்தக்கது. இதனிடையே மத்திய சென்னையில் திமுக பொதுக்குழுவை நடத்தியதற்காக ஸ்டாலினுக்கு நன்றி தெரிவித்துக் கொண்ட தயாநிதி, மற்ற துணைப் பொதுச்செயலாளர்களான ஐ.பெரியசாமி, பொன்முடி, அந்தியூர் செல்வராஜ், ஆகியோருக்கு சுருக்கமாக வாழ்த்துக் கூறினார்.

தயாநிதி பேச்சு

தயாநிதி மாறனின் பேச்சில் வழக்கமாக அவரிடம் இருக்கும் எனர்ஜி குறைவாகவே இருந்தது. வழக்கமாக கொஞ்சம் கேலி கிண்டலாக பேசக்கூடியவர் இன்று நடைபெற்ற திமுக பொதுக்குழுவில் உற்சாகமில்லாத குரலில் பேசிவிட்டு அமர்ந்துள்ளார்.

Published On October 9, 2022