திமுக கூட்டணியில்.. ஐயுஎம்எல்-க்கு இந்த முறை சீட் குறைவு! காரணம் இதுதான்!

Updated: Saturday, February 28, 2026, 21:12 [IST]

Subscribe to Oneindia Tamil

சென்னை: திமுக, தனது கூட்டணியில் உள்ள கட்சிகளுடன் தொகுதி பங்கீட்டை இறுதி செய்து வருகிறது. தற்போது இஸ்லாமிய கட்சிகளுடன் பங்கீட்டை இறுதி செய்து வருகிறது. ஆனால், கடந்த முறையுடன் ஒப்பிடும்போது இந்த முறை, ஐயுஎம்எல் கட்சிக்கு 1 தொகுதி குறைவாக திமுக ஒதுக்கியிருக்கிறது.

கடந்த முறை திமுக கூட்டணியில் மனிதநேய மக்கள் கட்சியும், ஐயுஎம்எல் கட்சியும் இடம்பெற்றிருந்தன. இந்த முறையும் கூட்டணியில் இந்த இரண்டு இஸ்லாமிய கட்சிகள் இடம்பெற்றிருக்கின்றன. இது தவிர, தமிமுன் அன்சாரி தலைமையிலான மனிதநேய ஜனநாயக கட்சி இணைந்துள்ளது. இத்துடன் எஸ்டிபிஐ கட்சியும் இணையலாம் என பேசப்படுகிறது. எனவே மொத்தமாக திமுக கூட்டணியில் 4 இஸ்லாமிய கட்சிகள் இடம் பெறுகின்றன.

தற்போது ஐயுஎம்எல் மற்றும் மனிதநேய மக்கள் கட்சியுடன் சீட் பங்கீடு முடிக்கப்பட்டிருக்கிறது. இதில், ஐயுஎம்எல் கட்சிக்கு 2 தொகுதிகள் ஒதுக்கப்பட்டிருக்கின்றன. கடந்த முறை 3 தொகுதிகள் ஒதுக்கப்பட்டிருந்தது.

வாணியம்பாடி
கடையநல்லூர்
சிதம்பரம்

ஆகிய தொகுதிகளில் ஐயுஎம்எல் போட்டியிட்டது. இதில் வாணியம்பாடியில் 5,000 வாக்குகள் வித்தியாசத்தில் அதிமுகவிடம் தோல்வியை தழுவியது. கடையநல்லூரில் 20,000க்கும் அதிகமான வாக்குகள் வித்தியாசத்திலும், சிதம்பரத்தில் 15,000 வாக்குகள் வித்தியாசத்திலும் அதிமுகவிடம் தோல்வியை தழுவியது. இதில் கவனிக்க வேண்டிய விஷயம் என்னவெனில், 3 தொகுதிகளிலும் இக்கட்சி தனது சின்னமான ஏணி சின்னத்தில் போட்டியிட்டிருந்தது.

மறுபுறம் மனிதநேய மக்கள் கட்சி, திமுகவின் உதயசூரியன் சின்னத்தில் 2 தொகுதிகளில் போட்டியிட்டு வெற்றிபெற்றிருந்தது. மணப்பாறை மற்றும் பாபநாசம் தொகுதிகள் இந்த கட்சிக்காக ஒதுக்கப்பட்டிருந்தது. இரண்டு தொகுதிகளிலும் கட்சி அபாரமான வெற்றியை பதிவு செய்திருந்தது.

இந்த தேர்தலுக்கு தொகுதி பங்கீடு குறித்த பேச்சுவார்த்தை தொடங்கியபோது ஐயுஎம்எல், 5 தொகுதிகளை கேட்டிருந்தது. ஆனால், கடந்த முறை தோல்வியடைந்ததாலும், கூட்டணியில் கூடுதலாக இஸ்லாமிய கட்சிகள் இணைந்ததாலும் 2 தொகுதிகள் மட்டுமே வெற்றிப்பெற்றது. அதேபோல கடந்த முறை 2 தொகுதிகளில் போட்டியிட்டு வென்ற மனிதநேய மக்கள் கட்சிக்கு இந்த முறையும் 2 தொகுதிகள் ஒதுக்கப்பட்டிருக்கின்றன.