திமுக கூட்டணியிலிருந்து காங்கிரஸ் 'அவுட்'? விஜய் பக்கம் தாவினால்... தமிழக அரசியலில் என்ன ஆகும்?

சென்னை: தமிழக அரசியல் களம் 2026 சட்டமன்றத் தேர்தலை நோக்கி சூடுபிடிக்கத் தொடங்கிவிட்டது. இப்போது அறிவாலய வட்டாரத்தில் கசிந்து வரும் ஒரு 'ஹாட்' தகவல், தமிழக அரசியலின் அச்சாணியையே மாற்றியமைக்கும் எனத் தெரிகிறது. அது: திமுக கூட்டணியிலிருந்து காங்கிரஸ் வெளியேறி, விஜய்யின் தமிழக வெற்றிக் கழகத்துடன் கை கோர்த்தால் என்ன நடக்கும்?

கூட்டணிக் கணக்கும்... பலப்பரீட்சையும்!

விஜய்யின் தவெக-காங்கிரஸ் கூட்டணி அமைந்தால், அது தமிழகத்தில் ஒரு வலுவான 'மூன்றாவது முனை'யை உருவாக்கும். 2024 மக்களவைத் தேர்தலில் காங்கிரஸ் சுமார் 10.8% வாக்குகளைத் தக்கவைத்துள்ளது. மறுபுறம், விஜய்யின் வருகை நடுநிலை வாக்காளர்கள் மற்றும் இளைஞர்களிடம் பெரும் தாக்கத்தை ஏற்படுத்தும் என எதிர்பார்க்கப்படுகிறது. சுமார் 15% முதல் 25% வரை வாக்குகளை விஜய் அறுவடை செய்யக்கூடும் என அரசியல் விமர்சகர்கள் கணிக்கின்றனர்.

இந்த இரண்டும் இணைந்தால், சுமார் 25% முதல் 30% வாக்கு வங்கியை இந்தத் தளம் எட்டும். இது திமுக மற்றும் அதிமுக ஆகிய இரு துருவ அரசியலுக்கும் சிம்ம சொப்பனமாக அமையும்.

கள யதார்த்தம் யாருக்கு?

திமுக: காங்கிரஸ் வெளியேறினாலும், தேஹமுதியாக் விசிக, இடதுசாரிகள் மற்றும் மதிமுக ஆகிய கட்சிகள் திமுகவிடம் நீடிக்கும் பட்சத்தில், அக்கட்சிக்கு 30-35% வாக்கு வங்கி உறுதியாக இருக்கும். ஆனால், தென் மாவட்டங்களிலும் கொங்கு மண்டலத்திலும் காங்கிரஸ் தரும் 'பூஸ்ட்' இல்லாதது திமுகவுக்குப் பின்னடைவை ஏற்படுத்தும்.

தவெக- காங்கிரஸ்: விஜய்யிடம் பலமான ரசிகர் பட்டாளம் இருந்தாலும், பூத் மட்டத்தில் கட்சியை வழிநடத்த அனுபவம் வாய்ந்த நிர்வாகிகள் காங்கிரஸில் உள்ளனர். இந்த 'ஸ்டார் பவர் + அமைப்பு ரீதியான பலம்' களத்தில் பெரிய மாற்றத்தைச் செய்யும்.

பெர்செப்ஷன் வார் (Perception War): யார் ஜெயிக்கப்போகிறார்கள்?

விஜய் ஏற்கனவே திமுகவை 'அரசியல் எதிரி' என்றும், பாஜகவை 'கருத்தியல் எதிரி' என்றும் அறிவித்துவிட்டார். காங்கிரஸுடன் கூட்டணி சேர்வதன் மூலம் விஜய்க்கு ஒரு தேசிய அங்கீகாரம் கிடைக்கும். "திராவிட மாடல் vs புதிய அரசியல்" என்கிற பிம்பத்தை விஜய் மிக எளிதாகக் கட்டமைக்க முடியும். வாரிசு அரசியல் புகார்களுக்கு ஆளாகும் திமுகவுக்கு எதிராக, இந்த 'புதிய கூட்டணி' மக்கள் மத்தியில் பெரும் வரவேற்பைப் பெறும்.

தென் மாவட்டங்களில் திமுக - காங்கிரஸ் கூட்டணி: ஒரு பலமான கோட்டை
தமிழகத்தின் தென் மாவட்டங்களான கன்னியாகுமரி, திருநெல்வேலி, தென்காசி, தூத்துக்குடி மற்றும் விருதுநகர் ஆகியவை பாரம்பரியமாக காங்கிரஸின் பலமான கோட்டைகளாகக் கருதப்படுகின்றன.

வாக்கு வங்கி பலம்: கன்னியாகுமரி மற்றும் திருநெல்வேலி போன்ற மாவட்டங்களில் காங்கிரஸின் தனிப்பட்ட வாக்கு வங்கி 15% முதல் 20% வரை உள்ளது.

மதச்சார்பற்ற பிம்பம்: சிறுபான்மையினர் வாக்குகள் அதிகம் உள்ள இந்த மாவட்டங்களில், திமுக-காங்கிரஸ் கூட்டணி ஒரு "வெல்ல முடியாத" சக்தியாக கடந்த தேர்தல்களில் (2019, 2021, 2024) உருவெடுத்தது.

காங்கிரஸ் வெளியேறினால் ஏற்படும் தாக்கம்: புள்ளிவிவரப் பார்வை

காங்கிரஸ் திமுகவை விட்டு விலகி விஜய்யின் தவெக (TVK) உடன் இணைந்தால், தென் மாவட்டங்களில் பின்வரும் மாற்றங்கள் நிகழ வாய்ப்புள்ளது:

1. வாக்கு வங்கிச் சரிவு (Vote Share Swing)

திமுக தலைமையிலான கூட்டணி தென் மாவட்டங்களில் சராசரியாக 45-50% வாக்குகளைப் பெற்று வருகிறது. காங்கிரஸ் பிரிந்து சென்றால், அந்த கூட்டணியின் வாக்கு வங்கி 35-38% ஆகக் குறைய வாய்ப்புள்ளது. இந்த 10-12% சரிவு என்பது பல தொகுதிகளில் வெற்றியைத் தீர்மானிக்கும் காரணியாகும்.

2. மும்முனைப் போட்டி மற்றும் சிறுபான்மையினர் வாக்குகள்

தென் மாவட்டங்களில் திமுகவின் மிகப்பெரிய பலம் சிறுபான்மையினர் வாக்குகள். விஜய் - காங்கிரஸ் கூட்டணி அமையும் பட்சத்தில், அந்த வாக்குகள் சிதற வாய்ப்புண்டு. குறிப்பாக:

கிறிஸ்தவ மற்றும் முஸ்லிம் வாக்குகள்: இவை அப்படியே திமுகவிடம் செல்லாமல், ஒரு பகுதி 'மாற்றத்தை' விரும்பி விஜய் - காங்கிரஸ் கூட்டணிக்கு நகரலாம். இது திமுகவின் வெற்றியை நேரடியாகப் பாதிக்கும்.

3. ஜாதி ரீதியான வாக்குகள் மற்றும் செல்வாக்கு

நாடார் சமூக வாக்குகள்: தென் மாவட்டங்களில் செல்வாக்கு மிக்க இந்தச் சமூகத்தினர் மத்தியில் காங்கிரஸுக்கும் விஜய்க்கும் தனித்தனி செல்வாக்கு உண்டு. இவர்கள் இருவரும் இணையும் போது, அது திமுகவுக்கு பெரும் பின்னடைவாக அமையும்.

தேவர் மற்றும் தலித் வாக்குகள்: அதிமுக மற்றும் விசிக ஆகிய கட்சிகள் இந்தப் பிரிவுகளில் செல்வாக்கு பெற்றுள்ள நிலையில், காங்கிரஸ் இல்லாத திமுக தென் பகுதிகளில் பலவீனமடையும்.

பாஜக-வின் நிலைப்பாடு என்ன?

எதிர்க்கட்சி வாக்குகள் சிதறுவது அதிமுக - பாஜக தலைமையிலான தேசிய ஜனநாயகக் கூட்டணிக்கு சாதகமாக அமைய வாய்ப்புண்டு. திமுக-வின் வாக்குகள் பிரியும் போது, பாஜக தனது 11-14% வாக்கு வங்கியை வைத்துக்கொண்டு சில முக்கியத் தொகுதிகளில் வெற்றி பெறக் கடுமையாகப் போராடும்.

மொத்தத்தில், காங்கிரஸ் 'கை' கொடுத்து விஜய் 'வாகை' சூடினால், 2026 தேர்தல் களம் திராவிடக் கட்சிகளுக்கு வாழ்வா சாவா போராட்டமாகவே மாறும்..

English summary

DMK-Congress Split Dynamics: How will TVK utilise the rise of the new alliance?