5 தொகுதிகளுக்கு சரி.. ஆனால் சென்னையில் 2 தொகுதிகள் கொடுங்க.. திமுகவுக்கு சிபிஎம் விதித்த நிபந்தனை!

Updated: Saturday, March 21, 2026, 17:25 [IST]

Subscribe to Oneindia Tamil

சென்னை: திமுக கூட்டணியில் 5 தொகுதிகளை ஏற்க சிபிஎம் கட்சி தரப்பில் நிபந்தனைகள் விதிக்கப்பட்டுள்ளது. சென்னை மற்றும் சென்னை புறநகரில் தலா ஒரு தொகுதிகளை சிபிஎம் கட்சிக்கு ஒதுக்கினால், திமுக தரப்பில் அளிக்கப்படும் 5 தொகுதிகளை ஏற்றுக் கொள்வோம் என்று அக்கட்சியின் அவசர நிர்வாகக் குழு கூட்டத்தில் ஆலோசிக்கப்பட்டுள்ளது.

சட்டசபைத் தேர்தலுக்கு இன்னும் 33 நாட்களே இருக்கும் நிலையில், திமுக கூட்டணியில் இன்னும் தொகுதி பங்கீடு பேச்சுவார்த்தை முடியவில்லை. இதுவரை ஐயூஎம்எல், மமக, காங்கிரஸ், மதிமுக, கொமதேக, சிபிஐ ஆகிய கட்சிகளுடன் திமுக தொகுதி பங்கீட்டு ஒப்பந்தத்தில் கையெழுத்திட்டுள்ளது. சிபிஐக்கு 5 தொகுதிகளை ஒதுக்கியதால், சிபிஎம் கட்சிக்கும் 5 தொகுதிகள் ஒதுக்க திமுக முன் வந்தது.

ஆனால் கூடுதல் தொகுதிகள் ஒதுக்கப்பட வேண்டும் என்ற கோரிக்கையில் இருந்த சிபிஎம் மாநிலச் செயலாளர் பெ.சண்முகம், கடந்த முறை ஒதுக்கிய 6 தொகுதிகளை மீண்டும் ஒதுக்க வேண்டும் என்பதில் பிடிவாதமாக இருக்கிறார். 4 கட்ட பேச்சுவார்த்தை நடைபெற்ற போதும், திமுக - சிபிஎம் இடையில் தொகுதி பங்கீட்டில் இழுபறி நீடித்து வருகிறது.

இப்படியான சூழலில் சிபிஎம் கட்சியின் தேசிய செயலாளர் பேபி சென்னை வந்துள்ளார். இதன் காரணமாக சிபிஎம் கட்சியின் அவசர ஆலோசனை கூட்டம் சென்னையில் நடைபெற்று வருகிறது. இந்த ஆலோசனை கூட்டத்தில் தொகுதி பங்கீடு தொடர்பாகவும் ஆலோசிக்கப்பட்டிருக்கிறது. அப்போது திமுக தரப்பில் ஒதுக்கப்பட உள்ள 5 தொகுதிகளை ஏற்க சிபிஎம் தரப்பில் ஒப்புதல் அளிக்கப்பட்டுள்ளது.

ஆனால் கூடுதலாக ஒரு நிபந்தனையையும் சிபிஎம் தரப்பில் திமுகவுக்கு விதிக்க முடிவு எடுக்கப்பட்டுள்ளது. அதாவது சென்னை மற்றும் சென்னை புறநகரில் தலா 1 தொகுதியை சிபிஎம் கட்சிக்கு ஒதுக்க திமுக முன் வந்தால், 5 தொகுதிகளை ஏற்றுக் கொள்ளலாம் என்று முடிவு செய்யப்பட்டுள்ளது. குறிப்பாக சென்னையில் பெரம்பூர், வேளச்சேரி, விருகம்பாக்கம், திருவொற்றியூர், மதுரவாயல், பல்லாவரம் தொகுதிகளை சிபிஎம் எதிர்பார்க்கிறது.

2001 முதல் 2016 வரை 3 முறை பெரம்பூர் தொகுதியில் சிபிஎம் வென்றுள்ளது. அதேபோல் மதுரவாயல் தொகுதியில் 2011ல் சிபிஎம் வென்றது. இந்த நிபந்தனையை ஏற்க முடியவில்லை என்றால், தனித்துப் போட்டியிடுவது குறித்து ஆலோசிக்கப்படும் என்று திமுகவுக்கு அதிர்ச்சி கொடுத்திருக்கின்றனர். இதனிடையே பெரம்பூர் தொகுதியில் தவெக தலைவர் விஜய் களமிறங்க ஆயத்தமாகி வருகிறார்.