திமுக கூட்டணியின் மாநாட்டுக்கு ஓவைசியை அழைக்கவில்லை.. திமுக மறுப்பு

சென்னை: திமுக சிறுபான்மையினர் அணி சார்பில் சென்னையில் நடத்தப்பட உள்ள அரசியல் மாநாட்டில் கலந்துகொள்ள ஓவைசிக்கு அழைப்பு விடுக்கப்படவில்லை என்று திமுக தலைமை மறுப்பு தெரிவித்து உள்ளது.

நேற்றிரவு ஒரு செய்தி கசிந்தது.. டிசம்பர் 6ம் தேதி சென்னை ஒம்எம்சிஏ திடலில் திமுக சிறுபான்மையினர் அரசியல் மாநாடு நடைபெற இருப்பதாக , இந்த மாநாட்டில் ஐஎம்ஐஎம் கட்சியின் தலைவர் அசாதுதீன் ஒவைசிக்கு அழைப்பு விடுக்கப்பட்டுள்ளதாகவும் கூறப்பட்டன.

இந்த தகவல் உண்மையாக இருக்கும் என்றே நம்பப்பட்டது.. காரணம், திமுகவின் சிறுபான்மை பிரிவு மாநிலச் செயலாளர் மஸ்தான், ஐதராபாத்திற்குச் சென்று ஓவைசியை சந்தித்து பேசிய போட்டோக்கள் சோஷியல் மீடியாவில் வைரலானது.. மேலும், சென்னையில் வரும் 6ம் தேதி திமுக நடத்தும் கூட்டத்திற்கு ஓவைசிக்கு மஸ்தான் நேரில் அழைத்ததாகவும் தகவல்கள் வெளியாகின. இதை அந்த கட்சியின் மாநில தலைவர் வஹில் அகமது உறுதியும் செய்திருந்தார்.

இதையடுத்து, ஒருவேளை திமுகவுடன் ஓவைசி கூட்டணி வைக்க போகிறாரா என்ற எதிர்பார்ப்புகள் எழுந்தன.. ஆனால், திமுக மாநாட்டில் கலந்துகொள்ள அசாதுதீன் ஒவைசிக்கு அழைப்பு விடுக்கப்படவில்லை மறுப்பு வெளியிடப்பட்டு உள்ளது..

இதுகுறித்து, மஸ்தானே ஒரு அறிக்கை விடுத்துள்ளார். அந்த அறிக்கையில், "திமுகவின் சிறுபான்மை நல உரிமைப் பிரிவின் சார்பில் எங்கள் கழகத் தலைவரை வைத்து பொதுக்கூட்டம் நடத்துவது வழக்கமான ஒன்று. அந்த அடிப்படையில் இந்த ஆண்டு அப்படியொரு கூட்டம், வருகின்ற 6.1.2020 அன்று சென்னை இராயப்பேட்டையில் உள்ள ஒய்.எம்.சி.ஏ மைதானத்தில் கழகத் தலைவர் அவர்களது தலைமையில் நடைபெற உள்ளது.

இந்தப் பொதுக்கூட்டத்திற்கு எப்போதும் போல் தி.மு.க.வின் தோழமை கட்சித் தலைவர்கள் மட்டுமே சிறப்பு அழைப்பாளர்களாக அழைக்கப்பட்டிருக்கிறார்கள். மற்றபடி தொலைக்காட்சிகளில் வருவது போன்ற செய்தி உண்மையில்லை என்பதைத் தெரிவித்துக் கொள்கிறேன்" என தெரிவித்துள்ளார்.

ஓவைசியை கூட்டணிக்குள் சேர்க்ககூடாது என்று ஏற்கனவே திமுக கூட்டணியில் உள்ள ஐயூஎம்எல், மனிதநேய மக்கள் கட்சி போன்றவை வலியுறுத்தி வரும் நிலையில், திமுக கூட்டத்துக்கு கூட்டணி கட்சிகளுக்கு மட்டுமே அழைப்பு அனுப்பப்பட்டுள்ளது என்றும், மற்ற கட்சிகளுக்கு அழைப்பு அனுப்பப்படவில்லை என்றும், திமுக அவசர மறுப்பு ஒன்றினை வெளியிட்டுள்ளது குறிப்பிடத்தக்கது.

English summary

DMK denies inviting owaisi for alliance meeting on January 6