திருச்சியில் 10 லட்சம் பேர் பங்கேற்கும் மாநில மாநாடு! திமுக மா.செ கூட்டத்தில் முக்கிய முடிவுகள்

சென்னை: திமுக மாவட்ட செயலாளர்கள் கூட்டம் இன்று சென்னையில் நடைபெற்றது. இந்த கூட்டத்தில் எம்.எல்.ஏக்கள், எம்பிக்கள் பங்கேற்றனர். இதில் 4 முக்கிய தீர்மானங்களும் நிறைவேற்றப்பட்டன. இதன்படி, வாக்குச்சாவடிக்கு 10 பெண்கள் வீதம் வெல்லும் தமிழ் பெண்கள் வீடு வீடாக சென்று பரப்புரை செய்ய தீர்மானம் நிறைவேற்றப்பட்டுள்ளது. இதேபோன்று மார்ச் 8 ஆம் தேதி திருச்சியில் 10 லட்சம் பேர் பங்கேற்கும் வகையில் பிரமாண்ட மாநாடு நடத்தவும் திமுக தீர்மானம் நிறைவேற்றியுள்ளது.

திமுக மாவட்டச் செயலாளர்கள் ஆலோசனைக் கூட்டம் இன்று சென்னையில் அண்ணா அறிவாலயத்தில் மாலையில் தொடங்கி நடைபெற்றது. முதல்வர் முக ஸ்டாலின் தலைமையில் நடைபெற்ற இந்த ஆலோசனை கூட்டத்தில் நடைபெறும் ஆலோசனையில், திமுக எம்பிக்கள், அமைச்சர்கள், எம்எல்ஏக்கள், மாவட்ட நிர்வாகிகள் பங்கேற்றனர்.

தேர்தலுக்கு இன்னும் சில நாட்களே உள்ள நிலையில் இந்த ஆலோசனைக் கூட்டம் முக்கியத்துவம் பெற்றிருந்தது. இந்த நிலையில் முதல்வர் ஸ்டாலின் பல்வேறு அறிவுறுத்தல்களை நிர்வாகிகளுக்கு வழங்கியுள்ளார். தேர்தலுக்கு நாட்கள் இன்னும் குறைவாகவே இருப்பதால் அனைவரும் தேர்தல் பணிகளை வேகமாக செய்ய வேண்டும் என்று கூறினார்.

மேலும் இந்த கூட்டத்தில் முக்கியமாக 4 தீர்மானங்கள் நிறைவேற்றப்பட்டதாகவும் தகவல் வெளியாகி உள்ளது. குறிப்பாக மார்ச் மாதம் 8 ஆம் தேதி 10 லட்சம் பேர் பங்கேற்கு வகையில் பிரமாண்ட மாநாட்டினை திருச்சியில் நடத்தப்படும் என தீர்மானம் நிறைவேற்றப்பட்டுள்ளது. ஸ்டாலின் தொடரட்டும் தமிழகம் வெல்லட்டும் என்ற பெயரில் திருச்சியில் பிரமாண்ட மாநில மாநாடு நடைபெறும் என தீர்மானம் நிறைவேற்றப்பட்டுள்ளது.

இதேபோன்று வாக்குச்சாவடிக்கு 10 பெண்கள் வீதம் வெல்லும் தமிழ் பெண்கள் வீடு வீடாக சென்று பரப்புரை செய்யவும் தீர்மானம் நிறைவேற்றப்பட்டுள்ளது. பிப்ரவரி 1 முதல் மார்ச் 8 வரை மகளிர் அணியினர் வீடு வீடாக அரசின் சாதனைகளை சொல்லி வாக்கு சேகரிக்கவும் தீர்மானம் நிறைவேற்றப்பட்டுள்ளது.

தொகுதிக்கு 4 இடங்களில் தமிழ்நாடு தலைகுனியாது தலைப்பில் நட்சத்திர பரப்புரையாளர்கள் கூட்டம் நடத்தவும் தீர்மானம் நிறைவேற்றப்பட்டுள்ளது. மேலும் சட்டசபைத் தேர்தலுக்கு இன்னும் குறைவான நாட்களே இருப்பதால் தேர்தல் வியூகம், கூட்டணி, தொகுதிகள் நிலவரம் உள்ளிட்டவை குறித்து விவாதிக்கப்பட்டதாக தகவல் வெளியாகி உள்ளது.

English summary

The DMK district secretaries’ meeting was held in Chennai with the participation of MLAs and MPs. Four key resolutions were adopted, including deploying 10 women per polling booth for door-to-door campaigning and organizing a massive conference in Tiruchirappalli on March 8.